Deadline-ის ცნობით, ტიმოთი შალამე მარლონ ბრანდოს შემდეგ ოსკარზე სამჯერ ნომინირებული ყველაზე ახალგაზრდა მსახიობი გახდა – ამერიკის კინოაკადემიამ 30 წლის შალამე Marty Supreme-ში შესრულებული როლისთვის, საუკეთესო მამაკაცი მსახიობის ნომინაციაში წარადგინა.
განცხადება გუშინ, 22 იანვარს მას შემდეგ გაკეთდა, რაც 2026 წლის ოსკარის ყველა ნომინანტი გამოცხადდა. მსახიობი 2018 წელს იმავე კატეგორიაში იყო ნომინირებული ფილმისთვის Call Me by Your Name და 2025 წელს ფილმისთვის A Complete Unknown.
რაც შეეხება მარლონ ბრანდოს, მან ოსკარის პირველი ნომინაცია 1952 წელს მიიღო ფილმისთვის A Streetcar Named Desire, მეორე – 1953 წელს ფილმისთვის Viva Zapata! და მესამე 1954 წელს ფილმისთვის Julius Caesar. მსახიობმა პირველი ოსკარი ერთი წლის შემდეგ, ფილმისთვის On the Waterfront მიიღო. მარლონ ბრანდო ფილტვის ფიბროზით 2004 წლის 1 ივლისს, 80 წლის ასაკში გარდაიცვალა.
დღეისთვის აბსოლუტური რეკორდი ჯენიფერ ლოურენსს ეკუთვნის – ის მხოლოდ 23 წლის იყო, როდესაც 2014 წლის იანვარში ოსკარის ნომინანტთა შორტ-ლისტში მოხვდა. მანამდე ის ნომინირებული იყო საუკეთესო მსახიობი ქალის ნომინაციაზე ფილმისთვის Winter’s Bone (2011) და The Silver Linings Playbook (2013) შესრულებული როლებისთვის.
აღსანიშნავია, რომ პროფესიული წარმატებების გარდა, ტიმოთი შალამეს პირადი ცხოვრება, განსაკუთრებით, კაილი ჯენერთან რომანი ონლაინ სივრცეში ხშირად განიხილება. Critics Choice Awards-ის დაჯილდოების ცერემონიაზე საუკეთესო მსახიობის ჯილდოს მიღებისას შალამემ სცენიდან მადლობა გადაუხადა „პარტნიორს, რომელიც მის გვერდით უკვე სამი წელია“ და დაამატა, რომ მის გარეშე ამ წარმატებას ვერ მიაღწევდა. მიუხედავად იმისა, რომ მსახიობს კაილი ჯენერის სახელი არ უხსენებია, უცხოური მედია ერთხმად წერს, რომ ეს სიტყვები სწორედ მას ეკუთვნოდა.
ასევე დაგაინტერესებთ
