ახლა ზუსტად ის დროა, როცა საახალწლო სუფრისთვის მზადება და ფუსფუსი აქტიურ ფაზაში გადადის. ყველას გვსურს გავამზადოთ სუფრისთვის ისეთი კერძი, რომელიც თან მარტივი იქნება, თან გემრიელი, ბიუჯეტური, და რაც მთავარია − განსხვავებული. სწორედ ამიტომ, OK! გთავაზობთ თქვენთვის კარგად ცნობილი და საყვარელი შეფების საახალწლო რეცეპტებს, რომლებიც დარწმუნებულები ვართ თქვენი ოჯახის წევრებს ძალიან მოეწონებათ. ეს კერძები თქვენს საახალწლო სუფრას ორიგინალურსა და დახვეწილს გახდის. ასევე, მოგიყვებით თითოეული შეფის რესტორნის საახალწლო სპეციალურ შეთავაზებაზე. საახალწლო სუფრა წარმოუდგენელია ქართულ მინერალურ სასმელ „ბორჯომის“ გარეშე.
ჟურნალი OK! და „ბორჯომი“ დიდი შეფის სამზარეულოში შეგახედებთ.
შეფ გურამ ბაღდოშვილს რესტორანში „ჩვენი“ ვესტუმრეთ. მან პორტუგალიაში ცნობილი საშობაო დესერტი მოგვიმზადა, რომელიც მარტივი და ძალიან გემრიელია.
გამოდის 4 ადამიანზე
მომზადების დრო: 20 წუთი
სირთულე − მარტივი
ეს კერძი ქართული „ყიყლიყოს“ ანალოგია.
ჩვენ დაგვჭირდება:
ტოსტის პური
1 კვერცხი
2 კვერცხის გული
შაქარი, მარილი, ვანილის პუდრი, დარიჩინი
1 ბანანი
ნახევარი ჭიქა რძე
ფრანგული კრემი და სასურველი კენკრა.
პორტუგალიურ დესერტს გურამმა საკუთარი შტრიხები დაამატა. ტოსტის პური უნდა ამოვავლოთ კვერცხში, რომელსაც ემატება შაქარი, რძე, დარიჩინი, ვანილის პუდრი. შემდეგ, ცხიმწასმულ ტაფაზე, რომელსაც ცოტა ზეთიც აქვს და კარაქიც, ვათავსებთ ორივე მხრიდან და ვწვავთ. ამის შემდეგ კარაქში ვწვავთ ბანანს. სანამ ჩვენი პორტუგალიური ტოსტის პურები ცხელია, ვასხამთ ამ მასას. ბოლოს ვასხამთ შაქრის ვაჟინს და ლიმონის წვენს. ჩვენი დესერტის სულ ბოლო შტრიხია საფერავის რედუქცია, მსხალი, დაფნის ფოთოლი და ანისის ვარსკვლავი.
ამ კერძს პორტუგალიაში საშობაოდ ყველა ოჯახი ამზადებს.
