ჩვენი ვიდეორუბრიკის – OK! ჭიქა ღვინოსთან სტუმრები არიან ახალგაზრდა, ყველასთვის საყვარელი მსახიობები გივიკო ბარათაშვილი და ნინა ლორთქიფანიძე. ისინი ჩვენთან ინტერვიუში ისაუბრებენ ახლა უკვე ყველასთვის ცნობილ ქართულ თრილერზე – უხილავ თამაშზე და მის გადასაღებ სამუშაო პროცესსზე.
გივიკო, პირველ რიგში, გვითხარი ვინ არის გმირი, რომელსაც შენ ასახიერებ?
გმირს ქვია ნიკოლოზ მეში. იგი არის როგორც ცნობილი რეპერი, ასევე მწერალი და არის ნარკოდამოკიდებული. მე არ ვგავარ მას, თუმცა პროცესში რა თქმა უნდა ბევრი საერთო ვიპოვე მასთან…
ნინა, ვინ არის სოფია გილგა?
სოფია გილგაც არის მწერალი. ოღონდ გივიკოს პერსონაჟისგან განსხვავებით, დამწყებია. სერიალში ისეა გაკეთებული, რომ ბევრი მკითხველი ჰყავს და თანდათან ხდება პოპულარული.
გივიკო, მართალია რომ სერიალში შენ თვითონ დაწერე რეჩიტატივი?
კი, ეგრეა ნამდვილად. ბევრი ვერსია იყო ვის უნდა დაეწერა, ასევე, ვიფიქრეთ, თუ რაზე უნდა გარეპა ჩემს გმირს. სიყვარულზე ალბათ არ გარეპავდა, არც სოციალურ თემებზე, ამიტომაც სოსოს იდეით შევჯერდით დისებზე.
ნინა, გადასაღებ მოედანზე შესვლამდე წაიკითხე უხილავი თამაში წიგნი თუ მას შემდეგ?
ჯერ წიგნი წავიკითხე, შემდეგ შევედი სკრიპტით გადასაღებ მოედანზე. მინდა აღვნიშნო, რომ წიგნი და სერიალი ერთმანეთისგან განსხვავდება, ამიტომაც ვისაც წაკითხული აქვს, ხელი არ უნდა ჩაიქნიონ.
ვინ არიან სერილის რეჟისორები?
ნინა: რეჟისორები არიან გიორგი ქადაგიძე და სოსო ბლიაძე. რეალურად ძალიან რთულია, რომ ერთ სერიალზე ორმა რეჟისორმა იმუშაოს, ერთი აზრები ჰქონდეთ, მაგრამ ამ ორი ადამიანის საოცარი მიქსი მოხდა.
გივიკო, წარმოაჩინო გმირი ისე, რომ არ მოხდინო ნარკოტიკის პოპულარიზაცია, ძალიან რთულია, როგორ ახერხებ რომ თავი აარიდო პროპაგანდას?
ძალიან რთულია ეგ და რა თქმა უნდა, მაგას მარტო მე ვერ ვახერხებ. აქ ჩართულები არიან რეჟისორები. თუმცა იმის თქმაც შემიძლია, რომ ჩემი პერსონაჟი გარკვეულ ტრანსფორმაციას გადის, ამიტომ არ არის მხოლოდ ისე რმ ნარკოდამოკიდებულია და მორჩა.
გივიკო, როგორი არის სოფია?
მისტიურია, ეს არის ყველაზე მნიშვნელოვანი, რადგან სერიალიც თავად მისტიკის ჟანრს განეკუთვნება.
ნინა, დაგვიხასიათე, როგორი არის გივიკოს გმირი?
მე ვფიქრობ, რომ გივიკოს პერსონაჟიც, ნიკოლოზ მეშიც, მიყვება მაგ მისტიურობას. პოსტერიდანაც ჩანს რომ ერთი მთლიანის ნახევრები ვართ…
