სოფიო ხიზანიშვილმა ჯერ კიდევ პატარაობისას იცოდა, რომ ყველაზე დიდ ბედნიერებას რაიმე ახლის შექმნა ანიჭებდა. ჯერ იყო ახალი აქსესუარის დამზადება, შემდეგ ინტერიერის გაფორმება და ბოლოს − ღონისძიებების ორგანიზება. დღეს უკვე თავისი კომპანია − sophinas event styling აქვს, რომელიც საზოგადოებას სთავაზობს მნიშვნელოვანი დღის დაგეგმვა-ორგანიზებას.
როგორ გაჩნდა sophinas event styling-ის დაარსების იდეა?
ბავშვობიდან მიყვარდა ინტერიერისა თუ ექსტერიერის მოწყობა, გაფორმება. ვაკეთებდი ხელნაკეთ სამკაულებს, აქსესუარებს, სხვადასხვა ნივთს… ძალიან დიდ სიამოვნებას მანიჭებდა რაიმე ახლის შექმნა. შემდეგ უკვე, ზრდასრულ ასაკში მივხვდი, რომ ძალიან მომწონს სხვადასხვა ღონისძიებისა თუ წვეულების გაფორმება. როდესაც ჩემი ძველი ნაცნობისგან პირველი შემოთავაზება მივიღე, მეცადა ამ სფეროში ბედი და ქორწილი გამეფორმებინა, მაშინ მივხვდი რომ ეს შანსი არ უნდა გამეშვა ხელიდან. მას მერე კი არც გავჩერებულვარ და მივხვდი, რომ ეს არის საქმე, რომლის კეთება უდიდეს ბედნიერებას მანიჭებდა. ახლა კი უკვე მაქვს ჩემი კომპანია − sophinas event styling.
რა სახის მომსახურებას სთავაზობს კომპანია მომხმარებელს?
ჩვენ ვთავაზობთ მომხმარებლებს იუბილეს, ქორწილის, კორპორაციული წვეულებისა და სხვადასხვა ღონისძიების დაგეგმვას, ორგანიზებასა და დიზაინს, როგორც თბილისში, ისე საქართველოს ნებისმიერ კუთხეში და რაც მთავარია, სულსა და გულს, რომელიც მაქსიმალურად იხარჯება მათი ბედნიერებისთვის.
რამდენად დიდია კონკურენცია ბაზარზე?
ბოლო პერიოდში საკმაოდ ბევრი კომპანია გამოჩნდა, მაგრამ ვერ ვიტყვი, რომ კონკურენცია დიდია. ყველას თავის დამახასიათებელი სტილი და ხედვა აქვს, შესაბამისად, თითოეულს თავისი მომხმარებელი ჰყავს. პირადად მე, 10-ზე მეტ ივენთ-კომპანიას ვიცნობ და ძალიან თბილი, კოლეგიალური ურთიერთობა გვაქვს. შეიძლება ითქვას, რომ ერთმანეთს ყოველთვის მხარში ვუდგავართ, როცა ამის საჭიროებაა.
გვესაუბრეთ თქვენი კომპანიის უპირატესობებზე.
ძალიან მიყვარს ხალხთან ურთიერთობა, ყოველთვის ვცდილობ ზუსტად გავიგო დამკვეთის გემოვნება და სურვილი. აუცილებელია იცოდე, რა სურს დამკვეთს, რათა მათი მოლოდინი გაამართლო და მათი სურვილები განახორციელო. აქედან გამომდინარე, მომხმარებელთან ურთიერთობას ძალიან დიდ დროს ვუთმობთ, რასაც დამკვეთებიც ხშირად აღნიშნავენ.
ვცდილობთ მუდმივად განვვითარდეთ და არ ჩამოვრჩეთ ტენდენციებს, ამიტომაც შეძლებისდაგვარად ხშირად ახლდება ინვენტარი და დეკორაციების დიზაინი, რისთვისაც არ ვზოგავთ არც ფინანსებს და არც ენერგიას. მყავს ძალიან მშრომელი, პროფესიონალი და ერთგული გუნდი, რომლებსაც თამამად ვენდობი და ვეყრდნობი, რაც ჩემთვის ერთ-ერთი მთავარი და დიდი უპირატესობაა.
ვინ არიან თქვენი დამკვეთები? მხოლოდ ადგილობრივ დამკვეთებს ემსახურებით?
ძირითადად, ჩვენი დამკვეთები საქართველოს მოქალაქეები არიან, მაგრამ ხშირია უცხოელი წყვილებიც, რომლებსაც უფრო მეტი სითამამე და ნაკლები კონსერვატიულობა ახასიათებთ. მეტწილად გვაქვს ქორწილები. ამ საქმიანობის ყველაზე დიდი პლუსია მონაწილეობას იღებდე ადამიანებისათვის უმნიშვნელოვანესი დღის დაგეგმვასა და განხორციელებაში, და იზიარებდე მათ ბედნიერებას.
სამომავლო გეგმები…
ჩვენი სამომავლო გეგმები უფრო მასშტაბურ თემებზე გადასვლა და ადამიანებისათვის ყველა მომსახურების „ერთ სივრცეში“ შეთავაზებაა. ჩემი დიდი სურვილია, მქონდეს ივენთებისთვის განკუთვნილი სივრცე. გვაქვს ბევრი განუხორციელებელი იდეა-დიზაინი, რომლებსაც იმედია მალე ფრთებს შევასხამთ.
