აშშ-ში საღამოს შოუების რაოდენობა მცირდება – ცნობილი ამერიკელი ტელეწამყვანი ჯიმი კიმელი ტელეკომპანია ABC-ს ეთერიდან მას შემდეგ მოხსნეს, რაც მან განაცხადა, რომ რომ „MAGA-ბანდა“, ანუ ტრამპის მხარდამჭერები, ცდილობენ კირკის მკვლელობის თემით პოლიტიკური ქულები მოიპოვონ.
გარდა ამისა, კიმელმა ტრამპის გადაწყვეტილებაც გააკრიტიკა, რომელიც კირკის ხსოვნის ნიშნად, ქვეყნის მასშტაბით, სახელმწიფო უწყებებში დროშების დაშვებას გულისხმობდა და თავად პრეზიდენტიც უდიერად მოიხსენია.
კიმელის განცხადების შემდეგ, თითქმის მაშინვე ამერიკის უდიდესმა სატელევიზიო ქსელმა Nexstar-მა „Jimmy Kimmel Live“-ის ტრანსლაციაზე უარი თქვა. Nexstar-ს ქვეყანაში თითქმის 200 სატელევიზიო სადგური ეკუთვნის და ყველა მთავარი ეროვნული არხის გადაცემებს ავრცელებს.
Nexstar-ის გადაწყვეტილების შემდეგ ABC-მაც გამოაცხადა, რომ კიმელის შოუ ეთერიდან მოიხსნა. „პროგრამა Jimmy Kimmel Live-ის გამოსვლა განუსაზღვრელი დროით შეჩერდა“ — ვკიხულობთ კომპანია Disney-ს მფლობელობაში მყოფი ABC-ს პრესსამსახურის განცხადებაში.
ჟურნალ The Rolling Stone-ის წყაროების ცნობით, არხის ზოგიერთი ტოპ-მენეჯერი დახურულ შეხვედრებზე აღნიშნავდა, რომ წამყვანს ისეთი არაფერი უთქვამს, რის გამოც მისი შოუ უნდა დაეხურათ, მაგრამ უშედეგოდ.
ჯიმი კიმელი ბოლო ორი თვის მანძილზე უკვე მეორე ტელეწამყვანია, რომელსაც ტრამპთან და მის მომხრეებთან კონფლიქტის შემდეგ გადაცემა დაუხურეს.
ორი თვის წინ, ივლისში, ცნობილი გახდა კიდევ ერთი პოპულარული საღამოს შოუს — „The Late Show სტივენ კოლბერისთან ერთად“ დახურვის შესახებ. CBS-მა გადაწყვეტილება ფინანსური პრობლემებით ახსნა, მაგრამ ეს არავის სჯერა. საქმე ის არის, რომ შოუს დახურვის წინა დღეს კოლბერმა არხის მფლობელი კომპანია Paramount ეთერში დაადანაშაულა, რომ მან ტრამპს 16 მილიონი დოლარი ქრთამად მისცა, რომ კომპანიის გაყიდვას დათანხმებოდა.
დონალდ ტრამპმა, რომელიც ხშირად საჯაროდ გამოხატავდა უკმაოფილებას კოლბერის ხუმრობების გამო, მისი შოუს დახურვით ძალიან გაიხარა. „როგორც გავიგე, ჯიმი კიმელი შემდეგია“ – აღნიშნა მან.
14 სექტემბერს აშშ-ში ამერიკის სატელევიზიო პრემია „ემის“ დაჯილდოების ცერემონია გაიმართა. ნომინაციაში „საუკეთესო თოქ-შოუ“ წარდგენილნი იყვნენ როგორც კოლბერი, ისე კიმელი. The Late Show-ის დახურვის შემდეგ, კოლბერის გამარჯვება ფაქტობრივად, გადაწყდა. კიმელმა ჰოლივუდში ბილბორდიც კი იქირავა თავისი ფოტოთი და წარწერით: „მე ხმას ვაძლევ სტივენს“.
კიმელის შოუ ეთერში 23 სეზონი გადიოდა. უფრო ხანგრძლივი ისტორია — 30 სეზონი (1962–1992) მხოლოდ ჟანრის დამფუძნებელ ჯონი კარსონს ჰქონდა. სხვებისგან განსხვავებით ამ შოუს ნიუ-იორკიდან კი არა, ლოს-ანჯელესიდან გადასცემდნენ, რაც მის „ჰოლივუდურ“ მიმართულებას განსაზღვრავდა.
პოლიტიკურ თემებზე 2016 წლამდე კიმელი იშვიათად ხუმრობდა. არჩევნებში ტრამპის გამარჯვების შემდეგ თითქმის ყველა საღამოს შოუ, მათ შორის კოლბერის და კიმელის, პოლიტიზებული გახდა, ისევე, როგორც თითქმის ყველაფერი ამერიკაში.
„Jimmy Kimmel Live“-ის ეთერიდან მოხსნის შემდეგ, შოუს მხარდასაჭერად ისეთი გავლენიანი ჰოლივუდური ინსტიტუტები გაერთიანდნენ, როგორიცაა სცენარისტთა გილდია და კინომსახიობთა გილდია, ასევე უამრავი მსახიობი, კომიკოსი, ჟურნალისტი და პოლიტიკოსი. მათი თქმით, აშშ-ის კონსტიტუციის პირველი შესწორება, რომელიც სიტყვის თავისუფლებას იცავს, პრეზიდენტს უფლებას არ აძლევს მისთვის მიუღებელი გადაცემები დახუროს, ამიტომ ის სხვა გზას მიმართავს და მის ხელში არსებულ სახელმწიფო ბერკეტებს (ამ შემთხვევაში — ფედერალურ კომუნიკაციების კომისიას) იყენებს, რომ მედია-კორპორაციებზე ზეწოლა მოახდინოს. საკუთარ შემოსავლებზე მზრუნველ კორპორაციებს ტრამპთან კონფლიქტი არაფერში სჭირდებათ, ამიტომ ცენზურას თავადვე ახორციელებენ.
