OK! Decor Book გაგაცნობთ ინტერიერის დიზაინერ ანი მაჭავარიანს, რომელმაც საკუთარი კომპანია Architecture AM დააფუძნა და დამკვეთებისთვის მათზე მორგებულ კომფორტულ გარემოს ქმნის. სწორედ ამიტომ მომხმარებლებსა და სამუშაო სივრცეს მაქსიმალურად საფუძვლიანად ეცნობა, ისმენს მათ მთავარ მოთხოვნებს, სურვილებს და მხოლოდ ამის შემდეგ იწყებს პროექტზე მუშაობას. ჟურნალი OK! პირადად ესაუბრა ანის კომპანიის საქმიანობის შესახებ.
უპირველესად გაგვეცანით. რამდენი ხანია, რაც ამ საქმიანობით ხართ დაკავებული? პირველად როდის გაგიჩნდათ ინტერესი არქიტექტურის მიმართ?
გამარჯობა, მე ვარ ანი მაჭავარიანი, დიზაინერი, სტუდია Architecture AM-ის დამფუძნებელი.
თავდაპირველად 10 წლის ასაკში გამიჩნდა ინტერესი არქიტექტურის მიმართ, სწორედ ამ მიმართულებით მივიღე განათლება უმაღლეს სასწავლებელშიც. ოდნავ მოგვიანებით კი ჩემთვის მეტად საინტერესო გახდა ინტერიერის დიზაინი და განვითარება ამ კუთხით გადავწყვიტე.
როგორ დაიწყო თქვენი კარიერის განვითარება?
ჩემი კარიერა დაიწყო სამშენებლო კომპანია „დემაქს ჯგუფში“, სადაც საკმაოდ დიდი გამოცდილება დავაგროვე.
მალევე გადავწყვიტე კერძო შეკვეთებზე მუშაობა და ოდნავ მოგვიანებით უკვე კომპანიაც დავაარსე, სადაც ამ ეტაპზე ჩემთან ერთად უკვე 5 დიზაინერი მუშაობს.
იქიდან გამომდინარე, რომ მომხმარებლებს სურდათ დახმარება გაგვეწია სარემონტო სამუშაოების დროს, ამ კუთხითაც გადავწყვიტე განვითარება.
ამიტომ რიგ შემთხვევებში, დიზაინის შექმნის შემდეგ, სრულად ვიბარებთ სარემონტო სამუშაოებს.
როგორია თქვენი მუშაობის სპეციფიკა?
კარგად ვიაზრებთ, რომ ჩვენი მთავარი ამოცანაა, დამკვეთებისთვის შევქმნათ მათზე მორგებული კომფორტული გარემო, სწორედ ამიტომ პროექტზე მუშაობის დაწყებამდე მომხმარებლებსა და სამუშაო სივრცეს მაქსიმალურად საფუძვლიანად ვეცნობით. ვისმენთ მათ მთავარ მოთხოვნებს, სურვილებსა და აზრებს. ამის გათვალისწინებით საშუალება გვაქვს, ყველა პროექტი ინდივიდუალური და საინტერესო იყოს.
რა გაძლევთ შთაგონებას? რა გიყვართ ყველაზე მეტად თქვენს პროფესიაში?
ჩვენს საქმეში უდიდეს როლს ასრულებს შთაგონება, რომლის წყალობითაც რაღაც ინოვაციურს, საინტერესოს, ესთეტიკურს ვქმნით. ყოველი ახალი დამკვეთი ახალი გამოწვევა, ახალი იდეები და ახალი მისწრაფებაა. ის ფაქტი, რომ ჩვენს მომხმარებლებს ვეხმარებით მათზე მორგებული გარემოს სრულყოფაში, საბოლოოდ ყველაზე დიდი მუხტია მუშაობის პროცესში. სწორედ ეს ყველაფერი განაპირობებს ჩვენი საქმისადმი დიდ სიყვარულს.
არის პროექტი, რომელზეც სიამოვნებით იმუშავებდით?
ჩემთვის და ჩემი გუნდისთვის ყველანაირი პროექტი სასიამოვნოა.
გუნდის წევრებისა და სამუშაო გარემოს შესახებ მოგვიყევით.
(ლიკა გეწაძე – კომპანიის მენეჯერი): ჩვენი პატარა კომპანია ძალიან მალე გაიზარდა და ერთ დიდ ოჯახად ჩამოყალიბდა, სადაც ყველას მოსწონს თავისი საქმე. სწორად გადანაწილებული მოვალეობებით ვახერხებთ ერთობლივად ბევრ პროექტზე მუშაობას, როგორც ინტერიერის დიზაინის, ასევე სარემონტო სამუშაოების კუთხით.
ჩვენი გუნდის თითეული წევრი შთაგონებითა და მოტივაციით სავსე ინდივიდია, რომელთაც ერთი საქმის სიყვარული აერთიანებს. ამიტომ ჩვენს ოფისში ყოველთვის კარგი ატმოსფერო სუფევს.
თითოეული წარმატებით დასრულებული პროექტი კი მთელი გუნდისთვის კიდევ ერთი წინ გადადგმული ნაბიჯი და უდიდესი მოტივაციაა.
სამომავლო გეგმები.
(ლელა აშკარელიშვილი – კომპანიის აღმასრულებელი დირექტორი): ჩვენი კომპანია დღითი დღე იზრდება როგორც რაოდენობი,ს ასევე გამოცდილების მხრივ. აქამდე დასახულმა გეგმამ საკმაოდ კარგ შედეგებამდე მოგვიყვანა და, რა თქმა უნდა, თითოეული ჩვენგანი ყველა შესრულებული პროექტით ვამაყობთ. სამომავლოდ კი ვგეგმავთ, უფრო მასშტაბურ პროექტებზე გადავერთოთ და არ შევუშინდეთ ახალ გამოწვევებს. უკვე არაერთხელ დავამტკიცეთ, რომ ჩვენი შესაძლებლობები უსაზღვროა და ამ კურსიდან გადახვევას არ ვაპირებთ.
