„ანაპეა“ საოჯახო ბიზნესად ქცეული ცხოვრების წესია. აქ წარმოდგენილი ბუნებრივი ღვინო არ არის რაიმე ჩარჩოში ან სტანდარტში მოქცეული – ღვინის ეს სახეობები, თავისი ბუნებით, ნამდვილი, ცოცხალი და თავისუფალია. ღვინის არომატში იგრძნობა ის ბუნება, სადაც ეს ღვინოა დამზადებული.თითოეულს ინდივიდუალური, გამოხატული ხასიათი და თვისება აქვს, რაც ამ სახეობების განსაკუთრებულობას და დახვეწილობას უსვამს ხაზს. დეტალური ინფორმაციისთვის OK! გაესაუბრა „ანაპეას“ შემქმნელს, ხატია დარგუაშვილს.
გვიამბეთ „ანაპეას” შექმნის ისტორია.
„ანაპეა“ ოჯახური ბიზნესია, რომელიც დავაარსეთ 2014 წელს, მას შემდეგ, რაც შევიძინეთ სრულიად არა კულტურული, მიტოვებული მიწა ყვარლის რაიონში, მისიით, რომ შეგვექმნა ეკოსისტემა, გვეწარმოებინა ბუნებრივი/ნატურალური ღვინო, აღგვედგინა ნამდვილი კახური სოფელი, თავისი მეურნეობით, ვენახით, მარნით და საცხოვრებელი სახლებით. მნიშვნელოვანი ფაქტორი თბილისის ქაოსს მოწყვეტა და ბუნებასთან დაკავშირება იყო. პირველი, რაც გავაკეთეთ, დავიწყეთ მიწის, ნიადაგის გამოცოცხლება, რადგან გვჯერა, რომ ღვინის საწყისი მიწაშია. დავიწყეთ მასზე ზრუნვა, რათა აღგვედგინა ნიადაგის ბუნებრივი ბალანსი და მდგომარეობა.
გვესაუბრეთ თქვენთან წარმოდგენილი ღვინის ფართო ასორტიმენტზე.
გავაშენეთ 7 უძველესი კახური ვაზის ჯიში: ქისი, ხიხვი, ვარდისფერი რქაწითელი, მწვანე, რქაწითელი, მცვივანი და საფერავი. გარდა ამისა, რითაც ძალიან ვამაყობთ, ძველი ქართული ჯიშების აღსადგენად და საილუსტრაციოდ გავაშენეთ იშვიათი, საკოლექციო 33 ვაზის ჯიში, როგორიცაა:
ოქროულა, საფენა, ინგილოური, ბუერა, იყალთოს წითელი, ღრუბელა და ა.შ.
შევქმენით ეკოსისტემა, რომელიც სრულიად დაცლილია ქიმიური დანამატებისგან, პესტიციდებისგან, ჰერბიციდებისგან, როგორც ვენახში, ასევე ღვინოში.
გვესაუბრეთ „ანაპეას“ ვენახების შესახებ.
ვენახები გვაქვს კახეთის ტერიტორიაზე, ყვარელსა და საგარეჯოში. მიწის სპეციფიკიდან გამომდინარე, სხვადასხვა ტერიტორიაზე სხვადასხვანაირი ღვინო გამოდის. ნაბიჯ-ნაბიჯ, ბუნებისგან ვსწავლობდით და ვსწავლობთ მეღვინეობას, მევენახეობას, რადგან ის თავად გვკარნახობს, თუ რა არის გასაკეთებელი. ყველაფერს თავისი ციკლი და დრო აქვს. გარდა ამისა, ღვინის დასაყენებლად, ისევე, როგორც დაძველებისთვის, ვიყენებთ მხოლოდ ქვევრს.
სად არის შესაძლებელი თქვენი ღვინის შეძენა?
ჩვენ ძირითადად ორიენტირებულები ვართ ექსპორტზე, თუმცა საქართველოშიც, რამდენიმე რესტორანში ღვინო აქტიურად იყიდება. შესაბამისად, ჩვენი ღვინის შეძენა შესაძლებელია როგორც რესტორანში „შავი ლომი“, ასევე „ნინიას ბაღში“.
რას ანიჭებთ უპირატესობას ღვინის შექმნის დროს?
უპირატესობა ბუნებრივ ღვინოს ენიჭება. ნატურალური ღვინო ფილოსოფიაა, ცხოვრების წესია, ვიდრე რაიმე კარგად განსაზღვრული, გაწერილი კატეგორია. ჩვენ გვაქვს რწმენა, რომ მიწა არის ყველაზე მნიშვნელოვანი ფაქტორი, რგოლი, შთამბეჭდავი ღვინის დაყენებისას. არ გამოვიყენებთ ქიმიურ პრეპარატებს, არავითარ პესტიციდს და ჰერბიციდს. ეს, რა თქმა უნდა, მეტ შრომას მოითხოვს, მაგრამ ვფიქრობთ, ეს შრომა აისახება ჩვენი ღვინის სახეობების ხარისხზე. ბუნებრივი ღვინო ცოცხალია, ნამდვილია, აქვს იმ ყურძნის გემო, რომლისგანაც მზადდება და იმ ადგილის არომატი, სადაც მოდის. ყველას თავისი ინდივიდუალური, გამოხატული ხასიათი და თვისება აქვს, არ ჰგვანან ერთმანეთს. ყველა მათგანს, 39-ივეს სხვადასხვა ბუნება აქვს. ჩვენ არ ვერევით, არ ვცდილობთ გადავაკეთოთ მათი ბუნება და ხასიათი, ვაძლევთ საშუალებას, იყვნენ ნამდვილი.
როგორია თქვენი სამომავლო გეგმები?
გაზაფხულზე ვგეგმავთ ჩვენი პროექტის დასრულებას. გაიხსნება სასტუმრო, თუმცა ეს არ იქნება სტანდარტული სახის. ვაშენებთ კახურ სოფელს, ნამდვილს, როგორიც იყო საუკუნის წინ. 2 ჰექტარ ტერიტორიაზე შენდება სხვადასხვა ტიპის კახური სახლი, ყველა სახლს ექნება საკუთარი ეზო, სადაც სტუმრები თავად შეძლებენ მოყვანილი ბოსტნეულისა თუ ხილის მოკრეფას. ცალკეა სარესტორნო, სადეგუსტაციო, საკონფერენციო და საკონცერტო სივრცე, რომელიც განთავსებულია შუა ვენახში და სადაც ჩატარდება სხვადასხვა ღონისძიება. გვინდა ვუმასპინძლოთ ჯაზის, კლასიკური მუსიკის ფესტივალებსა თუ კონცერტებს. პროექტში ასევე გათვალისწინებულია ღვინის მუზეუმი, სადაც სტუმრები გაეცნობიან ღვინის მიგრაციის ისტორიას, ღვინის დაყენების უწყვეტ ტრადიციულ მეთოდებს და იმოგზაურებენ დროში. ბავშვებისთვის ნამდვილ ჯადოსნურ სამყაროს ვქმნით.
საკონტაქტო ინფორმაცია:
Facebook: ანაპეა • Anapea
Instagram: anapea_village
ტექსტი: ნინი ჯიბლაძე
ფოტო: მაკა მეგრელიძე
