სიმართლე გითხრათ, ჟურნალის მოწვეულ რედაქტორებად მე და ქეთო პირველად ვართ, თუმცა თუ გავითვალისწინებთ იმას, რომ უკვე 2 საავტორო კულინარიული წიგნი გვაქვს გამოშვებული და მესამეზე ვმუშაობთ, ასევე, ჟურნალ ფოკუსში/RESTორატორში 1 წლის განმავლობაში ვწერდით გასტრონომიული თემატიკის სტატიებს, რედაქტირება და ბეჭდურ მედიასთან ურთიერთობა ჩვენთვის ძალიან ახლოა. თუმცა, იყო მთელი ნომრის ხარისხსა და შინაარსზე პასუხისმგებელი, მაინც სხვა სპეციფიკა და გამოწვევაა.
როცა თემებზე ფიქრი დავიწყეთ, ავტომატურად გაგვიჩნდა სურვილი, ჩვენთვის საინტერესო ყველა ამბავი წამოგვეწია, რაც მკითხველისთვის ახალი და შემეცნებითი იქნებოდა. გვინდოდა, მკითხველს გაეცნო გასტრონომიულ სფეროში მომუშავე საინტერესო ადამიანები, მათი ისტორიები და შემოქმედება. ამ ნომერში შეხვდებით ცნობილ შეფებს, გასტრომკვლევრებს, ე.წ. FOOD-ფოტოგრაფებს, პოდკასტერებს; მოისმენთ მათ სასარგებლო რჩევებს, სამომავლო გეგმებს, მათი ცხოვრებისა თუ შემოქმედების სირთულეებს და ძირითად გამოწვევებს, რაც ქმნის დღევანდელ გასტრონომიულ ატმოსფეროს ჩვენს ქვეყანაში.
აჩო ზამბახიძე და ქეთო პაპავა
