ქართველი რეჟისორი, სცენარისტი და პროდიუსერი ლევან კოღუაშვილი „ოქროს გლობუსის“ ნოვატორის ჯილდოს (Golden Globes Trailblazer Award) მიიღებს. ჯილდო მას კინემატოგრაფიაში შეტანილი წვლილისთვის გადაეცემა. დაჯილდოების ცერემონია 23-24 ოქტომბერს უზბეკეთის დედაქალაქ ტაშკენტში გაიმართება.
ღონისძიება – Golden Globes Silk Road Tribute Gala – ისტორიული აბრეშუმის გზის რეგიონის კინოსა და ტელევიზიის სფეროს წარმომადგენელთა მიღწევებს ეძღვნება. გალა-ღონისძიებაზე ცენტრალური აზიისა და კავკასიის ხუთი ქვეყნის – უზბეკეთის, ყაზახეთის, აზერბაიჯანის, საქართველოსა და სომხეთის – წარმომადგენლებს სამ კატეგორიაში დააჯილდოებენ.
„ოქროს გლობუსის“ პრეზიდენტის, ჰელენ ჰონეს განცხადებით, დაჯილდოების მიზანი იმ ხელოვანთა აღიარებაა, რომელთა შემოქმედებაც ცენტრალური აზიისა და კავკასიის კულტურას და უნიკალურ ისტორიებს საერთაშორისო აუდიტორიას აცნობს.
ლევან კოღუაშვილმა მსოფლიო აღიარება ისეთი ფილმებით მოიპოვა, როგორებიცაა „ქუჩის დღეები“, „ბრმა პაემნები“ და „მეოთხე ბრაიტონი“. ამ უკანასკნელმა ტრაიბეკას კინოფესტივალზე საუკეთესო საერთაშორისო მხატვრული ფილმის ჯილდო მიიღო.
რეჟისორის უახლესი ნამუშევრის, „გურიას“, პრემიერა 2026 წლის ვენეციის საერთაშორისო კინოფესტივალზე შედგა. ფილმი „ოსკარის“ ნომინაციაზე საქართველოს ოფიციალური კანდიდატია.
ასევე დაგაინტერესებთ:
#OK! საქართველოს სახელით „ოსკარზე“ ლევან კოღუაშვილის ფილმი „გურია“ წარდგება
