ჩვენი რუბრიკის სტუმარი და OK! Fashion Book-ის მოწვეული რედაქტორი კოსტიუმების მხატვარი თინათინ კვინიკაძეა. მისი ხელმძღვანელობით, ჟურნალის მკითხველი ძალიან საინტერესო და მნიშვნელოვან თემებს გაეცნობა, მანამდე კი აუცილებლად უნდა წაიკითხოთ ინტერვიუ, სადაც თინათინმა გვიამბო, თუ როგორ დაიწყო მისი კარიერა, რას საქმიანობს ამ ეტაპზე, როგორია მისი ყოველდღიურობა… და ცოტაც Fashion Book-ის შესახებ, რომლის ხელმძღვანელობითაც კიდევ ერთი საინტერესო ნომერი შეემატა ჟურნალ OK!-ის.
თინათინ, აპრილის თვეში გამოვიდა ჟურნალ OK!-ის დამატება Fashion Book, რომლის მოწვეული რედაქტორიც თქვენ ხართ. გვესაუბრეთ ამ გამოცდილების შესახებ, რამდენად საინტერესო იყო მუშაობის პროცესი?
ჩემთვის ეს გამოცდილება პირველია. არასოდეს ვყოფილვარ მსგავს ამპლუაში და ნამდვილად ძალიან საინტერესო და საპასუხისმგებლო აღმოჩნდა. ვეცადე, ყველა ის თემა გამეერთიანებინა, რაც ჩემთვის მნიშვნელოვანია, მკითხველამდეც საინტერესო ფორმით მიმეტანა და გამეზიარებინა. ვფიქრობ, ძალიან საინტერესო ნომერი გამოვიდა და ამაში მკითხველი თავად დარწმუნდება.
უფრო კონკრეტულად გვიამბეთ, რას წაიკითხავს მკითხველი OK! Fashion Book-ში?
ვინაიდან კინოს კოსტიუმების მხატვარი გახლავართ, ვაკეთებ თეატრის კოსტიუმებს, ვარ „აჭარა ჯგუფის“ უნიფორმების დიზაინერი და ვხელმძღვანელობ სამკერვალოს. ასევე, მაქვს „როუზ მოდა“, რომელიც „ო, მოდა, მოდა“-ს გაგრძელებაა. ეს ყველაფერი, რა თქმა უნდა, პირდაპირ კავშირშია მოდასთან, ამიტომ, ჩემი პროფესიიდან და ჟურნალის კონცეფციიდან გამომდინარე, ვეცადე მაქსიმალურად მრავალფეროვანი და საინტერესო თემები შეგვეთავაზებინა მკითხველისთვის. ვფიქრობ, თითოეული საკითხი დიდ ინტერესს გამოიწვევს და სასიამოვნო შთაბეჭდილებებსაც მოახდენს.
რას საქმიანობთ ამ ეტაპზე?
მიუხედავად იმისა, რომ პანდემიიდან გამომდინარე, თითქოს ყველაფერი გაჩერებულია, სინამდვილეში მუდამ რაღაც ხდება. მაგალითად, ამ ნომრის გამოსვლასთან ერთად, იქნება მიშა ჩარკვიანის სპექტაკლის, ავგუსტ სტრინდბერგის „პელიკანის“ პრემიერა, სადაც მე ვარ კოსტიუმების მხატვარი და ეს ჩემთვის ძალიან მნიშვნელოვანი პრემიერაა. ეს პერიოდი ამ სპექტაკლზე ვმუშაობდით და ვემზადებოდით. შესაბამისად, მოლოდინი ძალიან დიდია.
გარდა ამისა, ორი მოკლემეტრაჟიანი ფილმი გადავიღეთ, რომლებიც მონტაჟის პროცესშია და ძალიან მალე იხილავს მაყურებელი. ასევე, „აჭარა ჯგუფში“ იგეგმება კიდევ რამდენიმე ახალი პროექტი, ამიტომ მუდმივი სამუშაო პროცესია. გარდა ამისა, უკვე ერთი წელია გვაქვს საკუთარი მაღაზიების ქსელი – The Shop, რომელიც ამ ეტაპზე სტამბაშია, „რუმს ყაზბეგში“ და „რუმს კოხტაში“. ასევე, The Shop დაემატება ყველა სასტუმროს, რომელიც იმედია ძალიან მალე გაიხსნება. პროდუქცია ძირითადად, კომპანიის ბაზაზე მზადდება.
რა მოგწონთ თქვენს პროფესიაში ყველაზე მეტად?
დიდი მოგზაურობა… სხვა პროფესიაზე თითქოს არასოდეს მიფიქრია. თავიდანვე, ეს იყო ჩემი ოცნება. არასოდეს მბეზრდება, მუდმივად საინტერესოა, ყოველი ახალი პროექტი და ფილმი ახალი თავგადასავალია. ძალიან გამიმართლა პროფესიაში. დიდ პასუხისმგებლობას, დისციპლინას, ცოდნას და შრომას მოითხოვს ეს საქმე, ისევე, როგოც ყველა დანარჩენი.
როგორია თქვენი ცხოვრება პროფესიის მიღმა?
ჩემს პროფესიას არ ვუყურებ ისე, როგორც სამსახურს. ერთი მთლიანი, ჰარმონიული დამოკიდებულება მაქვს პირად ცხოვრებასთან და პროფესიასთან. არ ვმიჯნავ ერთმანეთისგან.
რა არის თქვენთვის განტვირთვის საუკეთესო საშუალება?
ძალიან მიყვარს მზე და ზღვა. ვინაიდან ზღვაზე მუდმივად ყოფნას ვერ ვახერხებ, აუზით ვანაცვლებ ხოლმე – ჩემთვის განტვირთვის საუკეთესო საშუალებაა. ძალიან მიყვარს ფეხით სიარული, ასევე, ვცდილობ მაქსიმალურად ხშირად ვივარჯიშო. და რა თქმა უნდა, ჩემს დის შვილებთან ერთად დროის გატარება.
საყვარელი სტილი.
არ მიყვარს ტენდენციურობა – ის, რაც მოდაშია. მომწონს, როდესაც ადამიანს აქვს საკუთარი სტილი. ინდივიდუალურობა ყველა ფორმით მისასალმებელია. ქუჩაში სიარულის დროს, ყოველთვის ვაკვირდები ადამიანებს და ვამჩნევ, რომ ახალგაზრდა თაობას საკუთარი თავი აქვს ნაპოვნი – იმოსებიან კომპლექსების გარეშე და ეს ძალიან სასიამოვნოა.
ფოტო: მაკა მეგრელიძე
