Netflix-მა გრეტა გერვიგის ახალი ფილმის, Narnia: The Magician’s Nephew-ის პირველი ოფიციალური თრეილერი გამოაქვეყნა. ცნობილი ფენტეზის სამყაროს ახალი ეკრანიზაცია მაყურებელს ნარნიას წარმოშობის ისტორიას მოუყვება. ფილმში მთავარ როლებს დენიელ კრეიგი, კერი მალიგანი, ემა მაკი და მერილ სტრიპი ასრულებენ. კინოთეატრებში მისი პრემიერა 2027 წლის 12 თებერვალს შედგება.
გრეტა გერვიგი, რომელიც მაყურებელმა ფილმებით Lady Bird, Little Women და Barbie გაიცნო, ახალ პროექტში რეჟისორისა და სცენარისტის როლში გვევლინება. ეს მისი პირველი სრულმეტრაჟიანი ფილმია 2023 წლის შემდეგ.
გერვიგი „ნარნიას ქრონიკების“ დიდი ხნის თაყვანისმცემელია და არაერთხელ აღუნიშნავს, რომ წიგნებმა მის პიროვნულ ჩამოყალიბებაზე მნიშვნელოვანი გავლენა მოახდინა.
ფილმი ბრიტანელი მწერლის, კლაივ სტეიპლზ ლუისის, 1955 წელს გამოცემულ რომანს The Magician’s Nephew ეფუძნება. ეს „ნარნიას ქრონიკების“ ქრონოლოგიურად პირველი ნაწილია. ახალი ეკრანიზაცია მაყურებელს ჯადოსნური სამყაროს შექმნის ისტორიას მოუყვება.
მთავარ როლებში დენიელ კრეიგი, კერი მალიგანი, ემა მაკი და მერლ სტრიპი არიან.
განსაკუთრებულ ყურადღებას მერლ სტრიპის მონაწილეობა იპყრობს – ოსკაროსანი მსახიობი ლომ ასლანს გაახმოვანებს. რეჟისორის თქმით, ისეთი მსახიობის შერჩევა სურდა, რომელსაც პერსონაჟის სიბრძნის, სიძლიერისა და სითბოს გადმოცემა შეეძლებოდა, ამასთან კი ბავშვური აღტაცებისა და გაოცების უნარსაც შეინარჩუნებდა. გერვიგის აზრით, სტრიპი ამ როლისთვის იდეალური არჩევანი აღმოჩნდა.
თრეილერის კიდევ ერთი გამორჩეული დეტალი მუსიკაა. ვიდეოში ლეგენდარული ბრიტანული ჯგუფის, Led Zeppelin-ის, სიმღერა Stairway to Heaven ჟღერს. გერვიგმა კომპოზიციის გამოყენებისთვის ჯგუფის წევრების, რობერტ პლანტისა და ჯიმი პეიჯის, თანხმობა პირადად მოიპოვა. რეჟისორის განმარტებით, სიმღერის თემატიკა – სიკეთესა და ბოროტებას შორის არჩევანი და სულიერი მოგზაურობა – ფილმის მთავარ იდეებს ეხმიანება.
ასევე დაგაინტერესებთ:
#OK! საკულტო ფილმი „მუმია“ ეკრანებს უბრუნდება – გადასაღები მოედნიდან ახალი კადრები ვრცელდება
#OK! ლევან კოღუაშვილს „ოქროს გლობუსის“ ნოვატორის ჯილდო გადაეცემა
