საქართველოს ავიაბაზარზე ოპერირება „ბრიტიშ ეარვეისმა“ (British Airways) დაიწყო და 31 მარტს საქართველოოს მიმართულებით პირველი რეისი შეასრულა. A320 ნეო ტიპის ხომალდი თბილისის შოთა რუსთაველის სახელობის საერთაშორისო აეროპორტში 156 მგზავრით დღეს დილით დაეშვა.
წარმატებით დასრულდა ერთწლიანი ინტენსიური მოლაპარაკებები და ბრიტანეთის სამეფოს ფლაგმანი ავიაკომპანია საქართველოსა და გაერთიანებულ სამეფოს შორის რეგულარულ რეისებს კვირაში 4-ჯერ განახორციელებს. ფრენები თბილისის მიმართულებით ლონდონის ჰითროუს აეროპორტიდან განხორციელდება, რომელიც დღემდე ევროპის ყველაზე დატვირთულ აეროპორტად ითვლება.
ამ ფაქტთან დაკავშირებით სამთავრობო ტერმინალში ოფიციალური მიღება გაიმართა, რომელსაც საქართველოში ბრიტანეთის ელჩი გარეთ უარდი, საქართველოს მთავრობის წარმომადგენლები, საქართველოს აეროპორტების გაერთიანების გენერალური დირექტორი და ავიაციის ინდუსტრიის სხვა ხელმძღვანელი პირები დაესწრნენ.
„დღეს ისტორიული დღეა ჩვენი ქვეყნის ტურიზმისა და ავიაციის ინდუსტრიისთვის-„ბრიტიშ ეარვეისმა“ შეასრულა პირველი პირდაპირი ფრენა ლონდონი-თბილისის მიმართულებით. ეს იყო საკმაოდ გრძელვადიანი და რთული მოლაპარაკების პროცესი“-აღნიშნა ეკონომიკისა და მდგრადი განვითარების მინისტრის მოადგილე მარიამ ქვრივიშვილმა.
ბრიტანეთის ფლაგმანი ავიაკომპანიის საქართველოს ავიაბაზარზე შემოსვლას უდიდესი მნიშვნელობა აქვს ქვეყნისთვის, რადგან ეს მეტად შეუწყობს ხელს იმას, რომ ტურისტული მიმართულებით საქართველოს შესახებ ცნობადობა გაიზარდოს.
British Airways-ს, როგორც ბრენდს 50 წლიანი ისტორია აქვს, თუმცა, ავიაკომპანია 100 წელზე მეტ ხანს ითვლის. მნიშვნელოვანია, რომ აღნიშნული კომპანია American airlunes-თან ერთად გლობალური ავიაკომპანიების ალიანსის-OneWorld-ის თანადამფუძნებელი და მსოფლიოში სიდიდით მესამე უმსხვილესი გაერთიანებაა.
British Airways-ი დღეს მსოფლიოს 65 ქვეყნის 190-ზე მეტი მიმართულებით დაფრინავს.
