„ქუთაისის ახალგაზრდული ცენტრი“ ის სივრცეა, სადაც მოზარდებს შესაძლებლობა აქვთ, შემოქმედებითი და საგანმანათლებლო მიმართულებით განვითარდნენ. ცენტრის დირექტორი, ხათუნა სოფრომაძე მიმდინარე სიახლეების და სამომავლო გეგმების შესახებ ვრცლად ინტერვიუში გვესაუბრება.
გვიამბეთ „ქუთაისის ახალგაზრდული ცენტრის შესახებ“
„ქუთაისის ახალგაზრდული ცენტრი“ არის სივრცე, რომელიც მიზნად ისახავს ბავშვებისა და ახალგაზრდების განვითარებას სხვადასხვა შემოქმედებითი და საგანმანათლებლო მიმართულებით. ასევე, ახალგაზრდების პიროვნულ განვითარებას, მათ სოციალურ ჩართულობასა და სამოქალაქო პასუხისმგებლობის ამაღლებას უწყობს ხელს. 2017 წელს „ქუთაისის ახალგაზრდულმა ცენტრმა“ დააარსა ჯორჯ ბალანჩინის სახელობის საერთაშორისო ქორეოგრაფიული ფესტივალ-კონკურსი ქუთაისის კულტურისა და ტრადიციების პოპულარიზაციის მიზნით. ფესტივალ-კონკურსის მთავარი მიზნებია ქორეოგრაფიული ხელოვნების პოპულარიზაცია და ესთეტიკური ცნობიერების ამაღლება. ფესტივალი წარმოადგენს მნიშვნელოვან პლატფორმას ახალგაზრდა მოცეკვავეებისა და ქორეოგრაფებისთვის, საერთაშორისო დონეზე განვითარდნენ.
რა მიმართულებებს აერთიანებს?
ცენტრი შვიდ სახელოვნებო მიმართულებას აერთიანებს:
- ბალეტის სტუდია
- ვოკალის სტუდია
- სამხატვრო სკოლა
- გიტარის სტუდია
- ძერწვის სტუდია
- თეატრალური სტუდია
- კალიგრაფია
ეს მრავალფეროვნება ბავშვებსა და მოზარდებს აძლევს შესაძლებლობას, აღმოაჩინონ და განავითარონ საკუთარი ინტერესები ხელოვნების სხვადასხვა მიმართულებით.
რატომ ახალგაზრდული ცენტრი?
„ქუთაისის ახალგაზრდული ცენტრი“ არის ინსპირაციული სივრცე, რომელიც ბავშვებსა და ახალგაზრდებს ერთ მეგობრულ, უსაფრთხო და შემოქმედებით გარემოში აერთიანებს. ეს არ არის მხოლოდ ადგილი, სადაც ისწავლი – აქ ვითარდება იდეები, მყარდება მეგობრობა, ყალიბდება უნარები და ჩვენი მოსწავლეები ხდებიან საზოგადოების აქტიური წევრები.
ადგილობრივი და საერთაშორისო ფესტივალები რამდენად მნიშვნელოვანია და თქვენი ჩართულობა როგორია?
„ქუთაისის ახალგაზრდული ცენტრი“ აქტიურად მონაწილეობს როგორც ადგილობრივ, ისე საერთაშორისო ფესტივალებსა და კონკურსებში, სადაც ბავშვები არა მხოლოდ საკუთარი ნიჭის წარმოჩენის საშუალებას იღებენ, არამედ ეცნობიან სხვადასხვა ქვეყნის კულტურას, რაც აფართოებს მათ თვალსაწიერს და აღვივებს ინტერესს.
მთავარი მიღწევები?
ცენტრი აქტიურად მონაწილეობს საერთაშორისო გამოფენებსა და პროექტებში, სადაც არაერთხელ მიუღია პირველი ადგილი და მაღალი შეფასება.
რას გვეტყვით სამომავლო გეგმების შესახებ?
აქტიური მზადება გვაქვს რიგი მასშტაბური ღონისძიებებისთვის: 1. ამჟამად მიმდინარეობს საბალეტო სპექტაკლზე მუშაობა – „მძინარე მზეთუნახავი“, რომელიც გაიმართება ქუთაისის ლადო მესხიშვილის დრამატული თეატრის დიდ სცენაზე 2. იგეგმება საერთაშორისო გამოფენა პარიზში, საფრანგეთის საელჩოს ეგიდით. ასევე, საქართველოში გაიმართება გამოფენა „პირველი ავიაციიდან თანამედროვე ცამდე“ 3. სექტემბერში ცენტრი ვენეციას ეწვევა, სადაც თეატრ „ავრორაში“ გაიმართება ღონისძიება, ხოლო 15-16 ნოემბერს „ქუთაისის ახალგაზრდული ცენტრი“ ბალანჩინის საერთაშორისო ფესტივალს ატარებს, სადაც სხვადასხვა ქვეყანა მიიღებს მონაწილეობას.
ტექსტი: ნანა კუკულავა
ფოტო: ანუკი კახიძე, ზაზა კერძევაძე
