აშშ-ის სახელმწიფო დეპარტამენტი დროებით აჩერებს საიმიგრაციო ვიზების გაცემას 75 ქვეყნის მოქალაქეებისთვის, მათ შორის არიან საქართველო, სომხეთი და აზერბაიჯანი. შესაბამისი ბრძანება ძალაში 21 იანვარს შევა. ამის შესახებ ინფორმაციას Fox News ავრცელებს.
სახელმწიფო დეპარტამენტის მემორანდუმის მიხედვით, საკონსულოს თანამშრომლებს ევალებათ, რომ მოქმედი კანონმდებლობის საფუძველზე, უარი თქვან ვიზების გაცემაზე მანამ, სანამ დეპარტამენტი შემოწმებისა და შერჩევის პროცედურებს გადახედავს.
Fox News-ის ინფორმაციით, გადაწყვეტილება მიზნად ისახავს აშშ-ში იმ იმიგრანტების შესვლის აღკვეთას, რომლებიც, შესაძლოა, „სახელმწიფო კმაყოფაზე“ მყოფი პირები გახდნენ. კერძოდ:
- იმ აპლიკანტების შემთხვევაში, რომლებიც სავარაუდოდ, სახელმწიფო შეღავათებს გამოიყენებენ, გათვალისწინებული უნდა იყოს: ჯანმრთელობის მდგომარეობა, ასაკი, ინგლისური ენის ფლობის დონე, ფინანსური მდგომარეობა და ხანგრძლივი სამედიცინო მოვლის პოტენციური საჭიროება.
- ვიზის გაცემაზე უარის თქმის მიზეზი შეიძლება გახდეს ხანდაზმული ასაკი ან ჭარბი წონა;
- უარის თქმის საფუძველი ასევე შეიძლება იყოს წარსულში სახელმწიფო შემწეობის მიღება ან სახელმწიფო ზრუნვის დაწესებულებაში ყოფნა.
ამერიკის საელჩო თბილისში განმარტავს — ვის შეეხება ამერიკის ვიზებთან დაკავშირებული ცვლილებები. მათი ცნობით, ” სახელმწიფო დეპარტამენტი ახორციელებს ყველა პოლიტიკის, რეგულაციისა და სახელმძღვანელო დოკუმენტის სრულ გადახედვას, რათა უზრუნველყოს, რომ მაღალი რისკის მქონე ქვეყნებიდან ჩამოსული იმიგრანტები არ გამოიყენებენ სოციალურ დახმარებას შეერთებულ შტატებში და არ გახდებიან საჯარო ტვირთი.”
მათივე ცნობით, ამ ქვეყნების წარმომადგენლებს შეუძლიათ განაცხადის წარდგენა, თუმცა პაუზის პერიოდში ამ მოქალაქეებზე საიმიგრაციო ვიზები არ გაიცემა. ასევე, პაუზა არ გავრცელდება იმ პირებზე, რომელთაც ორმაგი მოქალაქეობა აქვთ და ერთ-ერთი იმ ქვეყნის მოქალაქეები არია, რომელიც სიაში არ მოხვდა. მათივე განმარტებით, უკვე მოქმედ ვიზებს საფრთხე არ ემუქრება და ამ მითითების ფარგლებში არც ერთი საიმიგრაციო ვიზა არ გაუქმებულა. მათივე თქმით, ეს პაუზა ტურისტულ ვიზებზე არ გავრცელდება.
— რა ბედი ეწევა ჩემს საიმიგრაციო ვიზის გასაუბრების თარიღს?
საიმიგრაციო ვიზა აპლიკანტებს, რომლებიც ზემოთ აღნიშნული ქვეყნების მოქალაქეები არიან, შეუძლიათ განაცხადის წარდგენა და გასაუბრებაზე დასწრება. დეპარტამენტი გააგრძელებს გასაუბრების თარიღების ჩანიშვნას, თუმცა პაუზის პერიოდში ამ მოქალაქეებზე საიმიგრაციო ვიზები არ გაიცემა.
— არსებობს თუ არა გამონაკლისები?
ორმაგი მოქალაქეობის მქონე პირებზე, რომლებიც განაცხადს წარადგენენ იმ ქვეყნის მოქმედი პასპორტით, რომელიც ზემოთ ჩამოთვლილ სიაში არ შედის, ეს პაუზა არ გავრცელდება.
— ექნება თუ არა გავლენა ამ პაუზას ჩემს ამჟამად მოქმედ ვიზაზე?
არა. ამ მითითების ფარგლებში არც ერთი საიმიგრაციო ვიზა არ გაუქმებულა. შეერთებულ შტატებში შესვლასთან დაკავშირებული შეკითხვებით, გთხოვთ, მიმართოთ შიდა უსაფრთხოების დეპარტამენტს (DHS).
— ეს პაუზა ვრცელდება თუ არა ტურისტულ ვიზებზე?
არა. ეს პაუზა ვრცელდება მხოლოდ საიმიგრაციო ვიზა აპლიკანტებზე. ტურისტული ვიზები არასაიმიგრაციო ვიზებია”, — წერია საელჩოს განცხადებაში.
ასევე დაგაინტერესებთ
#OK! მასკის გადაწყვეტილებით, ირანელები Starlink-ის ინტერნეტს უფასოდ მიიღებენ
