ჟურნალმა People-მა 2025 წლის ყველაზე სექსუალური მამაკაცი დაასახელა. ის 37 წლის ბრიტანელი მსახიობი ჯონათან ბეილია, რომელიც „ნეტფლიქსის“ სერიალში „ბრიჯერტონი“ ლორდ ენტონის როლით გახდა ცნობილი.
„ეს უდიდესი პატივია. რა თქმა უნდა, წარმოუდგენლად გახარებული ვარ. ეს საიდუმლო იყო, ამიტომ ძალიან მიხარია, რომ ჩემმა მეგობრებმა და ოჯახის წევრებმა გაიგეს“ – აღნიშნა ჟურნალთან ინტერვიუში ბეილიმ.
მსახიობის თქმით, მიმზიდველობა მხოლოდ კარგ გარეგნობას არ ნიშნავს.
„ბავშვობაში ძალიან თავდაჯერებული ვიყავი, ასაკის მატებასთან ერთად ეს თვისება დავკარგე, მაგრამ შესაძლოა, ჩვენ ყველანი საკუთარ ბავშვობასთან დაბრუნებას ვცდილობთ“ – განმარტა მან.
ჟურნალისტების თქმით, გადაწყვეტილების მიღების დროს ბეილის გარეგნობაზე მეტად მისი თავდაჯერება, ინტელექტი და საქველმოქმედო ინიციატივებში შეტანილი წვლილი გაითვალისწინეს.
ჯონათან ბეილი ოქსფორდშირის საგრაფოში დაიბადა და სოფელ ბენსონში, სამ უფროს დასთან ერთად გაიზარდა. ხუთი წლის ასაკში, როდესაც ბებიასთან ერთად სპექტაკლი „ოლივერი“ ნახა, მიხვდა, რომ მსახიობობა სურდა.
სცენაზე ჯონათან ბეილი 1995 წელს, ლონდონის ბარბიკანის თეატრში ჩარლზ დიკენსის „საშობაო ისტორიის“ დადგმაში გამოჩნდა. დამწყებმა მსახიობმა პატარა ტიმის როლი შეასრულა. ამას მოჰყვა გავროშის როლი მიუზიკლში „საბრალონი“, სრულფასოვანი, პროფესიონალური დებიუტი კი 15 წლის ასაკში „მეფე ჯონში“ შესრულებული პრინცი არტურის როლით შედგა და მას შემდეგ აგრძელებს თავისი ხელოვნების დახვეწას როგორც სცენაზე, ასევე ეკრანზე.
რაც შეეხება პირად ცხოვრებას, ჯონათან ბეილი ღია გეია. აის შესახებ მსახიობმა 2028 წელს, ისეთ დიდ გამოცემასთან ინტერვიუში განაცხადა, როგორიც „თაიმსი“-ა.
ბეილი თანამშრომლობს ალბერტ კენედის ფონდთან, რომელიც უსახლკარო და სოციალურად დაუცველ ლგბტ ახალგაზრდებს ეხმარება. მაგალითად, მსახიობმა 2018 და 2019 წლებში ფონდის დასახმარებლად Donmar Warehouse თეატრში ორი გალა-კონცერტი გამართა.
მსახიობმა ინტერვიუში ისაუბრა იმაზე თუ რას აფასებს ურთიერთობებში ყველაზე მეტად:
„ურთიერთობა, სიცხადე და რა თქმა უნდა, გამჭვირვალობა. მხარდაჭერა, თანაგრძნობა და სხვისი წარმატებით ტკბობა ნამდვილად ძალიან მნიშვნელოვანია“ – აღნიშნა მან.
ასევე დაგაინტერესებთ
