დაკუნთული სხეული, ფართო მხრები, მაცდური თვალები… თუ ფიქრობთ, რომ სილამაზის სტანდარტები მხოლოდ ქალებისთვისაა, ცდებით. მამაკაცების მოდის კვირეულებზე ყოველთვის ძალიან მკაცრი შერჩევა მოქმედებდა, თუმცა 2025/26 წლის შემოდგომა–ზამთრის ჩვენებებზე ახალი ტენდენცია გაჩნდა – პოდიუმი განსხვავებული, არატრადიციული გარეგნობის მოდელებისთვისაც გაიხსნა. ახლა მამაკაცი მოდელის წარმოდგენა მხოლოდ კრივის რინგზე კი არა, ბიბლიოთეკაშიც შეიძლება. ბოლოს და ბოლოს, ვინ თქვა, რომ განსაკუთრებული გარეგნობა სექსუალურობას გამორიცხავს?
ნახეთ 2025 წლის ყველაზე წარმატებული, განსხვავებული, მაგრამ მიმზიდველი მამაკაცი მოდელები.
შონ ო’პრაი
2006 წელს შონ ო’პრაი სკოლის საუკეთესო კალათბურთელი იყო და სპორტული კარიერის აშენებაზე ოცნებობდა, მაგრამ America’s Next Top – Model -ში მიიღო მონაწილეობა და მისი ცხოვრება მთლიანად შეიცვალა. შონმა სპორტსა და მოდას შორის არჩევანი ამ უკანასკნელის სასარგებლოდ გააკეთა და არც შეცდარა – უკვე 20 წელია, ის ერთ-ერთ ყველაზე სექსუალურ და წარმატებულ მამაკაც მოდელად ითვლება. დღეს ის პოდიუმზე იშვიათად გამოდის, თუმცა ჟურნალების გარეკანებს ხშირად ამშვენებს.
პირს აბერნათი
Vogue-მა პირს აბერნათს მოდის ინდუსტრიაში სუფთა ჰაერის ყლუპი უწოდა, რასაც ძნელია არ დაეთანხმო. პირსი არა მხოლოდ მოდელი, არამედ პოპულარული ვიდეობლოგერიცაა – TikTok-ზე მის კულინარიულ ვიდეოებს 3 მილიონზე მეტი გამომწერი ჰყავს და ეს მისი მეორე დიდი გატაცებაა მოდის შემდეგ.
2019 წელს პირსმა ბოსტონის უნივერსიტეტის სარეჟისორო მიმართულება დაამთავრა. ის სწავლის პარალელურად, რესტორანში, ოფიციანტად მუშაობდა, სადაც მიხვდა, რომ კულინარია უფრო იზიდავდა, ვიდრე კინო და კულინარიული ბლოგის ჩაწერა დაიწყო. მისი ბლოგიდან შეიძლება გაიგოთ როგორ მზადდება რიზოტო ან როგორ უნდა დაარბილოთ ხმელი ლობიო წუთებში. სწორედ ამ გატაცებამ მიიყვანა პირსი მოდის ინდუსტრიამდე – Gucci-ს აგენტმა მისი ვიდეო ნახა, სადაც პიერი ბაბა განუშს ამზადებდა და ქასტინგზე მიიწვია.
„ვერც მივხვდი, იქ რას ვაკეთებდი! რატომ მიყურებდა ჯარედ ლეტო და რატომ იჯდა ჩემ გვერდით მაკოლეი კალკინი“ – იხსენებს პირსი.
დღეს პირს აბერნათი Vogue-ს და The New York Times-ს ამშვენებს. ახალგაზრდა კულინარი ასევე JW Anderson-ისა და Dior-ის ჩვენებებზე გამოდის.
ჯეკ უორდელი
ჯეკ უორდელი მოდის ინდუსტრიაში ახლახან გამოჩნდა. მისი სოციალური ქსელებიდან ჩანს, რომ ახალგაზრდა მამაკაცი თავისუფალ დროს თევზაობს, მოგზაურობს და მეგობრებთან ერთად ერთობა.
ჯეკი მოდის ინდუსტრიაში 2025 წელს, Dolce & Gabbana-ს პოდიუმზე გამოჩნდა, რასაც Jacquemus-ისა და Emporio Armani-ის ჩვენებები მოჰყვა. ახალბედა მოდელს ასეთი დასაწყისი აშკარად წარმატებულ მომავალს ჰპირდება. ის დღეს ერთ-ერთ ყველაზე პერსპექტიულ მამაკაცი მოდელად მიიჩნევა.
პარკერ ვან ნორდი
პარკერ ვან ნორდი 90-იანი წლების საკულტო მოდელის, ანდრე ვან ნორდის შვილია. ახალგაზრდა კაცმა თავისი საუკეთესო თვისებები მამისგან, მემკვიდრეობით მიიღო და შეიძლება ითქვას, რომ მისი მომავალი ბავშვობიდან გადაწყვეტილი იყო. პარკერი 14 წლის იყო, როდესაც მამასთან ერთად, ნიდერლანდური ჟურნალისთვის გადაიღეს. მოგვიანებით მან ამსტერდამში ბიზნესის მართვა ისწავლა, თუმცა პროფესიით არ უმუშავია და მამის გზას გაჰყვა.
პარკერს დღეს Hugo Boss-ის, Carolina Herrera-სა და Versace-თვის იღებენ.
საიმონ ნესმანი
საიმონ ნესმანი მოდელთა იმ კატეგორიას მიეკუთვნება, ვინც უკვე 20 წელია კარიერას ქმნის და დღემდე მუდმივად მოთხოვნადია.
ახალგაზრდა მამაკაცს თავიდან მოდელობაზე არ უფიქრია. 17 წლის იყო, როცა მისმა მეგობარმა საიმონის ფოტოები კანადურ სააგენტოს საიდუმლოდ გაუგზავნა და ის პირდაპირ ნიუ-იორკში, სამუშაოდ წაიყვანეს. 19 წლის განმავლობაში საიმონი Giorgio Armani-ს სახე გახდა და Versace-ს, D&G-ს, Givenchy-ს, Calvin Klein-ის, Ralph Lauren-ის, Lanvin-ის, Yves Saint Laurent-ისა და სხვა ბრენდების პოდიუმებზე გამოდიოდა.
ბოლო წლებში Moncler-ის, Ralph Lauren-ისა და Ferrari-ს ჩვენებებში, ასევე Zara-ს კატალოგში მიიღო მონაწილეობა.
2012 წელს გადაიღეს მადონას კლიპში Girl Gone Wild.
2020 წელს ცოლად რუმინელი მოდელი ანდრეა დიაკონუ მოიყვანა.
მარლონ გარსია
როცა სილამაზის სტანდარტებიდან გადახვევა ვახსენეთ, მარლონი რ გვიგულისხმია. პირიქით, ის სილამაზის სტანდარტებს განასახიერებს. გარსიას ისტორია საიდუმლოებით და სკანდალებით სავსეა. 2023 წელს მოდელმა განაცხადა, რომ ნიუ-იორკში მცხოვრები უსახლკარო იყო, სანამ სამოდელო საააგენტოს თანამშრომელმა ქუჩაში არ შენიშნა, თავშესაფარი არ მისცა და სამსახურის არ შესთავაზა. თუმცა მალე გაირკვა, რომ მარლონმა ეს ისტორია ყურადღების მისაქცევად მოიგონა და სინამდვილეში, ქუჩაში არასოდეს უცხოვრია.
რაც ზუსტად ცნობილია, მოდელად მუშაობის დაწყებამდე მარლონი კალათბურთელი იყო და შვედეთის საუკეთესო ხუთ მოთამაშეში შედიოდა. IMG Models-თან ხელშეკრულების დადების შემდეგ მან სპორტი მიატოვა, მაგრამ წარმატებული მოდელი და ბლოგერი გახდა. დღეს ის Willy Chavarria-ს პოდიუმზე გამოდის, Burberry-ის ლუქბუკებში მონაწილეობს და თავისუფალ დროს სკეიტბორდით სრიალებს.
კიტ ბატლერი
2015 წელს, ოქსფორდელი კიტ ბატლერი ბიძის პატარა სასურსათო მაღაზიაში მუშაობდა, სადაც Next-ის აგენტმა შენიშნა და ქასტინგზე მიიწვია. 2015 წელს ბატლერი Coach-ის შემოდგომა-ზამთრის ჩვენებაზე გამოჩნდა, ხოლო დღეს უკვე ყველა მთავარი მოდის კვირეულის პოდიუმზეა. 2024 წელს, კიტმა Dolce & Gabbana-ს შოუ გახსნა, ხოლო 2025-ში Montblanc-ის, Gucci-ს, Burberry-ს, Emporio Armani-ს და სხვა ბრენდების პოდიუმებზე გამოჩნდა.
სხვა მოდელებისგან კიტი ოდნავ ფემინური გარეგნობით გამოირჩევა. ამასთან, ძველი მოდელებისგან განსხვავებით, მას დაკუნთული სხეული არ აქვს. ათი წლის წინ სწორედ ეს გახდა მისი სავიზიტო ბარათი, რომელმაც მსოფლიოს ერთ-ერთ ყველაზე მოთხოვნად მოდელად აქცია.
ასევე დაგაინტერესებთ
