ცნობილ იტალიელ ბლოგერს, მოდელს და ბიზნესვუმენს კიარა ფერანის თაღლითობის ბრალდებით გაასამართლებენ.
სკანდალი სამი წლის წინ მოხდა, როდესაც ფერანიმ საკონდიტრო ბრენდ Balocco-სთან თანამშრომლობის ფარგლებში, საშობაო ნამცხვრების სერია გამოუშვა, რომელიც კომპანიის სხვა პროდუქტებთან შედარებით, გაცილებით ძვირი ღირდა. სარეკლამო კამპანიის დროს გამოცხადდა, რომ შემოსავლის ნაწილი საქველმოქმედო ორგანიზაციებს მოხმარდებოდა, მაგრამ ასე არ მოხდა. კომპანიამ მხოლოდ ერთხელ გაიღო 50,000 ევროს ოდენობის შემოწირულობა, ხოლო „იტალიელ კიმ კარდაშიანს“, როგორც მას მედიამ უწოდა, საქველმოქმედო მიზნებისთვის ერთი ევროც არ გაუღია.
2023 წელს იტალიის ანტიმონოპოლიურმა ორგანომ კიარას და Balocco -ს ჯარიმები დააკისრა. ლამაზმანი იძულებული გახდა 1 მილიონი ევრო გადაეხადა, ხოლო კომპანიას დაახლოებით 400,000 ევროს გადახდა მოუწია. ფერანიმ საჯაროდ მოიბოდიშა და ფული ხელმოკლე ადამიანების დასახმარებლად გადარიცხა. გადახდილი თანხის ჯამურმა ოდენობამ ჯარიმებთან ერთად, 3.4 მილიონი ევრო შეადგინა. 2024 წლის მაისში ფერანის კომპანიამ განცხადება გაავრცელა, რომელშიც პირობა დადო, რომ „კომერციულ და საქველმოქმედო საქმიანობასთან დაკავშირებული ტრანზაქციებისგან თავი შეიკავებდა“.
მოლოდინის მიუხედავად, ზემოთ ჩამოთვლილმა ღონისძიებებმა საზოგადოების აღშფოთება არ ჩააცხრო. საბოლოოდ, იტალიის მომხმარებელთა ასოციაციამ ბლოგერის წინააღმდეგ საჩივარი შეიტანა, მთავრობამ გამოძიება განაახლა და ფერანის ახლა თავისუფლების აღკვეთა ემუქრება.
ბლოგერი სასამართლოში წინაშე 25 ნოემბერს წარსდგა. პროკურორები მისთვის 1 წლითა და 8 თვით თავისუფლების აღკვეთას ითხოვენ, თუმცა ადვოკატები ფიქრობენ, რომ მისი გამართლება შეუძლიათ – იუწყება France 24.
„ჩვენ ყოველთვის პატიოსნად ვმოქმედებდით და ამისგან სარგებელი არავის მიუღია. ამაში დარწმუნებული ვარ, მაგრამ მეტს ვერაფერს ვიტყვი“, – აღნიშნა კიარამ სასამართლო დარბაზიდან გასვლისას.
სასამართლოში შემდეგი მოსმენა 19 დეკემბერს გაიმართება, იანვარში კი საქმის შედეგი გამოცხადდება.
კიარა ფერანის სოციალურ ქსელებში 28 მილიონზე მეტი გამომწერი ჰყავს. მან პოპულარობას 2009 წელს მიაღწია, ექვსი წლის შემდეგ კი პირველი ბლოგერი გახდა, რომელიც Vogue-ის გარეკანზე გამოჩნდა.
ასევე დაგაინტერესებთ
#OK! ახალი ცხოვრების დასაწყისი განქორწინების შემდეგ – 6 რჩევა სუპერმოდელი ჟიზელ ბიუნდჰენისგან
