დიდი ხანია, ტატუ თანამედროვე ფეხბურთის განუყოფელ ნაწილად იქცა. ზოგი, მაგალითად კევინ-პრინს ბოატენგი, ფეხბურთში უკვე ტატუებით დამშვენებული მოდის, ზოგი კი მაგალითად, მესი ტატუებს მთელი საფეხბურთო კარიერის მანძილზე აგროვებს. ასეა თუ ისე, 30 წლის შემდეგ ფეხბურთელების უმეტესობას სხეულზე ერთი ტატუ მაინც აქვს, მაგრამ რონალდუ მათ რიცხვში არაა!
მიუხედავად იმისა, რომ ფეხბურთელი თავის გარეგნობაზე ზრუნავს და მოდის უახლეს ტენდენციებს ზედმიწევნით მიჰყვება, მისი კანი ძველებურად სუფთაა. როგორ ფიქრობთ, ტატუები არ მოსწონს თუ იდეალური კანის „დაბინძურება“ არ სურს? სინამდვილეში, რონალდუს განსხვავებული არგუმენტები აქვს.
კრიშტიანუ რონალდუ ქველმოქმედებაზე ყოველწლიურად მილიონობით ევროს ხარჯავს. მაგალითად, მხოლოდ 2016 წელს მან გაეროს საქველმოქმედო ორგანიზაციას 600 000 ევრო შესწირა (ჩემპიონთა ლიგის მოგებიდან მიღებული შემოსავალი), 275 000 ევრო ბავშვთა ონკოლოგიასთან საბრძოლველად გადარიცხა (ევროპის ჩემპიონატის მოგებიდან მიღებული შემოსავალი) და 3 მილიონი ევროთი ავიაკატასტროფის დროს დაღუპული ბრაზილიური საფეხბურთო კლუბის – „შაპეკოენსეს“ ფეხბურთელთა ოჯახებს დაეხმარა.
როგორც აღმოჩნდა, რონალდუ ადამიანებს არა მხოლოდ ფულით, საკუთარი სხეულითაც ეხმარება – ის რეგულარულად აბარებს სისხლს, რის გამოც ტატუს გაკეთება არ შეუძლია.
საქმე ის არის, რომ წითელი ჯვრის საერთაშორისო კომიტეტის წესების თანახმად, ინფექციის რისკის ასაცილებლად, დონორებს სისხლის გაღების უფლება მხოლოდ ტატუს გაკეთებიდან ოთხი თვის შემდეგ აქვთ. იგივე წესი ვრცელდება პირსინგზეც.
რა თქმა უნდა, ფეხბურთელს შეუძლია სისხლის გაღება რამდენიმე თვით შეწყვიტოს, მაგრამ ის პერფექციონისტია, სურს, რომ ყოველთვის ხელმისაწვდომი იყოს, ამიტომ ტატუს გაკეთებას არ გეგმავს.
კრიშტიანუ პირველად დონორი 2010-იანი წლების დასაწყისში გახდა, როდესაც მისი თანაგუნდელის, კარლოს მარტინესის სამი წლის ვაჟი ლეიკემიით დაავადდა. მაშინ რონალდუ ძვლის ტვინის დონორობაზე დათანხმდა.
„ეს დიდი ხნის წინ გავაკეთე და თუ კიდევ მომიწევს, ისევ გავაკეთებ, რადგან ეს ბევრი ბავშვისთვის ძალიან სერიოზული დაავადებაა და მათ უნდა დავეხმაროთ… მარტივი პროცესია, რომლის შემდეგაც თავს ბედნიერად გრძნობ, რადგან იცი, რომ სხვა ადამიანს ეხმარები“, – ამბობს რონალდუ.
ამის შემდეგ ფეხბურთელმა სისხლის გადასხმა რეგულარულად დაიწყო. 2013 წელს მან თავისი ძვლის ტვინის ნაწილი ლეიკემიით დაავადებული ბავშვების დახმარების ფონდს გადასცა, შემდეგ ჩრდილოეთ ესპანეთში, სარკინიგზო კატასტროფის დროს დაზარალებულთა დასახმარებლად სისხლი გაიღო. ცნობისთვის, კატასტროფის დროს 78 ადამიანი დაიღუპა და 143 დაშავდა. 2017 წელს კრიშტიანუ პლაზმის დონორი გახდა და სისხლი ორჯერ გაიღო, ხოლო 2018 წელს იტალიურ სისხლის დონორთა ორგანიზაცია Associazione Volontari Italiani Sangue (AVIS)-თან თანამშრომლობა დაიწყო.
„სისხლის დონაციით სარგებლობის მოტანა ყველას შეგვიძლია. თითოეული დონაცია შეიძლება რამდენიმე ადამიანს საგანგებო სიტუაციის დროს ან ხანგრძლივი მკურნალობის დროს დაეხმაროს. სწორედ ამიტომ ვარ აღფრთოვანებული დონაციის მნიშვნელობით და მსოფლიოს ყველა ადამიანს მოვუწოდებ, სისხლის დონორები გახდნენ და მთელი ცხოვრების მანძილზე სიცოცხლეები გადაარჩინონ“, – ამბობს კრიშტიანუ.
ასევე დაგაინტერესებთ
