სპორტი და მოდა ჩვენი ცხოვრების განუყოფელი ნაწილებია. ეს თითქოს ორი ერთმანეთისგან სრულიად განსხვავებული სფერო, უკვე ერთმანეთის გარეშე წარმოუდგენელია. ჯანსაღი ცხოვრების წესი და სპორტი დღესდღეობით ძალიან აქტუალურია. ყველა ცდილობს სპორტით დაკავდეს, რამაც სპორტული მოდის განვითარებასაც შეუწყო ხელი. სპორტი დიზაინერების შთაგონების წყაროც გახდა და მათი კოლექციები ხშირად სპორტის სხვადასხვა სახეობის შთაგონებით იქმნება. ბოლო დროს კი ძალიან აქტუალურია სპორტული ხაზებისა და მაღალი მოდის ბრენდების კოლაბორაციები. ხშირად სპორტული ბრენდები ცნობილ ვარსკვლავებთან ერთადაც ქმნიან საერთო კოლექციებს, რომლებიც მომენტალურად სეზონის ჰიტად იქცევა ხოლმე. რაც უფრო განსხვავდება ერთმანეთისგან სპორტული და მოდის ბრენდები, მით უფრო საინტერესო და კრეატიული გამოდის მათი კოლექციები. 2022 წელს უამრავი ასეთი კოლაბორაციით გაგვაოცა არაერთმა დიზაინერმა. ვფიქრობთ, ამ მხრივ 2023 წელიც არანაკლებ საინტერესო იქნება.
Adidas x Gucci
Adidas-ის ლეგენდარული სამი ზოლი გამოჩნდა Gucci-ს 2022 წლის შემოდგომა/ზამთრის კოლექციაში. რედაქტორები, ბაერები და სრულიად საზოგადოება გაოცებული იყო. ვერავის წარმოედგინა, თუ ასე ჰარმონიულად შეერწყმებოდა ეს სრულიად სხვადასხვა სტილის ბრენდი. თუმცა ალესანდრო მიკელე, ბრენდის იმჟამინდელი კრეატიული დირექტორი, Adidas-ის Gazelle კედების დიდი მოყვარული და კოლექციონერი გახლდათ და მას სწორედ ამან გადააწყვეტინა Gucci x Adidas კოლაბორაციის შექმნა. უნდა აღინიშნოს, რომ Adidas-ს იქამდეც არაერთი წარმატებული თანამშრომლობა ჰქონდა მაღალი მოდის ისეთ ბრენდებთან, როგორიცაა – Balenciaga, Margiela, Stella McCartney, Raf Simons.
Fila x Roksanda
თავისი არატრადიციული სილუეტებითა და ორიგინალური ფაქტურებით Roksanda-მ Fila-ს სპორტული სამოსის სრული გარდაქმნა მოახერხა. ამ კოლაბორაციამ კიდევ ერთხელ დაგვანახვა მოდის ძალა და ის, რომ უსაზღვრო ფანტაზიას ყველაფრის საოცრად გარდაქმნა შეუძლია. ფუშფუშა კაბებითა და მხიარული ფერებით Fila-ს სპორტული ხაზი მაღალი მოდის კოლექციებში თავმომწონედ გაერია.
Nike x Jacquemus
Nike ის სპორტული ბრენდია, რომელიც ყველაზე ხშირად თანამშრომლობს მაღალი მოდის ბრენდებთან და საინტერესო კოლაბორაციებით გვანებივრებს. ვიხილეთ Nike-ის საერთო კოლექცია OFF White-თან, Louis Vuitton-თან, Dior-თან, Tiffany-სთან, Sacai-სთან, Swarowski-სთან და ა. შ. უნდა გამოვყოთ ბოლოდროინდელი თანამშრომლობა ფრანგულ ბრენდ Jacquemus-სთან. დედამიწის ტონებში გადაწყვეტილ კოლექციას ვინტაჟური ელფერი დაჰკრავდა. კოლექციაში ასევე დომინირებდა მკვეთრი ვარდისფერი, რომელიც ახალგაზრდა გოგონებმა მაშინვე აიტაცეს.
Puma x Dua Lipa
არც Puma გვაკლებს საინტერესო კოლაბორაციებს. ცოტა ხნის წინ ვიხილეთ მისი თანამშრომლობა Coca-Cola-სთან, რომელიც ახალგაზრდა თაობის საყვარელი კოლექცია გახდა. გარდა ამისა, Puma-მ შექმნა კედების საერთო კოლექცია მომღერალ დუა ლიპასთან. მკვეთრი ფერთა პალიტრითა და თამამი დიზაინით შექმნილი კოლაბორაცია საკმაოდ წარმატებული გამოდგა. Puma-ს მომხმარებელთა რიცხვს კი მომღერლის გულშემატკივრები დაემატნენ.
David Koma
მოდასა და სპორტზე საუბრის დროს შეუძლებელია ზემოთ ჩამოთვლილ ბრენდებთან ერთად არ ვახსენოთ წარმოშობით ქართველი დიზაინერი დევიდ კომა. სპორტულ ბრენდ Koral-თან საერთო კაფსულა კოლექციის შექმნის გარდა, სპორტი კომას არაერთი კოლექციის ინსპირაცია ყოფილა. ლონდონის მოდის კვირეულზე დიზაინერის 2021 წლის საგაზაფხულო კოლექციის ყოველი ელემენტი ჩოგბურთით იყო შთაგონებული. 2022 წლის საგაზაფხულო კოლექციასაც ეტყობოდა სპორტის გავლენა. საღამოს კაბებს საცურაო კოსტიუმების დეტალები ჰქონდათ. იმავე წლის საშემოდგომო კოლექციის შთაგონების წყარო კი მთლიანად ფეხბურთი გახლდათ. 2023 წლის Pre Fall კოლექცია დიზაინერმა არქტიკულ სპორტს მიუძღვნა. ამჯერად მისი ინსპირაცია რეკორდსმენი ქალი DeeDee Ann Jonrowe გახლდათ, რომელიც მარხილში ჩაბმული ძაღლების შეჯიბრის რეკორდსმენია.
