მედიცინაში მრავალწლიანი გამოცდილება ბევრისთვის შეიძლება პროფესიული მწვერვალი იყოს, თუმცა არსებობენ ადამიანები, ვისთვისაც ეს დასასრული კი არა, ახალი ეტაპის დასაწყისია. სწორედ მათ შორისაა ანჟელა ბაკურაძე – ესთეტიკური მედიცინის ცენტრ „მილენიუმის“ დამფუძნებელი და ხელმძღვანელი, რომელიც დარწმუნებულია, რომ პროფესიონალიზმი მუდმივ განვითარებას, სწავლასა და სიახლეების მიღების მზადყოფნას ეფუძნება.
,,ესთეტიკური მედიცინა დღეს ერთ-ერთი ყველაზე სწრაფად განვითარებადი სფეროა, სადაც ახალი ტექნოლოგიები, სამეცნიერო კვლევები და ინოვაციური მეთოდები ყოველდღიურად ცვლის არსებულ სტანდარტებს. ამ სამყაროში პროფესიონალიზმი მხოლოდ წლების რაოდენობით არ იზომება. ის განისაზღვრება სურვილით, არ გაჩერდე და მუდმივად იყო სიახლეების ძიებაში“, – აღნიშნავს ანჟელა ბაკურაძე ჟურნალ OK! ქუთაისთან ინტერვიუში.
როგორც თავად ამბობს, სწავლა მისთვის მხოლოდ ახალი აპარატურის ან ტექნიკის ათვისება არ არის. ეს არის პასუხისმგებლობა პაციენტის, პროფესიისა და საკუთარი სახელის წინაშე. სწორედ ამიტომ, წლების განმავლობაში რეგულარულად მონაწილეობს საერთაშორისო კონგრესებში, ესწრება ტრენინგებს, უახლეს სამეცნიერო პუბლიკაციებს ეცნობა და მსოფლიოს სხვადასხვა ქვეყნის კოლეგებთან გამოცდილებას იზიარებს.
თუმცა, მთავარი მოტივაცია მაინც ადამიანები არიან. ყოველი პაციენტის შედეგი კიდევ ერთხელ ახსენებს, რომ ესთეტიკური მედიცინა მხოლოდ გარეგნულ ცვლილებას არ ემსახურება. ხშირად ის ადამიანის თავდაჯერებულობას, თვითშეფასებასა და ცხოვრების ხარისხს ცვლის.
ანჟელა, ესთეტიკური მედიცინა მუდმივად ვითარდება. როგორ არჩევთ იმ მეთოდებსა და ტექნოლოგიებს, რომლებსაც თქვენს ცენტრში ნერგავთ?
სიახლე ჩვენთვის მთავარი კრიტერიუმი მხოლოდ იმიტომ არასდროს ყოფილა, რომ ის ახალია. თანამედროვე მედიცინა მტკიცებულებებს ეფუძნება და მეც ამავე პრინციპს ვიცავ. როდესაც რომელიმე ახალი ტექნოლოგია ჩნდება ბაზარზე, პირველ რიგში, ვეცნობით მის კლინიკურ კვლევებს, საერთაშორისო რეკომენდაციებსა და პრაქტიკულ გამოცდილებას იმ ქვეყნებში, სადაც ეს მეთოდი უკვე გამოიყენება. მნიშვნელოვანია, რამდენად დადასტურებულია მისი ეფექტურობა, რამდენად პროგნოზირებადია შედეგი და რამდენად მაღალია უსაფრთხოების სტანდარტი.
ასევე, ვაფასებთ, რეალურად სჭირდება თუ არა ეს ტექნოლოგია ჩვენს პაციენტებს. ხშირად ბაზარზე ძალიან ბევრი მოდური ტენდენცია ჩნდება, თუმცა ყველა მათგანი გრძელვადიან პერსპექტივაში ღირებული არ აღმოჩნდება. ჩვენი მიზანი არ არის სიახლეების დემონსტრირება, ჩვენი მიზანია საუკეთესო შედეგი.
ნებისმიერი ახალი მეთოდის დანერგვას წინ უსწრებს პერსონალის გადამზადება, საერთაშორისო სერტიფიცირება და პრაქტიკული მომზადება. მხოლოდ ამის შემდეგ ვიღებთ გადაწყვეტილებას ყოველდღიურ პრაქტიკაში გამოვიყენოთ.
„მილენიუმის“ ერთ-ერთი სავიზიტო ბარათი ქართული მალამოა, რომლის ისტორიაც თაობებს აერთიანებს. როგორ ახერხებთ ტრადიციისა და თანამედროვე მედიცინის ჰარმონიულ შერწყმას?
ვფიქრობ, მედიცინაში ტრადიცია და ინოვაცია ერთმანეთის კონკურენტი არ არის. პირიქით, ისინი ერთმანეთს ავსებენ. ქართული მალამო, რომელსაც „მილენიუმი“ წლებია წარმატებით იყენებს, ოჯახური გამოცდილებისა და მრავალწლიანი დაკვირვებების შედეგს წარმოადგენს. თუმცა, ჩვენ არასდროს ვუყურებთ მას მხოლოდ როგორც ტრადიციას. მუდმივად ვაკვირდებით მის ეფექტს, ვაანალიზებთ შედეგებს და ვადარებთ თანამედროვე სამეცნიერო ცოდნას.
თანამედროვე მედიცინა გვაძლევს შესაძლებლობას, უკეთ გავიგოთ ის მექანიზმები, რასაც ჩვენი წინაპრები პრაქტიკული გამოცდილებით აღწევდნენ. სწორედ ამიტომ ტრადიცია ჩვენთვის არა წარსულში დარჩენილი გამოცდილებაა, არამედ ცოდნა, რომელსაც თანამედროვე მეცნიერების დახმარებით ახალ სიცოცხლეს ვაძლევთ.
ვფიქრობ, სწორედ ამ ბალანსმა განაპირობა ის ნდობა, რომელიც პაციენტებს „მილენიუმის“ მიმართ აქვთ.
დღეს მომხმარებელი ბევრად უფრო ინფორმირებული და მომთხოვნია. რა პრინციპებით არჩევთ თითოეული პაციენტისთვის ინდივიდუალურ მკურნალობის გეგმას?
თანამედროვე ესთეტიკური მედიცინა უკვე დიდი ხანია გასცდა სტანდარტული პროცედურების ეპოქას. პრაქტიკულად ორი იდენტური პაციენტი არ არსებობს. პირველ რიგში, ვაფასებთ პაციენტის ჯანმრთელობის მდგომარეობას, კანის ტიპს, ასაკს, ცხოვრების წესს, ჰორმონალურ ფონს, გენეტიკურ ფაქტორებს და, რაც განსაკუთრებით მნიშვნელოვანია, მის მოლოდინებს. ძალიან ხშირად პაციენტს სურს კონკრეტული პროცედურა, თუმცა პროფესიული შეფასების შემდეგ ვუხსნით, რომ მის შემთხვევაში სხვა მიდგომა უფრო ეფექტური იქნება. ჩვენი პასუხისმგებლობაა, სურვილი ყოველთვის არ დავაკმაყოფილოთ, თუ ეს სამედიცინო თვალსაზრისით სწორი გადაწყვეტილება არ არის. ინდივიდუალური მკურნალობა სწორედ ამაზე დგას – თითოეული გადაწყვეტილება მიღებულია კონკრეტული ადამიანის საჭიროებების გათვალისწინებით და არა მოდური ტენდენციების მიხედვით.
თქვენს საქმიანობაში რა უფრო მნიშვნელოვანია, უახლესი აპარატურა თუ სპეციალისტის გამოცდილება და ხედვა?
თუ არჩევანი მხოლოდ ერთზე უნდა შევაჩერო, ყოველთვის ვიტყვი – სპეციალისტი. ყველაზე ძვირადღირებული აპარატურაც კი მხოლოდ ინსტრუმენტია. შედეგს ქმნის ადამიანი, რომელმაც იცის, როდის და როგორ გამოიყენოს ეს ტექნოლოგია და საერთოდ საჭიროა თუ არა. ესთეტიკური მედიცინა მხოლოდ ტექნიკური პროცესი არ არის, მოითხოვს ანატომიის, ფიზიოლოგიის, დერმატოლოგიის, ფსიქოლოგიისა და ესთეტიკური აღქმის ერთობლივ ცოდნას. სწორედ ამიტომ, მუდმივად ვამბობ, რომ ტექნოლოგია ავითარებს შესაძლებლობებს, მაგრამ პროფესიონალიზმი განსაზღვრავს შედეგს.
გახსენდებათ თუ არა შემთხვევა, რომელმაც კიდევ ერთხელ დაგარწმუნათ, რომ ესთეტიკურ მედიცინას შეუძლია ადამიანის არა მხოლოდ გარეგნობის, არამედ თვითშეფასებისა და ცხოვრების ხარისხის შეცვლაც?
ასეთი შემთხვევა ძალიან ბევრია. არაერთხელ გვყოლია პაციენტი, რომელიც წლების განმავლობაში ერიდებოდა საზოგადოებაში გამოჩენას კანის მძიმე პრობლემების, ნაწიბურების ან სხვა ესთეტიკური დეფექტის გამო. მკურნალობის დასრულების შემდეგ კი სრულიად განსხვავებული ადამიანი გვიბრუნდებოდა, თავდაჯერებული, გახსნილი და ბედნიერი. ამ დროს ხვდები, რომ ესთეტიკური მედიცინა მხოლოდ გარეგნობას არ ეხება. ის ხშირად ადამიანს უბრუნებს სოციალურ აქტივობას, პროფესიულ თავდაჯერებას და ცხოვრების ხალისს. ჩვენ არ ვქმნით ახალ ადამიანებს, ჩვენ ვეხმარებით მათ, რომ თავი უკეთ იგრძნონ.
თქვენი აზრით, რა თვისებები უნდა ჰქონდეს თანამედროვე ესთეტიკოსს?
პირველ რიგში, პროფესიული ეთიკა. შემდეგ მოდის მუდმივი სწავლის სურვილი, პასუხისმგებლობა, კრიტიკული აზროვნება, კომუნიკაციის უნარი და ემპათია.
თანამედროვე ესთეტიკოსი ვეღარ იქნება მხოლოდ პროცედურის შემსრულებელი. ის უნდა იყოს კონსულტანტი, ანალიტიკოსი და ადამიანი, რომელიც პაციენტთან ნდობის ურთიერთობას აშენებს. ასევე აუცილებელია იმის ცოდნა, როდის უნდა თქვა „არა“. ყველა პროცედურა არ არის საჭირო და ყველა სურვილი არ არის სამედიცინო თვალსაზრისით გამართლებული.
როგორ ყალიბდება ის განსაკუთრებული ნდობა, რომელსაც პაციენტები „მილენიუმის“ მიმართ გრძნობენ?
ნდობა რეკლამით არასდროს იქმნება. ნდობა წლების განმავლობაში ჩნდება.
ჩვენ ყოველთვის ვცდილობთ, პაციენტმა იგრძნოს, რომ ჩვენი მიზანი მისთვის მხოლოდ პროცედურის ჩატარება არ არის. ჩვენ ვუსმენთ, ვუხსნით, ვუზიარებთ ინფორმაციას და გადაწყვეტილებებს ერთად ვიღებთ. პაციენტმა უნდა იცოდეს, რომ ექიმი მის ინტერესებს იცავს და არა კომერციულ მიზნებს. ვფიქრობ, სწორედ ამიტომ გვყავს ოჯახები, რომლებიც უკვე რამდენიმე თაობაა „მილენიუმს“ ენდობიან.
რას ნიშნავს თქვენთვის დედის სახელობის აკადემიის შექმნა?
ეს პროექტი ჩემთვის პროფესიულზე მეტად ემოციური მნიშვნელობის მატარებელია. დედამ მასწავლა შრომის სიყვარული, ადამიანების პატივისცემა და ცოდნის ფასი. სწორედ ამიტომ მინდა, მისი სახელი დაუკავშირდეს სივრცეს, სადაც მომავალ სპეციალისტებს არა მხოლოდ ტექნიკურ უნარებს, არამედ პროფესიულ ეთიკას, პასუხისმგებლობასა და ჰუმანურობასაც გადავცემთ.
აკადემიის მთავარი მიზანი იქნება განათლება, კვლევა, საერთაშორისო თანამშრომლობა და ისეთი პროფესიონალების აღზრდა, რომლებიც ღირსეულად წარმოადგენენ ქართულ ესთეტიკურ მედიცინას მსოფლიოში.
„მილენიუმის“ 33-წლიან ისტორიას ერთი მთავარი გზავნილით რომ აჯამებდეთ, რას ეტყოდით თქვენს პაციენტებს?
33 წელი გვასწავლის ერთ ძალიან მნიშვნელოვან ჭეშმარიტებას – ნდობა ვერ იყიდება, ის მხოლოდ წლების განმავლობაში კეთილსინდისიერი შრომით მოიპოვება. ყველა იმ ადამიანს, ვინც ამ წლების განმავლობაში ჩვენ გვერდით იყო, მინდა, გულწრფელი მადლობა გადავუხადო. მათი ნდობა გახდა ჩვენი ყველაზე დიდი პასუხისმგებლობა და მთავარი მოტივაცია.
მათ, ვინც პირველად აპირებს „მილენიუმში“ მოსვლას, ვეტყოდი, რომ აქ მხოლოდ ესთეტიკურ პროცედურას არ მიიღებენ. ისინი შეხვდებიან გუნდს, რომელიც პირველ ადგილზე აყენებს ადამიანის ჯანმრთელობას, უსაფრთხოებას, ბუნებრივ შედეგს და ინდივიდუალურ მიდგომას.
„მილენიუმისთვის“ სილამაზე მხოლოდ გარეგნობა არასდროს ყოფილა. ჩვენი მთავარი მისიაა, ადამიანმა საკუთარ თავში დაინახოს საუკეთესო ვერსია – ჯანმრთელი, თავდაჯერებული და ბედნიერი. სწორედ ამ ღირებულებებს ვემსახურებით უკვე 33 წელია და სწორედ ამ გზას გავაგრძელებთ მომავალშიც.
ტექსტი: მარიამ ირემაძე
ფოტო: ლანა ვახტანგაძე
