წლების განმავლობაში კომპანიები ფიქრობდნენ, რომ წარმატებისთვის საკმარისი იყო სწორი სტრუქტურა, ციფრები და წესები. სინამდვილეში კი, ყველაზე მნიშვნელოვანი სწორედ ის უნარებია, რაც ადამიანს ადამიანად აქცევს – აზრის გაზიარება, კომუნიკაციის ვერბალური და არავერბალური ფორმები, კონტაქტი, ემპათია და ემოციური ინტელექტი. ბიზნესს დღეს მხოლოდ სტრატეგია არა, ადამიანი მართავს. თანამედროვე ბიზნესი გადადის ცოდნაზე და კავშირზე ორიენტირებულ ეკონომიკაზე, სადაც ადამიანის კომუნიკაციური უნარი კაპიტალია.
ქეთო ჭარელაშვილი, ფსიქოლოგი, სწავლების და განვითარების მენეჯრი და სერტიფიცირებული ქოუჩი: ადამიანები არ მუშაობენ უბრალოდ კომპანიებში, ისინი ქმნიან მათ. შეიძლება შენს თანამშრომელს ჰქონდეს ყველა ტექნიკური, პროფესიული ცოდნა, მაგრამ თუ არ შეუძლია კომუნიკაცია, ის ვერ ავითარებს კლიენტს, გუნდს და ვერც საკუთარ თავს. სწავლება აღარ არის „ბონუსი“ ის არის ჰიგიენა – ფინანსური დოვლათის, მოტივაციის და სტაბილური შედეგის საფუძველი.
კომუნიკაციური უნარების განვითარება პირდაპირ კავშირშია: ფსიქოლოგიურ კეთილდღეობასთან, ლიდერულ თვითშეგნებასთან, ღირებულებების გავრცელებასთან ორგანიზაციაში და, საბოლოოდ, ფინანსურ წარმატებასთან.
ჩემთვის, ტრენინგის ჩატარების პროცესში, ყველაზე ღირებული ის მომენტია, როდესაც ადამიანი წყვეტს პასუხების მოლოდინს და იწყებს საკუთარ თავთან დიალოგს. სწორედ იქ იბადება ნამდვილი პროფესიონალი. ნამდვილი ლიდერი და ხშირად შეცვლილი გუნდის საფუძველი.
ბიზნესს და კომპანიას ყოველთვის უნდა ახსოვდეს „ყველაფერი იწყება ერთი სიტყვით, ერთი სესიით და ერთმნიშვნელოვანი გადაწყვეტილებით, ადამიანი უნდა იდგეს სამყაროს ცენტრში“. მენეჯერის ერთი სიტყვა ხშირად წყვეტს არა იმას, როგორ იმუშავებს ადამიანი, არამედ იმას, დაიჯერებს თუ არა ის საკუთარ შესაძლებლობას.
რა გავლენას ახდენს მენტალური ჯანმრთელობა გუნდის პროდუქტიულობაზე და შედეგებზე?
მენტალური ჯანმრთელობა პირდაპირ ზემოქმედებს გუნდის პროდუქტიულობაზე და შედეგებზე. დაუმუშავებელი შინაგანი გამოცდილება და ტრავმა არ ჩანს ციფრებში, მაგრამ იგრძნობა გადადებულ ზარებში, გაუგებრობაში და გაყინულ კომუნიკაციაში. შფოთვაში მყოფი ადამიანი, რომელიც საკუთარ თავს ვერ ეუბნება „მიმიღე“, ვერც კლიენტს ეტყვის „მომისმინე“. გეგმა, რომელიც ვერ სრულდება, ხშირად ემოციური მდგომარეობის შედეგია და არა მარკეტინგის შეცდომა. ემოციურად გამძლე გუნდი სწრაფად აღდგება კრიზისის შემდეგ, იღებს უფრო დაბალანსებულ გადაწყვეტილებებს და ინარჩუნებს კრეატიულობას მაშინაც, როცა გარემოებები იცვლება. სწორედ ამიტომ, მენტალური ჯანმრთელობა არა დამატებითი ფუფუნება, არამედ ბიზნესის სტრატეგიული საფუძველია.
რა სარგებელს იღებს კომპანია, როცა ადამიანს, მის რესურსებს აყენებს ცენტრში:
- გრძელვადიანი შედეგები სისტემური ზრდა და ცოდნის გადაცემა გუნდში,
- მოტივაცია და ინიციატივა პასუხისმგებლობა, რომელიც შიგნიდან მოდის,
- დამუშავებული რესურსი შემცირებული არაპროდუქტიულობა და ნაკლები გადაღლა,
- ნდობა კლიენტთან, გუნდის ფსიქოლოგიური სტაბილურობა, გარეთაც იგრძნობა,
- ეფექტური ლიდერობა, დელეგირება, უკუკავშირი, ემოციური ინტელექტი, შიდა ჰარმონია, ნაკლები კონფლიქტი, მეტი შედეგზე ფოკუსი,
- ორგანიზაციული კულტურა, ძლიერი ღირებულებები შიგნიდან გარეთ.
პირადად მე ძალიან ამაყი ვარ, რომ ვმუშაობ კომპანია „IDS Borjomi“-ში, სადაც ადამიანი ნამდვილად დგას ცენტრში, არა მხოლოდ სიტყვით, არამედ საქმით. ჩვენი კომპანია ყოველდღიურად ზრუნავს თანამშრომლების განვითარებაზე, კომუნიკაციის გაუმჯობესებასა და ფსიქოემოციური კეთილდღეობის შექმნაზე. ეს არ არის მხოლოდ ტრენინგი, ეს არის ყოველდღიური მიდგომა, კულტურა, რომელსაც ერთად ვაშენებთ.
რა მეთოდებით შეიძლება ორგანიზაციამ გაზარდოს თანამშრომლების ფსიქოემოციური კეთილდღეობა პროაქტიულობა და მოტივაცია ყოველდღიურ სამუშაო პროცესში?
ვთანამშრომლობ სხვადასხვა ორგანიზაციასთან აუთსორსის ფორმატით, ერთჯერადი ხელშეკრულების საფუძველზე ვატარებ მათზე მორგებულ ტრენინგებს, როგორიცაა: ეფექტური კომუნიკაცია, მენეჯერული უნარები, ემოციური ინტელექტი, უკუკავშირი და დელეგირება, სტრესის მართვა, მენტორინგი და გაყიდვებში კომუნიკაციური გავლენა.
თუ გსურთ, რომ თქვენი გუნდის წევრებმა ისწავლონ არა მხოლოდ უკეთ მუშაობა, არამედ უკეთ ურთიერთობა საკუთარ თავთან და ერთმანეთთან, გთავაზობთ თქვენს ბიზნესზე მორგებულ ტრენინგებს აუთსორსის ფორმატში.
მსგავსი ფორმატის ტრენინგები ხშირად იწყებს ერთ დიდ ცვლილებისა და ტრანსფორმაციის პროცესს და როცა ეს პროცესი იწყება ადამიანით, ის უკვე აღარ ჩერდება კომპეტენციებზე. იგი ეხება იდენტობას, კომუნიკაციას, თვითშეფასებას, გუნდურ დინამიკას… იგი ეხება ცვლილებას შიგნიდან, რომელიც მერე გარეთ აისახება.
ტექსტი: სოფიო მალანია
ფოტო: ალექსეი სეროვი
