თალიბანის მმართველმა სტრუქტურამ ავღანეთში ჭადრაკის თამაში, რელიგიური მოსაზრებების გამო, განუსაზღვრელი ვადით აკრძალა. ამის შესახებ ინფორმაციას ავღანური სააგენტო Khaama Press ავრცელებს.
თალიბების თქმით, ჭადრაკი შარიათის კანონში „აზარტული თამაშის საშუალებად“ მოიაზრება და მოსახლეობა მას სავარაუდოდ, ფულზე სათამაშოდ იყენებს.
როგორც სააგენტოს სპორტის განვითარების სახელმწიფო უწყებაში დაუდასტურეს, აკრძალვა „ზნეობის ხელშეწყობისა და ბიწიერების აღკვეთის სამინისტროს“ სახელით ცნობილმა უწყებამ შემოიღო. უფრო მეტიც, სამინისტრომ ავღანეთის ჭადრაკის ფედერაცია მთლიანად გააუქმა.
„ჭადრაკი, რომელიც ერთ დროს ავღანეთში პოპულარული სპორტის სახეობა იყო, ბოლო წლებში ხელახლა აღორძინდა. თალიბანის გადაწყვეტილება ასახავს მის ზოგად სტრატეგიას – რელიგიურ სამართალზე დაყრდნობით შეზღუდოს კულტურული და გასართობი საქმიანობები“ – წერს Khaama Press.
თალიბანი ავღანეთის ხელისუფლებაში ხელმეორედ 2021 წლის აგვისტოში, ამერიკული ჯარების ქვეყნიდან გასვლისა და ადგილობრივი მთავრობის დამხობის შემდეგ დაბრუნდა.
მიუხედავად იმისა, რომ თალიბებმა ქვეყანაში უსაფრთხოების აღდგენა ნაწილობრივ მოახერხეს, გაეროს მისიამ ადამიანის უფლებების დარღვევის უამრავი ფაქტი გამოავლინა. კერძოდ, თალიბები ზღუდავენ სიტყვის თავისუფლებას, რამაც 2021 წლის შემდეგ 200-ზე მეტი მედიასაშუალების დახურვა გამოიწვია. ისინი მკაცრად ახშობენ ანტისამთავრობო პროტესტებს და ოპოზიციურად განწყობილ პირებს დევნიან.
თალიბანის ხელისუფლება გაეროს წევრ არცერთ სახელმწიფოს არ უღიარებია. მიუხედავად ამისა, რამდენიმე ქვეყანამ მასთან დიალოგი დაიწყო. მაგალითად, 2023 წლის დეკემბერში ყაზახეთის ხელისუფლებამ მოძრაობა აკრძალულ ორგანიზაციათა სიიდან ამოიღო, ხოლო 2024 წლის სექტემბერში ყირგიზეთმა თალიბანი ტერორისტულ ორგანიზაციათა რეესტრიდან ამოხსნა.
2025 წლის 17 აპრილს, რუსეთის უზენაესმა სასამართლომ გენპროკურორ იგორ კრასნოვის სარჩელის საფუძველზე თალიბანის საქმიანობაზე აკრძალვა შეაჩერა. მანამდე რუსეთში თალიბანის ხსენებისას განმარტება – „აღიარებულია ტერორისტულ ორგანიზაციად და მისი საქმიანობა აკრძალულია რუსეთის ტერიტორიაზე“ – 22 წლის განმავლობაში სავალდებულო იყო.
