OK! ბათუმის სტუმარი მაია გათენაძეა – სამი შვილის დედა, მოცეკვავე და „მანიკოს ხის ნაკეთობების“ დამფუძნებელი. ძლიერი ქალი, რომელიც უბრალოდ ნივთებს კი არ ქმნის, არამედ მათ სულს, ემოციას და ისტორიას სძენს. მისი სახელოსნო მხოლოდ ხის ნივთების წარმოება არ არის, ეს არის ფერადი, თბილი სამყარო, სადაც თითოეული დეტალი ყურადღებით არის შერჩეული, ეკოლოგიურად სუფთა მასალებით დამზადებული და ბავშვებისა თუ ოჯახის ყოველდღიურობას სიხარულით ავსებს. თითოეული სათამაშო, საბავშვო ავეჯი თუ დეკორატიული ნივთი – პატარა ამბავია, გაჟღენთილი სითბოთი, სიყვარულით და შემოქმედებითი ენთუზიაზმით. მაიას შთაგონების წყარო მისი შვილებია, ხოლო თითოეული გამოწვევა ახალი შესაძლებლობა. ის გვასწავლის, რომ საკუთარი საქმისადმი სიყვარული, ნდობა, გულწრფელობა, ისეთ ხელოვნებას ქმნის, რომელიც არა მხოლოდ თვალს და გულს ახარებს, არამედ სულსაც აძლევს ფერადოვნებას.
გაეცანით OK! ბათუმის მკითხველს…
მე, მაია გათენაძე ვარ, სამი შვილის დედა, მოცეკვავე და საოჯახო სახელოსნო „მანიკოს ხის ნაკეთობების“ დამფუძნებელი.
მოგვიყევით თქვენს საქმიანობაზე. რა იყო ის ბიძგი, რომელმაც აღნიშნული გზა დაგაწყებინათ?
„მანიკო“ ჩვენი ოჯახის ისტორია და ბიზნესსაქმიანობაა, რომელიც მოიცავს ხის ნაკეთობების წარმოებას, როგორიცაა სათამაშოები, საბავშვო პერსონალური ავეჯი და ინტერიერის დეკორატიული ნივთები, რომლებსაც ეკოლოგიურად სუფთა ხის მასალებით ვამზადეთ, იხატება ანტიალერგიულ წყლის ბაზაზე დამზადებული ლაკ-საღებავებით, უსაფრთხოა როგორც ბავშვებისთვის ასევე გარემოსთვის.
ჩვენი შვილები – ნიკოლოზი და მარიამი არიან ინსპირაცია ამ წამოწყებისა და სახელწოდების. მე და ჩემს მეუღლეს, საქმისადმი სიყვარულისა და ამ პასუხისმგებლობის აღების ბიძგი მოგვცა პანდემიის პერიოდში არსებულმა თავისუფალმა დრომ და ჩვენი შვილებისთვის, სახლის პირობებში რაღაც საინტერესოს და სიახლის მიწოდების სურვილმა.
რა ხდის თქვენს საქმიანობას განსაკუთრებულს, რა არის თქვენი მოტივაციისა და შთაგონების წყარო?
ჩვენს საქმიანობას განსაკუთრებულს ხდის ის, რომ თითოეულ მომხმარებელს ვუდგებით ინდივიდუალურად და ნამუშევარში გულს, სითბოსა და დეტალებისადმი სიყვარულს ვდებთ. ჩვენი მოტივაციაა კმაყოფილი მომხმარებელი, მათი ემოცია, ნდობა კი ჩვენი შთაგონების წყარო.
იმისთვის, რომ ნდობა და წარმატება მოიპოვო – საჭიროა?
მუდმივ განვითარებაზე ფიქრი, ერთგულება და საქმისადმი დიდი სიყვარული.
რა გზავნილი გაქვთ ქალბატონებისათვის, რომლებიც ახლა იწყებენ საკუთარი გზის ძიებას?
ქალბატონებო, გადადგით მცირე ნაბიჯები დიდი წარმატებისკენ. მოუსმინეთ საკუთარ გულს, ნუ შეუშინდებით სირთულეებს და გჯეროდეთ საკუთარი შესაძლებლობების.
რა არის თქვენი მიზანი, სამომავლო გეგმა, როგორ ხედავთ საკუთარ თავს რამდენიმე წელიწადში?
ჩემი მიზანია სახელოსნოს ცნობადობა და სამომავლოდ საკუთარი მაღაზიის გახსნა.
