მელ გიბსონის ცნობილი ფილმის, „ქრისტეს ვნების“ გაგრძელება დიდ ეკრანზე ბრუნდება. რეჟისორის ახალი ფილმი, „ქრისტეს აღდგომა“ (The Resurrection of the Christ), 2004 წლის ცნობილი ბიბლიური დრამის პირდაპირი გაგრძელებაა და იესო ქრისტეს აღდგომის მოვლენებსა და მის შემდგომ პერიოდს შეეხება.
ფილმი ორ ნაწილად გამოვა. ორივე მათგანი უკვე გადაღებულია და ამჟამად პოსტპროდუქციის ეტაპზეა. „ქრისტეს აღდგომის“ პირველი ნაწილი კინოთეატრებში 2027 წლის 6 მაისს გამოვა, მეორე ნაწილი კი – 2028 წლის 25 მაისს.
თავდაპირველი გეგმით, პირველი ფილმის პრემიერა 2027 წლის 26 მარტს, დიდ პარასკევს უნდა შემდგარიყო, თუმცა გამოსვლის თარიღები შეიცვალა.
მელ გიბსონის თქმით, ისტორია მხოლოდ სახარებებში აღწერილი მოვლენებით არ შემოიფარგლება. ფილმი იესოს აღდგომის გარშემო განვითარებულ მოვლენებთან ერთად სხვადასხვა ბიბლიურ თემასაც შეეხება. მათ შორისაა ჯოჯოხეთი, დაცემული ანგელოზები და სატანის წარმოშობის საკითხი. რეჟისორს თავად აქვს ნათქვამი, რომ ფილმის სიუჟეტი არ იქნება კლასიკურად, ქრონოლოგიურად მოთხრობილი და მაყურებელს სხვადასხვა დროსა და „სამყაროში“ ამოგზაურებს.
იესო ქრისტეს როლს ფინელი მსახიობი იაკო ოჰტონენი შეასრულებს. როგორც ცნობილია, მსახიობების თითქმის მთელი ძირითადი შემადგენლობა შეიცვალა. პროდიუსერების განმარტებით, პირველი ფილმის გადაღებებიდან 20 წელზე მეტი გავიდა, ხოლო სიუჟეტის დროის მიხედვით იესოს აღდგომიდან მხოლოდ რამდენიმე დღეა გასული. ამიტომ კავიზელისა და სხვა მსახიობების დაბრუნება მათი ციფრულად გაახალგაზრდავების საჭიროებას შექმნიდა, რაც დიდ ფინანსებტანაა დაკავშირებული.
ფილმში ასევე მონაწილეობენ:
- მარია მაგდალინელს მარიელა გარიგა ასრულებს – „ქრისტეს ვნებაში“ ეს როლი მონიკა ბელუჩის ჰქონდა;
- ღვთისმშობლის როლში კასია სმუტნიაკია, რომელიც მაია მორგენშტერნს ანაცვლებს;
- პეტრეს როლს პიერ ლუიჯი პაზინო ასრულებს;
- პონტიუს პილატეს – რიკარდო სკამარჩო;
„ქრისტეს აღდგომის“ გადაღებები მთლიანად იტალიაში მიმდინარეობდა და 134 დღე გაგრძელდა. ძირითადი სამუშაოები რომში, ცნობილ Cinecittà Studios-ში ჩატარდა – სწორედ აქ გადაიღო გიბსონმა 2004 წლის „ქრისტეს ვნებაც“.
კიდევ ერთი მნიშვნელოვანი ცვლილება ენაა – „ქრისტეს ვნება“ ძირითადად არამეულ, ებრაულ და ლათინურ ენებზე იყო გადაღებული, ხოლო „ქრისტეს აღდგომის“ ორივე ნაწილი ინგლისურენოვანი იქნება.
ასევე დაგაინტერესებთ:
#OK! დაკოტა ჯონსონი მერილინ მონროს როლში – ფილმი ჰოლივუდის ლეგენდის აქამდე უცნობ მხარეს გვაჩვენებს
