მონიკა ბელუჩის ქალიშვილი, დევა კასელი, ცნობილი კლასიკური ისტორიის – „ოპერის მოჩვენების“ – ახალ ვერსიაში მთავარ როლს ასრულებს.
ფრანგი რეჟისორის, ალექსანდრ კასტანეტის ფილმი გასტონ ლერუს 1910 წელს გამოცემული რომანის თანამედროვე ადაპტაციაა. ისტორია ამჯერად თანამედროვე პარიზში ვითარდება და კლასიკურ სიუჟეტს რომანტიკისა და ფენტეზის ელემენტებთან აერთიანებს. ფილმის ერთ-ერთ მთავარ შთაგონებად კი „Twilight“-ის საგა სახელდება.
„სიყვარულის ჩრდილში, ნიღაბი ყველაფერს ამჟღავნებს… მადლობა ამ საოცარ გუნდს ჩემ გვერდით სიარულისთვის. თქვენმა ნდობამ ძალა მომცა და თქვენი უზომოდ მადლიერი ვარ… სულმოუთქმელად ველოდები, როდის იხილავთ ამ სანახაობას!“ – წერს დევა.
„ოპერის მოჩვენებაში“ დევა ბალერინას როლს ასრულებს. მსახიობის თქმით, გადაღებებამდე კვირაში ხუთჯერ ვარჯიშობდა, რათა ეკრანზე პროფესიონალი მოცეკვავის მოძრაობები დამაჯერებლად გადმოეცა.
ფილმში ასევე მონაწილეობენ ჟულიენ დე სენ-ჟანი, რომენ დიურისი და პარიზის ოპერის ბალეტის მსახიობები. გადაღებების ნაწილი თავად პარიზის ოპერაში მიმდინარეობდა.
რეჟისორის ჩანაფიქრით, ახალი „ოპერის მოჩვენება“ კლასიკური ისტორიისა და თანამედროვე რომანტიკული ფენტეზის ერთგვარი ნაზავია. ფილმის ვიზუალურ და შემოქმედებით შთაგონებებს შორის „Twilight“-თან ერთად ბრაიან დე პალმას „Phantom of the Paradise“, ასევე ჰაიაო მიაძაკისა და გილერმო დელ ტოროს ნამუშევრებიც სახელდება.
„ოპერის მოჩვენების“ ახალი ვერსია საფრანგეთის კინოთეატრებში 2026 წლის 28 ოქტომბერს გამოვა.
ასევე დაგაინტერესებთ:
#OK! მონიკა ბელუჩის ქალიშვილი, ლეონი კასელი, Vogue-ის ყდაზე გამოჩნდა
