ზაფხული საუკეთესო დროა სასიამოვნო წიგნების წასაკითხად. გთავაზობთ ზაფხულში შვილებთან ერთად წასაკითხ 3 წიგნს, რომელიც არდადეგებს ნაყოფიერს და საინტერესოს გახდის.
რევაზ ინანიშვილი – ბიბო და სხვა მოთხრობები
ინანიშვილი ამბობდა, რომ ბავშვებს სიყვარული და ემპათიის გრძნობა პატარაობიდანვე უნდა გავუღვივოთ, რათა სხვა ღირებულებები თავისთავად ჩამოყალიბდეს მათ სულში.
ამ წიგნით გაიცნობთ ოთხი წლის ბიჭუნა ბიბოს, რომელსაც დიდი ადამიანივით აწუხებს საფიქრალ-სადარდელი; შიო პაპას, რომელსაც თავისი სახედარი მსოფლიოს ყველა საუკეთესო ავტომობილს ურჩევნია; თეთრცხვირიან და შავცხვირიან ციყვებს, პატარა მელუკას, რომელსაც საოცარი თავგადასავალი გადახდება…
ასტრიდ ლინდგრენი – ბულერბიელი ბავშვები
შვედეთის პატარა სოფელ ბულერბიში სულ სამი სახლი დგას: ერთში 7 წლის ლიზა ცხოვრობს თავის უფროს ძმებთან, ლასესა და ბოსესთან ერთად, მეორე სახლში ორი გოგონა – ბრიტა და ანა, მესამეში კი – ბიჭუნა ულე. ეს ბავშვები მეგობრები არიან – სულ ერთად თამაშობენ, სკოლაში დადიან, მშობლებს ეხმარებიან…
წაიკითხეთ ამ ექვსი არაჩვეულებრივი ბავშვის ყოველდღიური ამბები და იხალისეთ მათთან ერთად.
იოჰანა შპირი – ჰაიდი
პატარა ობოლი გოგონა, ჰაიდი, შვეიცარიის მთებში პაპასთან ერთად ცხოვრობს. მიუხედავად განსხვავებული ხასიათებისა, პაპა და შვილიშვილი მშვენივრად ეწყობიან ერთმანეთს და მეგობრულად ცხოვრობენ.
გულკეთილი და მხიარული ჰაიდი მუდამ იმის ცდაშია, დაეხმაროს გარშემომყოფებს, სიყვარული და ბედნიერება აჩუქოს მათ. ისინიც სიყვარულითა და მადლიერებით პასუხობენ გოგონას.
