„ჩოკოლატლი“ ჩირისა და შოკოლადისგან დამზადებულ უგემრიელეს, სასარგებლო და განსხვავებულ ქართულ ტკბილეულს გთავაზობთ. ის მუდმივად ცდილობს მომხმარებლის სასიამოვნო სიახლეებით განებივრებასა და ასორტიმენტის გამრავალფეროვნებას. მისი პროდუქციის შეძენა შესაძლებელია როგორც ონლაინ, ისე ხაშურის, ახალციხის, ჭიათურისა და საჩხერის მაღაზიებში. დეტალური ინფორმაციისთვის OK! გაესაუბრა „ჩოკოლატლის“ შემქმნელებს ანა ქიმერიძესა და მირანდა გოგალაძეს.
გვიამბეთ „ჩოკოლატლის“ შექმნის შესახებ.
“ჩოკოლატლის” ისტორია დაიწყო ჩვენი ჩირებისადმი სიყვარულით. თავდაპირველად დავიწყეთ ჩირების გამოშრობა. შემდეგ ისინი ამოვავლეთ შოკოლადში და რადგან მან დიდი მოწონება დაიმსახურა, გაგვიჩნდა იდეა, რომ პირიქით შოკოლადები გაგვეფორმებინა ჩვენი ჩირებით, რაზეც უფრო დიდი მოთხოვნა გაჩნდა და ვიფიქრეთ, რომ გვეცადა ბიზნესად გვექცია ყოველივე ეს. ჩვენმა შრომამ გაამართლა. სულ რამდენიმე თვეა, რაც „ჩოკოლატლი“ ე.წ. ბიზნესად ვაქციეთ. დავიწყეთ სახელზე ფიქრი, ბრენდირება და ა. შ. ბევრი რამ არ ვიცოდით შოკოლადის შესახებ, ამდენად, მოვიძიეთ ინფორმაცია, რომლის შესწავლის პროცესშიც დაიბადა სახელი. სიტყვა „შოკოლადი“ კაკაოს მარცვლებისაგან დამზადებული სასმელის „ჩოკოლატლის“ დასახელებიდან მომდინარეობს. აცტეკების ენაზე „ჩოკოლი“ ნიშნავს სიმწარეს, ხოლო „ატლი“ წყალს, რომლისგანაც შოკოლადის სასმელი მზადდება. რადგან შოკოლადის სახელწოდება „ჩოკოლატლისგან“ მოდის გადავწყვიტეთ, რომ ეს სახელი ძალიან მოუხდებოდა ჩვენს ჩირებით გაფორმებულ შოკოლადებს.
რა სახის პროდუქციას სთავაზობთ მომხმარებლებს?
ამ ეტაპზე მომხმარებლებს ვთავაზობთ შავი და თეთრი შოკოლადის „მენდიანტებს“ და „ფილებს“, სხვადასხვა ჩირეულით და თხილეულით გაფორმებულს. ასევე გვაქვს შოკოლადში ამოვლებული გოზინაყის ბურთები. აღსანიშნავია, რომ ჩვენ მუდმივათ ვმუშაობთ ასორტიმენტის განახლების კუთხითაც.
რა არის ის მთავარი ნიშა, რაც „ჩოკოლატლს“ გამოარჩევს?
„ჩოკოლატლს“ გამოარჩევს მისი გემოვნური თვისებები და დიზაინი, შეფუთვა, რომელიც განსხვავებულია სხვა პროდუქციებისაგან.
სად შეუძლიათ მომხმარებლებს თქვენი პროდიქციის შეძენა?
მომხმარებელს „ჩოკოლატლის“ შეძენა შეუძლიათ ჩვენს Facebook და Instagram გვერდებზე. ასევე ხაშურის, ახალციხის, ჭიათურისა და საჩხერის მაღაზიებში. თბილისში და დანარჩენ სხვა ქალაქებში ამ ეტაპზე მხოლოდ ფოსტით ხდება მიწოდება.
სამომავლო გეგმები.
სამომავლო გეგმები, რა თქმა უნდა, გვაქვს. ვინაიდან „ჩოკოლატლის“ წარმოება ხდება ქ. ხაშურში, გვინდა ჩვენი მაღაზიის გახსნა. ვნახოთ, როგორ წარიმართება საქმიანობა, ყველაფერი წინ გვაქვს.
საკონტაქტო ინფორმაცია:
598000566
Facebook: Chocolatli-ჩოკოლატლი
Instagram: choco_latli
ტექსტი: მარიამ მთივლიშვილი
