ტანსაცმლის შერჩევისა და სტილის ჩამოყალიბების პროცესი გარკვეულ სირთულეებთანაა დაკავშირებული, რომლის დროსაც პროფესიონალთა ჩართულობა და რჩევები გადაწყვეტილების მიღებას აიოლებს. თეკო ვარდანიძე ქართველი დიზაინერია, რომელსაც მოდის სფეროში საკუთარი ხელწერა აქვს, რაც სადღესასწაულო ფერებსა და ნამუშევრებით განწყობის შექმნას გულისხმობს. როგორც თავად ამბობს, თავდაპირველად ეს ერთგვარი ჰობი იყო, რომელიც შემდეგ პროფესიად აქცია. მის მიერ დაფუძნებული სამკერვალო-სალონი გამოჩენის დღიდან მომხმარებელს უმაღლესი ხარისხის მასალისგან შექმნილი ტანისამოსით ანებივრებს. უფრო მეტი დეტალისა და ინფორმაციის გასაგებად, გთავაზობთ ინტერვიუს თეკო ვარდანიძესთან, რომელიც საკუთარ საქმიანობასა და გამოცდილებებზე ჟურნალ OK-ის მკითხველს უამბობს.
როდის გაიაზრეთ, რომ თქვენი პროფესია დიზაინერობასთან უნდა დაგეკავშირებინათ?
შეიძლება ითქვას, რომ უკვე ღრმა ბავშვობიდან ვიცოდი, როგორ და რა კუთხით უნდა განვვითარებულიყავი და წარმემართა ჩემი პროფესია. ყველაზე სასიამოვნო პროცესი და გამოცდილებაა, როდესაც საკუთარ ჰობის შენს პროფესიულ საქმიანობად აქცევ.
როგორ გაჩნდა ატელიეს შექმნის იდეა?
თავდაპირველად ჩემი ნამუშევრების გაცნობა მომხმარებლისთვის ონლაინ დავიწყე. პროდუქცია მალევე გახდა პოპულარული და მოთხოვნადი. საზოგადოების მუდმივმა გამოხმაურებამ და მომხმარებელთა სიმრავლემ ბიძგი მომცა, შემექმნა სივრცე, სადაც ჩემს წარმოსახვებსა და შინაგან განწყობილებებს უფრო ფართო მასშტაბებში გამოვხატავდი. ჩემი სამკერვალო-სალონი ბაზარზე 2020 წლის 5 ნოემბრიდან ფუნქციონირებს.
რას სთავაზობთ საზოგადოებას?
ჩვენი ძირითადი მიმართულება საღამოს კაბების შექმნაა. მომხმარებელს ადგილზე ვთავაზობთ როგორც მზა, ასევე სასურველი დიზაინით შექმნილ სამოსს, რომელსაც უმოკლეს დროში ვამზადებთ.
როგორ ფიქრობთ, რამ განაპირობა თქვენი წარმატება?
განვლილმა წლებმა არაერთი გამოცდილება შემძინა და მასწავლა, თუ როგორ უნდა გადამელახა დაბრკოლებები. შეიძლება ითქვას, რომ გახსნის დღიდან მყარად ვაგრძელებთ განვითარებასა და ბაზარზე ჩვენი სიტყვის თქმას. ეს არის სფერო, რომელიც მოდუნების საშუალებას არ გაძლევს. მუდმივად ვცდილობ სიახლეებს არ ჩამოვრჩე, ტენდენციები ავითვისო და დავხვეწო. სწორედ ამიტომ ვფიქრობ, რომ ამ ბიზნესის წარმატება ჩემი გუნდის სიძლიერემ და კრეტიულობამ განაპირობა. ასევე, ამ კუთხით თანაბრად მნიშვნელოვანია ხარისხიც. ის ძვირფასი და ნატურალური ქსოვილები, რომლითაც ჩვენი ნამუშევრები იქმნება, გარკვეულწილად განსაზღვრავს კმაყოფილ მომხმარებელს, რაც პირდაპირკავშირშია წარმატებასთან.
რა გამოარჩევს ატელიეს მიერ შექმნილ სამოსს ბაზარზე?
ვფიქრობ, ჩვენი სტილი და კონკრეტული ხაზი, რომელსაც უკვე რამდენიმე წელია ვნერგავთ ბაზარზე, საშუალებას გვაძლევს, გამორჩეულები ვიყოთ ამ სფეროში. მუდმივად ვცდილობთ ჩვენი კაბები სხვადასხვა დეტალით და ხელით რთულად შესასრულებელი სამუშაოებით დავტვირთოთ, რათა ჩვენი ნიშა მარტივად ამოსაცნობი და შესამჩნევი იყოს.
გვესაუბრეთ თქვენს მომხმარებლებსა და მათ უკუკავშირზე.
ყველა კატეგორიის მომხმარებელთან გვაქვს ურთიერთობა, ასაკის შეუზღუდავად, თუმცა გამოვარჩევდი თინეიჯერ გოგონებსა და მათ ემიგრანტ დედებს, რომელთა გამოხმაურებები უდიდესი მოტივაციაა ჩვენთვის. ყველაზე ბედნიერი ვარ, როცა მათგან მადლიერებას ვგრძნობ და უამრავ დადებით მესიჯს ვიღებ, რომ მოლოდინი მაქსიმალურად გავუმართლეთ და საბოლოო შედეგით კმაყოფილები არიან.
სამომავლო გეგმები.
პირველ რიგში, ჩვენი სამომავლო მიზანია ბაზარზე უფრო მყარად გავიდგათ ფესვები. გაზრდილი მოთხოვნილებიდან გამომდინარე, უახლოეს მომავალში ვგეგმავთ გაფართოებას და ახალი ფილიალის გახსნას. რაც შეეხება უფრო შორეულ პერპექტივას, ჩვენი მიზანი არამარტო ქვეყნის, არამედ მის ფარგლებს გარეთაც ბაზრის ათვისებაა. მადლობა თითოეულ მომხმარებელს, რომელიც საშუალებას გვაძლევს, მიზნები რეალობად ვაქციოთ.
ტექსტი: მაკუნა შავგულიძე
ფოტო: ნინი გორდაძე
