მინდა მივესალმო ჟურნალ OK! ბათუმის არაჩვეულებრივ მკითხველს. მართალი გითხრათ, ახლაც ვღელავ, როცა თქვენთვის მოსაყოლ ამბავს ვწერ და მაშინაც ვღელავდი, როცა ჟურნალ OK!-ს რედაქტორმა, მაიკო წერეთელმა, OK! ბათუმის რედაქტორად მომიწვია, რაც დიდი პატივია ჩემთვის. მადლობა მას ნდობისთვის. ვწერ და მინდა ლამაზად გამომივიდეს, თუმცა, აქვე უნდა ვაღიარო, რომ, ხატვისგან განსხვავებით, წერა არ არის ჩემი ძლიერი მხარე. მახსენდება ემოციები, როცა ბავშვობაში, არდადეგებზე, ქალაქგარეთ მივდიოდი და მეკითხებოდნენ საიდან ხარო, როგორი სიამაყით და სიყვარულით ანთებული თვალებით ვპასუხობდი, რომ ბათუმელი ვარ, ასეთივე ემოციები მეუფლება დღესაც. ბათუმი ჩემთვის არ არის მხოლოდ ის ადგილი სადაც ვცხოვრობ, ბათუმი ჩემი ფიქრების, მუზების, ემოციების ნავსაყუდელია. სწორედ ამ ქალაქის დამსახურებაა, რომ ჩემი შემოქმედება საინტერესო, დახვეწილი დ ა მრავალფეროვანია, მუშაობისას ბათუმი მაძლევს ინსპირაციას. უსასრულოდ შემიძლია ლაპარაკი ამ ქალაქზე, ხალხზე, ზღვაზე, მანდარინისა და ლიმნის ბაღებზე, ბედნიერი ვარ, რომ ამ ქალაქში დავიბადე და ვცხოვრობ, ქალაქში, რომელსაც უდიდესი სიყვარული შეუძლია. ბათუმის მზის ჩასვლა ოქროსფერია. „რენჯროვერის“ დიზაინერმა ეს ინსპირაცია ახალი მარკის ფერში გამოიყენა და ბათუმის ოქროსფერი უწოდა. მეც ვეთანხმები ამ შეფასებას, ბათუმი მართლაც ოქროსფერია. OK! ბათუმის საშუალებით მინდა ჩემს ოქროსფერ ბათუმში გამოგზაუროთ, გაგაცნოთ ოქროს ადამიანები, რომლებისთვისაც ბათუმის სიყვარული შეუცვლელია. მართალია, ყველა მათგანის გაცნობა თქვენთვის ამ ნომერში ვერ მოვახერხეთ, თუმცა, OK! ბათუმი ყოველწლიურად ცდილობს საინტერესო და წარმატებული ადამიანები კიდევ უფრო ახლებურად გაგაცნოთ. ცოტას მოდაზეც ვილაპარაკებ, აქ ბევრად თამამი ვარ. მოდა, ვიზუალზე ასახული, შინაგანი მეს ერთგვარი გამოვლინებაა. ჩემი მისამართით ხშირად ისმის კითხვები: რა არის დღეს მოდაში? რა ჩავიცვათ? ადამიანები, რომლებსაც ინდივიდუალიზმი ახასიათებთ, ხაზს უსვამენ რა მოსწონთ, მათთვის ეს არის მოდა. მოკლედ რომ გითხრათ, რაც გვიხდება და რაშიც თავს კომფორტულად ვგრძნობთ, ის არის მოდაში. რაც არ უნდა ეცვას, ყველაზე ლამაზი ის ადამიანია, რომელიც თვალებიდან სიყვარულს ასხივებს. თუ გვინდა ბედნიერები ვიყოთ, უნდა გვიყვარდეს ერთმანეთი და თვით სიყვარული…
