მასპინძლობა და ტურიზმი სახელმწიფოს მომავალი განვითარების თვალსაზრისით უმნიშვნელოვანესი საქმიანობის სფეროა. აღნიშნული სფეროს განვითარებისთვის კი საჭიროა სპეციალისტების აღზრდა, მათი სათანადო ცოდნით აღჭურვა. სწორედ ამ მიზნის გარშემო გაერთიანდა საქართველოს ეროვნული უნივერსიტეტი SEU და მასპინძლობის მენეჯმენტისა და ტურიზმის სფეროში მსოფლიოს N1 უნივერსიტეტი – Hospitality Business School-ი (EHL). სრულიად ახალი კამპუსის ფარგლებში შეიქმნება მასპინძლობისა და ტურიზმის სფეროს პროფესიული, საბაკალავრო და სამაგისტრო პროგრამები, რაც სტუდენტებს მისცემს შესაძლებლობას, თეორიულ ცოდნასთან ერთად გამოიმუშაონ პრაქტიკული უნარ-ჩვევები და გაიკვლიონ გზა გლობალურ ასპარეზზე. აღნიშნულ საკითხზე უფრო ვრცლად საქართველოს ეროვნული უნივერსიტეტის SEU-ს რექტორი და დამფუძნებელი, გია კავთელიშვილი გვესაუბრა.
ბატონო გია, როდის დაიწყო SEU-ს და EHL-ის თანამშრომლობა? და რა იყო მისი მიზანი?
SEU-სა და EHL-ს შორის თანამშრომლობა 1 წლის წინ დაიწყო და სწორედ ამ პარტნიორობის ფარგლებში, 10-13ივნისს SEU-ს დელეგაცია ვიმყოფებოდით შვეიცარიაში. ვეწვიეთ EHL-ის კამპუსს, შევხვდით აკადემიურ პერსონალს და ვისაუბრეთ არსებული თანამშრომლობის გაძლიერებაზე.
საქართველოსა და მთელ სამხრეთ კავკასიაში ეს უპრეცედენტო მოვლენაა მასპინძლობის სფეროში – განათლებისა და პროფესიული გადამზადების მიმართულებით. ცენტრის მისიაა სტუდენტები აღჭურვოს პრაქტიკული უნარებითა და ინდუსტრიულ სპეციფიკაზე მორგებული ცოდნით, რაც უზრუნველყოფს მათ მზაობას როგორც რეგიონული, ასევე საერთაშორისო, დინამიკური მასპინძლობის სექტორისთვის.
SEU-ს და EHL-ის თანამშრომლობის მთავარი მიზანი კი ერთობლივი პროფესიული, საბაკალავრო და სამაგისტრო პროგრამების განვითარება, ხარისხიანი განათლების გაზრდა ტურიზმისა და მასპინძლობის სფეროს მიმართულებით და EHL-ის პრაქტიკის დანერგვაა საქართველოში.
გვესაუბრეთ, რა პროგრამას სთავაზობთ მომავალ სტუდენტებს?
ამჟამად ვიწყებთ პროფესიული და საბაკალავრო განათლებით, შემდეგ დაემატება სამაგისტრო მიმართულება. თავდაპირველად პროფესიული განათლების ცენტრში იქნება კულინარიისა და რესტორნის მენეჯმენტის სასერტიფიკატო პროგრამა. რაც შეეხება საბაკალავრო და სამაგისტრო საფეხურს, ამ მიმართულებით იგეგმება მასპინძლობის მენეჯმენტის, ტურიზმის, გლობალური მასპინძლობის მენეჯმენტის მიმართულებით ერთობლივი პროგრამების შემუშავება.
აღნიშნული პროგრამები ასევე მოიცავს ბიზნესის სფეროსთან დაკავშირებული დისციპლინების სწავლებას, როგორიცაა მარკეტინგი, ფინანსები, მენეჯმენტი, მეწარმეობა და სხვ. აღსანიშნავია, რომ ამ პროგრამების კურსდამთავრებულებს შესაძლებლობა ექნებათ, დასაქმდნენ წამყვან საერთაშორისო ბიზნესმიმართულების ორგანიზაციებში.
რა არის ამ პროგრამის უმთავრესი მიზანი?
ჩვენთვის მნიშვნელოვანია, რომ ერთობლივი ძალებით შევძლოთ მოვამზადოთ დარგის წამყვანი სპეციალისტები, რითაც ხელს შევუწყობთ ქვეყანაში და მთლიანად სამხრეთ კავკასიის რეგიონში მასპინძლობის სფეროსა და ტურიზმის სექტორის განვითარებას.
სტუდენტებს შესაძლებლობა ექნებათ, შეისწავლონ მასპინძლობის ინდუსტრიის მრავალი შესაძლებლობა და გამოწვევა, ამავდროულად, გაეცნონ ინოვაციურ აზროვნებასა და თანამედროვე მიდგომებს. EHL-ის მხარდაჭერით, სტუდენტებს მივაწვდით ხარისხიან განათლებას მასპინძლობის სფეროში, რომელიც აკმაყოფილებს მაღალი ხარისხის სტანდარტებს, რამაც განაპირობა EHL-ის მსოფლიო მასშტაბის რეპუტაცია 1893 წლიდან.
სწავლის დასრულების შემდეგ გაიცემა EHL-ისა და SEU-ს მხრიდან ხელმოწერილი დოკუმენტი, ორმაგი დიპლომი. ეს ეხება როგორც პროფესიულ, ასევე საბაკალავრო და სამაგისტრო პროგრამებს. ასევე, აღსანიშნავია რომ სტუდენტებს სწავლის პერიოდში შესაძლებლობა ექნებათ, ისწავლონ EHL-ის ნებისმიერ ფილიალში, სხვადასხვა ქვეყანაში და, რაც მთავარია, ეს პერიოდი უღიარდებათ.
რა თქმა უნდა, აღსანიშნავია, რომ EHL-ის უნივერსიტეტი არის საერთაშორისო ცნობილი, ძალიან პრესტიჟული ბრენდი, რომლის კურსდამთავრებულებისთვის, შეიძლება ითქვას, ყველა კარი ღიაა მასპინძლობის ინდუსტრიაში, მსოფლიოს ნებისმიერ ადგილას. EHL აერთიანებს წამყვანი აკადემიური და ინდუსტრიის მოთამაშეების ქსელს. ასევე, სტუდენტებს აქვთ შესაძლებლობა, სწავლის პერიოდში წვდომა ჰქონდეთ სტაჟირებებსა და სამუშაო შეთავაზებაზე, რასაც EHL-ის პარტნიორი კომპანიები სთავაზობენ. აღსანიშნავია, რომ EHL-ს ჰყავს 25000-ზე მეტი კურსდამთავრებული.
თავის მხრივ, SEU-ს პარტნიორებმა მკაფიოდ დააფიქსირეს თავიანთი დადებითი დამოკიდებულება და მზაობა ამ ახალი მასშტაბური პროექტის მიმართ:
„SEU-ს მაღალი აკადემიური სტანდარტებისა და EHL-ის გამოცდილების კომბინირებით, რომელიც 130 წელია ქმნის განათლების უმაღლეს სტანდარტს მასპინძლობის სფეროში, დარწმუნებულნი ვართ, რომ სტუდენტები მიიღებენ უბადლო გადამზადებას. ჩვენ ერთობლივი ძალისხმევით გავუკვალავთ გზას ახალ თაობებს, რომლებიც აამაღლებენ ინდუსტრიაში არსებულ მომსახურებას და დანერგავენ ინოვაციურ სტანდარტებს“.
ტექსტი: სოფიო მალანია
ფოტო: საქართველოს ეროვნული უნივერსიტეტი SEU
