მოგეხსენებათ, ტანსაცმლის სწრაფი და უხარისხო წარმოება ამავე ტანსაცმლის ნაგავსაყრელზე სწრაფად მოხვედრას იწვევს. სწრაფი მოდით გამოწვეულ დაბინძურებას კი დიდი გავლენა აქვს ეკოსისტემაზე. სწორედ ამიტომ, დღითიდღე იზრდება იმ ბრენდების რიცხვი, რომლებიც მდგრადი მოდის მხარდაჭერები ხდებიან. გარდა ბრენდებისა, ინდივიდებიც მიმართავენ მდგრადის მოდის სხვადასხვა ფორმას, ზოგიერთი ადამიანი უპირატესობას ანიჭებს ეკოლოგიურად დამზადებული სამოსის შეძენას, ზოგიც კი მეორად (ვინტაჟურ) სამოსზე აკეთებს არჩევანს. იმისთვის, რომ ჩვენმა სამოსმა რაც შეიძლება დიდხანს შეინარჩუნოს პირვანდელი სახე, „პერვოლის“ სარეცხი საშუალებები საუკეთესო არჩევანია.
„პერვოლის“, როგორც ბრენდის, ერთ-ერთი მთავარი ღირებულება ეკოსისტემაზე ზრუნვა და მდგრადი მოდის მხარდაჭერაა. სწორედ ეს ღირებულება აღმოჩნდა კომპანია FCB Artgroup Tbilisi-სა და „პერვოლის“ თანამშრომლობის საწინდარი. მათ ერთობლივ კამპანიას – „დროის კაფსულის კოლექციას“ დიდი გამოხმაურება მოჰყვა.
„თემა გლობალურად მნიშვნელოვანია, არაერთი კამპანიაც გვინახავს, ამიტომ ჩვენთვის მნიშვნელოვანი იყო ახალი პერსპექტივის დანახვა. ასე მივაგენით ინსაითს: ყველას გვაცვია მშობლის/ბებია-ბაბუის ტანსაცმელი, რომელსაც განსაკუთრებულად ვუფრთხილდებით. ვიფიქრეთ, საკუთარი გამოცდილება უფრო ემოციური იქნებოდა, ვიდრე ზოგადად პლანეტის შენარჩუნებაზე საუბარი. ამიტომ სპეციალურად კამპანიისთვის დამზადდა „დროის კაფსულის კოლექცია“, რომელიც, სწრაფი მოდისგან განსხვავებით, ისე შეიქმნა, რომ დროს გაუძლოს და სწორი მოვლის შემთხვევაში ჩვენმა შვილებმა, საყვარელმა ადამიანებმა ან თუნდაც სრულიად უცნობებმა, ათწლეულების შემდეგ მოირგონ“, – აღნიშნავენ FCB Artgroup Tbilisi-ს სააგენტოში.
აღსანიშნავია, რომ კამპანიის პოპულარიზაციისთვის შეირჩა ინფლუენსერები და ცნობილი სახეები – ის ადამიანები, ვინც „პერვოლის“ ღირებულებებს იზიარებენ და ატარებენ ისეთ სამოსს, რომელიც მშობლებისგან ან ბებია-ბაბუისგან ერგოთ. ვიდეორგოლებში მონაწილეობენ: დედა-შვილი კრისტი ყიფშიძე & ნატალია ყიფშიძე, დედა-შვილი ლაშა ფოქსი და მანანა ჭანტურია , ბებია-შვილიშვილი კირა ანდრონიკაშვილი და ლიკა ევგენიძე, მამა-შვილი გიორგი მახარაძე და ელენე მახარაძე და დედა-შვილი რუსკა მაყაშვილი და თამარ მაყაშვილი. ამ ვიდეოების მთავარი მესიჯი ტანსაცმელზე ზრუნვით გარემოზე ზრუნვაა. სამოსის სწორი მოვლით და დიდხანს შენარჩუნებით ჩვენ ვუფრთხილდეთ იმ ემოციებსა და ამბებს, რასაც ესა თუ ის სამოსი ატარებს და, რა თქმა უნდა, ამ ყველაფრით ჩვენი წვლილი შეგვაქვს გარემოს დაბინძურების შემცირებაში.
„ვიდეოებში ცნობილი ადამიანები ტანსაცმლის მოვლის ექსპერტების სამფლობელოში – სამრეცხაოში იმყოფებიან, სადაც მათი მშობლების ნივთების ამბავს ჰყვებიან და ისტორიებს აცოცხლებენ. ამ გზით შევეცადეთ საზოგადოებისთვის შეგვეხსენებინა, რომ ტანსაცმელი უბრალოდ, ნივთი არ არის და ის ისტორიას ატარებს. ჩვენთვის ასევე, მნიშვნელოვანია უკუკავშირი, ვიდეოებს დადებითი გამოხმაურება მოჰყვა. ამ კამპანით დაახლოებით 2მლნ-მდე ადამიანს მივაწვდინეთ ხმა, გავაცანით „პერვოლის“ ღირებულებები და იმედი გვაქვს, ამ ემოციური კომპონენტის დამატებით, მდგრადობისკენ ოდნავ მაინც ვუბიძგეთ“.
FCB Artgroup Tbilisi მრავალწლიანი გამოცდილების მქონე პროფესიონალებითა და ახალგაზრდა ტალანტებით არის დაკომპლექტებული. კომპანიის მთავარი მიმართულება დიჯითალ და ინტეგრირებული კამპანიებია, რომელთა ფარგლებშიც მუშაობენ კრეატიულ კონცეფციაზე, ფოტო/ვიდეოგადაღებებზე, ბრენდირებასა და ცოცხალ კონტენტზე. სააგენტო ბრენდებს კრეატიულ, ახლებურ, რელევანტურ და, რაც მთავარია, მათზე მორგებულ გადაწყვეტებს სთავაზობს.
როგორც სააგენტოში აღნიშნავენ, 2024 წელი საკმაოდ წარმატებული და ნაყოფიერი იყო. კომპანიამ წარმატებით ითანამშრომლა რეგიონის წარმომადგენელ სხვა ოფისებთან (ყაზახეთი, უზბეკეთი, თურქეთი, აზერბაიჯანი, გერმანია, უკრაინა).
„2025 წელს გვსურს უფრო აქტიურად ვითანამშრომლოთ FCB Artgroup-ის რეგიონულ ოფისებთან, განსაკუთრებით: კრეატიული კონცეფციის, ვიდეოგადაღებებისა და ბრენდირების კუთხით. რაც, ვფიქრობთ, საინტერესო იქნება როგორც ქართული ბაზრისთვის, ასევე რეგიონული ბაზრისა და კრეატიული ინდუსტრიისთვის“, – ამბობენ სააგენტოში.
ტექსტი: სოფიო მალანია
ფოტო: Juda Khatia Psuturi
