რეცეპტი
„მადლენი“ ტრადიციული ფრანგული ბისკვიტია, რომელიც ნებისმიერი დესერტის ასაწყობად გამოდგება. თუმცა, თუ მოგეპოვებათ ნიჟარის ფორმის პატარა „მადლენების“ ყალიბი, იდეალური ბისკვიტები შეგიძლიათ აცხოთ სხვადასხვა არომატით. ნეიტრალურ ცომს ვამატებთ: ლიმონის ცედრას, ფსტის პასტას, ვანილს, კაკაოს, თაფლს, გულში ჩავუდებთ ჯემს, შოკოლადს და ა.შ.
„მადლენის“ ბისკვიტის რეცეპტი ასეთია:
2 კვერცხი
85 გრ შაქარი
30 გრ რძე
125 გრ ფქვილი
5 გრ გამაფხვიერებელი
125 გრ კარაქი
(25 გრ ფსტის პასტა, ჟოლოს ჯემი)
10 გრ კარაქი ყალიბისთვის
დაადნეთ კარაქი.
კვერცხი და შაქარი ათქვიფეთ გათეთრებამდე, დაუმატეთ რძე, ისევ გადათქვიფეთ (ვმუშაობთ მიქსერით). თუ ამატებთ ფსტის პასტას, ფქვილის ჩაყრამდე უნდა დაამატოთ. ფქვილი და გამაფხვიერებელი დაამატეთ კვერცხიან მასას, გადადით ხელის სათქვეფზე, კარგად გადაურიეთ, დაუმატეთ დამდნარი კარაქი. მოურიეთ, შეფუთეთ ჯამი და ცომი შეინახეთ მაცივარში, მინიმუმ 2 საათით ან მთელი ღამით.
გააცხელეთ ღუმელი 200 გრადუსზე. ყალიბს ფუნჯით წაუსვით დამდნარი კარაქი. ჩადეთ ცომი კოვზით ან საკონდიტრო ტომრით, უნდა შეავსოთ ყალიბის 2/3. ჯემი შეგიძლიათ პატარა კოვზით გულში ჩაუდოთ და დამალოთ ცომით. აცხვეთ 13-15 წუთი. ამ რაოდენობის ცომით გამოგივათ დაახლოებით 20 ცალი ნამცხვარი.
