საფრანგეთის ხელისუფლებამ ლუვრის მუზეუმი სასწრაფოდ დახურა მას შემდეგ, რაც ნაპოლეონ ბონაპარტისა და ჟოზეფინას კოლექციიდან ფასდაუდებელი სამკაულები მოიპარეს.
შინაგან საქმეთა სამინისტროს მიერ გავრცელებული ინფორმაციის თანახმად, ძარცვა 7 წუთს გარძელდა. ამ დროის მანძილზე ოთხი დამნაშავე მუზეუმში გვერდით მდებარე შენობიდან შეიპარა, სადაც სამშენებლო სამუშაოები მიმდინარეობს, სატვირთო ლიფტით აპოლონის გალერეაში შეაღწია და იმპერატორ ნაპოლეონისა და ჟოზეფინას კოლექციიდან ცხრა სამკაული, მათ შორის, დიადემა, გულსაბნევი და ყელსაბამი მოიპარა.
ვარაუდობენ, რომ ქურდებმა მუზეუმში ამ ფანჯრიდან შეაღწიეს.
პარიზის პროკურატურამ დაადასტურა, რომ ლუვრში „სამკაულების ქურდობა“ მოხდა. პროკურატურამ გამოძიება ორგანიზებული ძარცვისა და დანაშაულებრივი შეთქმულების ფაქტებზე დაიწყო.
მოგვიანებით, საფრანგეთის კულტურის მინისტრმა, რაშიდა დატიმ განაცხადა, რომ მოპარული ნივთებიდან ერთ-ერთი – იმპერატორის ცოლის გვირგვინი მუზეუმის მახლობლად, გატეხილი იპოვეს.
მინისტრის თქმით, ქურდები პროფესიონალებივით, ყოველგვარი ძალადობისა და პანიკის გარეშე მოქმედებდნენ.
მუზეუმი და ფრანსუა მიტერანის მოედანი ამჟამად დაკეტილია, ტერიტორიას პოლიცია იცავს.
დღეს ლუვრში დაახლოებით 40 000 ხელოვნების ნიმუში ინახება, რაც ხელოვნების მოყვარულების გარდა, დამნაშავეების ყურადღებასაც იქცევს. 105 წლის წინ ლუვრში მოხდა დანაშაული, რომელიც ისტორიაში საუკუნის ძარცვის სახელით შევიდა – 1911 წლის 21 აგვისტოს ლუვრიდან ლეონარდო და ვინჩის „მონა ლიზა“ მოიპარეს. ქურდობა ორშაბათს – კვირის ერთადერთ დღეს მოხდა, როდესაც მუზეუმი სტუმრებისთვის დაკეტილია. შედევრის მუზეუმში დაბრუნება მხოლოდ ორი წლის შემდეგ გახდა შესაძლებელი.
2004 წელს ლუვრში მოხდა ძარცვა, რომელმაც მთელი მსოფლიო შეძრა. მუზეუმში გამართულ საიუველირო გამოფენაზე, Chopard -ის სტენდზე სხვა ძვირფას ნივთებთან ერთად, გამოფენილი იყო 5.5 მილიონ ევროდ შეფასებული 15.74 კარატიანი ლურჯი ბრილიანტი და 6 მილიონ ევროდ შეფასებული, 47 კარატიანი თეთრი ბრილიანტი. ძვირფასეულობას მხოლოდ ერთი ადამიანი იცავდა, რომელიც ოთახიდან 15 წუთით, ბუნებრივი მოთხოვნილებების დასაკმაყოფილებად გავიდა, დაბრუნების შემდეგ კი აღმოაჩინა, რომ კოლექციას ლურჯი და თეთრი ბრილიანტები აკლდა.
ადგილზე მისულმა პოლიციელებმა აღმოაჩინეს, რომ ძვირფასეულობის ვიტრინას საკეტი არ ჰქნდა და სიგნალიზაციასთან შეერთებული არ იყო. უფრო მეტი, საგამოფენო დარბაზში სათვალთვალო კამერებიც არ იყო დამონტაჟებული. ვარაუდობენ, რომ ქურდები უბრალო გამვლელები იყვნენ, რომლებმაც ცუდად დადებული ნივთი აიღეს.
რა ბედი ეწევა იმპერატორ ნაპოლეონისა და ჟოზეფინას კოლექციიდან დაკარგულ სამკაულებს და დააკავებენ თუ არა მძარცველებს, სავარაუდოდ, მოგვიანებით გახდება ცნობილი.
ასევე დაგაინტერესებთ
#OK! როგორ გაქრა „მონა ლიზა“ ლუვრიდან? – “საუკუნის ქურდობის” ისტორია
