ონლაინმაღაზია Noa’s Store-ი ქუთაისში წერეთლის №38-ში მდებარეობს, სადაც ნებისმიერ მსურველს შეუძლია ესტუმროს და საბავშვო სამოსის შოურუმი დაათვალიეროს. მაღაზიის გამორჩეულობას ტანსაცმლის ხარისხი წარმოადგენს. Noa’s Store-ი მომხმარებელს ჰიპოალერგიული და ნატურალური ქსოვილებით შექმნილ ვინტაჟური სტილის პროდუქციას სთავაზობს. მის შესახებ უფრო დეტალურად ჟურნალ OK!-ის ონლაინმაღაზია Noa’s Store-ის დამფუძნებელი, სალომე ხურციძე ესაუბრა.
სალომე, უპირველესად, გვიამბეთ თქვენი მაღაზიის შექმნის ისტორია.
ონლაინ მაღაზია 1 წლის წინ დავაარსე, შთაგონების წყაროდ ჩემი შვილი ნოა იქცა, რომლის სახელიც, Noa’s Store-ი ვუწოდე მაღაზიას. ნოას დაბადების შემდეგ ახალი საზრუნავი გამიჩნდა და დამატებითი შემოსავლისთვის ფიქრი დავიწყე. სწორედ აქედან წამოვიდა ონლაინმაღაზიის შექმნის იდეა. თავისუფალ დროს ბავშვის ტანსაცმლის ძიებას ვანდომებდი, ნოასთვის განსხვავებულ სამოსს ვარჩევდი. შემდეგ დავფიქრდი და მივხვდი, რომ ეს სხვა დედიკოებისთვისაც უნდა გამეზიარებინა და სოციალურ ქსელში ფოტოების ატვირთვა დავიწყე, რასაც დიდი გამოხმაურება და მოწონება მოჰყვა. ბევრი მწერდა და მთხოვდა, ლამაზი და განსხვავებული სამოსის ფოტოები კიდევ გამეზიარებინა. სწორედ აქედან დაიწყო ყველაფერი. ბოლოს ისე გამიტაცა, ღამეებს ვათევდი, ლამაზ ფოტოებს ვიღებდი, ვამუშავებდი და ჩემს გვერდზე ვათავსებდი. ჩემი მაღაზიის ლოგოც შევქმენი. მეტი ინტერესისთვის, ბავშვებთან ერთად ფოტოსესიებს ვაწყობდი, ფოტოკონკურსებს ვატარებდი, გვერდზე ნივთებს ვათამაშებდი. ეს ხალხს ძალიან მოეწონა და დღესდღეობით 10 000 მოწონება გვაქვს. ბევრს ჰგონია, რომ ონლაინმაღაზიას ბევრი შრომა არ სჭირდება, ასე არაა. ბევრი გათენებული ღამით, შრომით და წვალებით მოვედი აქამდე და გასაკეთებელი წინ კიდევ ბევრი მაქვს. ამ ბიზნესის განვითარებაში დიდი წვლილი ჩემს ოჯახს, მეუღლეს და უფროს შვილს მიუძღვის. ამ საქმეში აქტიურად არიან ჩართული და ყოველთვის გვერდით მიდგანან.
მაღალი კონკურენციის ფონზე, Noa’s Store-ს რა გამოარჩევს სხვა მაღაზიებისგან?
ჩვენს მაღაზიას სხვა ონლაინმაღაზიებისგან შედარებით განსხვავებული სტილი აქვს შერჩეული. ძალიან მომწონს ვინტაჟური სტილის სამოსი, სწორედ ამიტომ გადავწყვიტე, ჩემი გემოვნება და ეს სტილი სხვა დედიკოებისთვისაც გამეზიარებინა. ვცდილობ, ყოველთვის განსხვავებული სამოსი ავარჩიო, რაც სხვა ონლაინგვერდებზე არ არის განთავსებული.
გვესაუბრეთ პროდუქციის ხარისხზე.
ჩვენი სამოსი მაღალი ხარისხით გამოირჩევა. პროდუქცია ჰიპოალერგიული და ნატურალური ქსოვილებითაა შექმნილი. რა თქმა უნდა, ჯანმრთელობისთვის უსაფრთხო. უსაყვარლესი და ძალიან კომფორტული ფეხსაცმელების დიდი არჩევანიც გვაქვს.
სალომე, რა არის ონლაინგაყიდვების უპირატესობა და რამდენად ახლავს სირთულე?
ონლაინგაყიდვები ძალიან კომფორტულია. უამრავ უცხო ადამიანთან მაქვს კომუნიკაცია და ეს ძალიან მაბედნიერებს. ძალიან ბევრი და კარგი მეგობარი შევიძინე. ბავშვებთან უფრო დავახლოვდი. მომწონს, რასაც ვაკეთებ, ეს ყველაფერი დიდ სიამოვნებას მანიჭებს. რაც შეეხება სირთულეებს, დიახ, სირთულეებიც ახლავს. მარტივი არ არის, 24/7 -ზე ყველა მომხმარებლის ნებისმიერ შეკითხვას უპასუხო. ზოგჯერ დღეში ათასობით შეტყობინებას ვპასუხობ და ამას ჯერჯერობით მარტო ვართმევ თავს.
რამდენად კმაყოფილი ან პრეტენზიული მომხმარებელი ჰყავს Noa’s Store-ს?
ჩემი მომხმარებლები, ძირითადად, პატარების დედიკოები არიან. ასევე, ხშირად მეხმიანებიან ბავშვების ნათესავებიც, ვცდილობ, ყველას დავეხმარო საჩუქრის არჩევაში, რა თქმა უნდა, მისთვის მისაღებ ფასში. ჩემს გვერდზე გამოკითხვებს ხშირად ვაწყობ და ამ გამოკითხვების მიხედვით თუ ვიმსჯელებთ, კმაყოფილი მომხმარებლები უფრო ბევრი არიან, თუმცა არიან პრეტენზიულებიც. ვისმენ მათ პრეტენზიებს, და ვცდილობ, თუკი არგუმენტირებულია, გავითვალისწინო და შემდეგში გამოვასწორო. ბიზნესის განვითარებისთვის ასეთი მომხმარებლებიც აუცილებელია, რადგან ისინი მოდუნების საშუალებას არ მაძლევენ და ყოველთვის მოტივირებული ვარ.
მოდა და ქუთაისი…
ქუთაისში ჩაცმულობას ძალიან დიდ ყურადღებას აქცევენ. ვფიქრობ, ეს ქალაქი ამით გამოირჩევა. ჩვენთან განსხვავებული და ძალიან გემოვნებიანი სტილის ადამიანებს შეხვდებით, სწორედ ამ სტილს უნდა მოერგოს ნებისმიერი ონლაინმაღაზია. პატარებს და მათ ჩაცმულობას ძალიან დიდი დროს უთმობენ, ამიტომ ყოველთვის ახლის ძიებაში არიან, მეც ვცდილობ, რომ ჩემი მაღაზიის მომხმარებლებს ყოველთვის განსხვავებული სამოსი შევთავაზო.
გაგვიმხილეთ სამომავლო გეგმები.
მომავალში მაღაზიის გახსნას ვგეგმავ, რომელსაც იმავე სახელსა და სტილს შევუნარჩუნებ. ადგილზე მექნება უფრო მრავალფეროვანი ტანსაცმლისა და ფეხსაცმლის არჩევანი, ასევე საბავშვო აქსესუარები. მომხმარებლები კომფორტულ გარემოში შეძლებენ სამოსის მორგებასა და შეძენას. ასევე, ონლაინმუშაობას ისევ საქართველოს მასშტაბით გავაგრძელებ და არამარტო, ევროპისა და ამერიკის ნებისმიერი ქალაქიდან შეძლებენ ჩვენი ნივთების შეძენას.
ტექსტი: მარიამ ირემაძე
ფოტო: ნინი გორდაძე
