ახალი წლის დადგომა ყველა ქვეყანაში სხვადასხვა, უცნაურ და სიმბოლურ ტრადიციებთან ასოცირდება. სწორედ ეს განსხვავებები ქმნის თითოეული ქვეყნის უნიკალურობას. მოდით განვიხილოთ ფილიპინების უჩვეულო და სახალისო საახალწლო ტრადიციები.
როგორც ცნობილია, საახალწლოდ ფილიპინებში განსაკუთრებული მნიშვნელობა მატერიალურ კეთილდღეობას ენიჭება. ფილიპინელებს სჯერათ, რომ დღესასწაულის მსვლელობისას გარშემო ყველაფერს მონეტებივით მრგვალი ფორმა უნდა ჰქონდეს, რათა მომავალი წელი მატერიალურად უზრუნველი და წარმატებული გამოდგეს. საახალწლო სუფრის შუაგულში აუცილებლად უნდა ეწყოს 12 სხვადასხვა სახის მრგვალი ხილი: ვაშლი, ყურძენი, ქლიავი თუ ფორთოხალი, რაოდენობა კი, ცხადია, წელიწადის თვეების აღმნიშვნელია. არაა გასაკვირი, რომ სიმდიდრის მოყვარული ფილიპინელები მხოლოდ საჭმლის სიმრგვალით არ შემოიფარგლებიან. საახალწლოდ კოპლებიან კაბებსა და ტანსაცმელში გამოწყობილ ადამიანებსაც ხშირად იხილავთ ქალაქის ქუჩებში და არც ის უნდა მოგეჩვენოთ უჩვეულოდ, თუ მოსიარულეების ჯიბეებიდან მონეტების ჟღარუნს გაიგებთ, რადგან ესეც იღბლის მომტანი ტრადიციების არანაკლებ მნიშვნელოვან ნაწილად მიიჩნევა.
საინტერესოა ისიც, რომ თუ დანიაში სკამიდან ჩამოხტომით ეგებებიან ახალ წელს, ფილიპინელ ბავშვებს ახალისებენ, რათა ზუსტად 12 საათზე რაც შეიძლება მაღლა ახტნენ, სიმაღლეში უფრო სწრაფად რომ გაიზარდონ. სახლის კარები და ფანჯრები საახალწლოდ ღია უნდა დარჩეს, რომ სადღესასწაულო იღბალი და კეთილდღეობა ოჯახის წევრებმა მარტივად შემოიპატიჟონ შინ, ხოლო მრავალი ქვეყნისთვის ტრადიციული და საყვარელი ფეიერვერკების ხმა ფილიპინებში ავი სულების დასაშინებლადაც გამოიყენება.
