მეორე დღეა, მილანში ჯორჯო არმანისთან გამოსამშვიდობებელი ცერემონია გრძელდება. გუშინ „Teatro Armani“-ში 6 000-ზე მეტი ადამიანი მივიდა, რომ სახელგანთქმული დიზაინერისთვის პატივი მიეგო. ცნობილი დიზაინერის ნიჭის თაყვანისმცემლებს საკუთარ მოვალეობად მიაჩნიათ პირადად დაემშვიდობონ ადამიანს, რომლის სახელი მოდის სამყაროში ელეგანტურობისა და ნოვატორობის სიმბოლოდ იქცა.
Armani-ის მოდის სახლის თანამშრომლები პირველები იყვნენ, ვისაც დარბაზში შესვლისა და იმ ადამიანთან დამშვიდობების საშუალება მიეცათ, რომელმაც ეპოქის სტილი განსაზღვრა. ამის შემდეგ კარი ყველასთვის გაიღო და ხალხის ნაკადი ცხრა საათიდან საღამოს ექვს საათამდე არ შეწყვეტილა. კვირასაც იგივე განრიგი შენარჩუნდა.
„Teatro Armani“-ს თეატრალურ დარბაზში, სადაც ჩვეულებრივ, Armani-ს კოლექციების ჩვენებები იმართებოდა, ახლა სანთლები და თეთრი ვარდებით შემკული, დახურული კუბო დგას. არმანის ნიჭის თაყვანისმცემლები უდიდეს დიზაინერს იტალიელი კომპოზიტორის, ლუდოვიკო ეინაუდის მუსიკის ფონზე ემშვიდობებიან. კედელზე გამოსახულია დიზაინერის ფოტო წარწერით:
“კვალი, რომლის დატოვებასაც იმედია, შევძლებ, არის საქმის ერთგულება, პატივისცემა და გულწრფელი მზრუნველობა ადამიანებისა და სინამდვილის მიმართ. ყველაფერი ხომ აქედან იწყება.”
ვარსკვლავურ სტუმრებს შორის არიან არმანის ძველი მეგობარი დონატელა ვერსაჩე, Ferrari-ს სამეთვალყურეო საბჭოს თავმჯდომარე ჯონ ელკანი, დიზაინერები ენიო კაპასა და ალესანდრო ენრიკესი, რეჟისორები გაბრიელე სალვატორე და ჯუზეპე ტორნატორე, მილანის ყოფილი მერები ლეტიცია მორატი და გაბრიელე ალბერტინი, ასევე პოპ-მომღერალი ალექსია, რომელიც არმანის ძმისშვილის, ანდრეა კამერანას ცოლია.
მოდის სფეროში 50-წლიანი მოღვაწეობის განმავლობაში არმანიმ მთელი იმპერია შექმნა, რომელმაც უზარმაზარი ქონება მოუტანა. ახლა მოდის მოყვარულებს აინტერესებთ, ვინ გახდება მისი მემკვიდრე და ვის დარჩება 12 მილიარდიანი ქონება. არმანის შვილები არ ჰყავდა, ამიტომ მის მემკვიდრეებად დიზაინერის 86 წლის დას როზანას და ძმიშვილებს რობერტა, სილვანა ანდრეა კამერანს ასახელებენ, რომლებიც Armani Group-ის მართვაში აქტიურად მონაწილეობენ. კიდევ ერთი მემკვიდრეა არმანის ასისტენტი, 72 წლის პანტალეო დელ’ორკო, რომელიც ჰოლდინგის ყველა ბრენდის მამაკაცის კოლექციებზეა პასუხისმგებელი.
Armani Group-ის დამფუძნებელი ჯორჯო არმანი 4 სექტემბერს, 91 წლის ასაკში გარდაიცვალა. არმანის მოდის სახლის პრესსამსახურის ინფორმაციით, დიზაინერმა უკანასკნელი საათები ყველაზე ახლობელ ადამიანებთან ერთად გაატარა. 6–7 სექტემბერს, ხალხს საშუალება მიეცა იტალიური მოდის ლეგენდას დამშვიდობებოდა. დაკრძალვა ორშაბათს იგეგმება, თუმცა მას მხოლოდ ოჯახის წევრები და ახლო მეგობრები დაისწრებიან.
