ჟურნალი OK!-ის მკითხველი უკვე კარგად იცნობს ჩვენს რესპონდენტს, გარემოსდამცველს, გლობალური ჯანმრთელობის სპეციალისტსა და ლექტორს, დალი კეკელიძეს. ამჯერად გადავწყვიტეთ გაგაცნოთ, თუ როგორია ჩვენი გმირის ცხოვრება და შეხედულებები სხვადასხვა საკითხის მიმართ პროფესიული და საქმიანი ყოველდღიურობის მიღმა.
დალი, ჩვენი მკითხველი უკვე კარგად იცნობს თქვენს პროფესიულ გზას და საქმიანობას. საინტერესოა, რისი კეთება გიყვართ თავისუფალ დროს? რაიმე ჰობი ხომ არ გაქვთ?
ძირითადად, კვირა დღე მაქვს საკუთარი თავისთვის გამოყოფილი. თუ ამინდი ხელს მიწყობს, ვცდილობ ქუჩებში ვისეირნო და სურათები გადავიღოთ. ძველი არქიტექტორული ნაგებობები მიზიდავს და მათი ფასადების მხატვრობის აღმოჩენა. ამით სოლოლაკი ნამდვილად გამორჩეული ადგილია.
რას მოაქვს თქვენში ჰარმონია და სიმშვიდე?
ვფიქრობ, სიმშვიდე განაპირობებს ჰარმონიას და ინდივიდუალურია. ჩემთვის ღიმილია და ვიზიარებ დედა ტერაზას მოსაზრებას – მშვიდობა იწყება ღიმილით.
მომენტი, რომელიც არასოდეს გაქრება თქვენი მეხსიერებიდან?
ჩემმა მეგობრებმა მაჩუქეს ანდრე რიეს და მისი იოჰან შტრაუსის ორკესტრის კონცერტზე დასასწრები ბილეთები. ძალიან დიდი შთაბეჭდილებებით დავბრუნდი ხორვატიიდან. ნამდვილი საოცრება იყო, განსაკუთრებით მოვიხიბლე ემა კოკის მიერ შესრულებული Voila-თი.
ფრაზა ან რჩევა, რომელიც მიიღეთ და ყოველთვის გემახსოვრებათ?
გამორჩეული რჩევა ან ფრაზა არ მახსენდება, თუმცა სოციალურ ქსელში ამას წინათ შემთხვევით წავიკითხე ასეთი ფრაზა: „ნუ გაჰყვები სხვის ქარებს“. არ ვიცი, ვინ არის ავტორი, მაგრამ დამამახსოვრდა, ძალიან სიღრმისეული და ცხოვრებისეულია.
ის, რისიც ყველაზე მეტად გჯერათ და გწამთ?
უფლის!
ტექსტი: ციაკო ღამბაშიძე
ფოტო: ალექსეი სეროვი
