ყოველთვის, როცა Hershey’s-ის შოკოლადს გახსნით, გახსოვდეთ, რომ ხელში მხოლოდ ტკბილეული არ გიჭირავთ. ეს არის ადამიანის მემკვიდრეობა, რომლის ცხოვრება ამერიკული ოცნების განსახიერება გახდა. ეს არის მილტონ ჰერშის ისტორია, მეწარმის, რომელიც ოთხჯერ გაკოტრდა, სანამ უბრალოდ კომპანიას კი არა, მთელ ქალაქს ააშენებდა.
წარუმატებლობებით დაწყებული გზა
მილტონ ჰერშის ისტორია 1857 წელს პენსილვანიაში დაიწყო. მისი ოჯახი მკაცრი წესებითა და შრომისმოყვარეობით გამოირჩეოდა. ფინანსური პრობლემების გამო, მილტონმა სკოლა მე-4 კლასში მიატოვა. დედამ, ხედავდა რა ქმრის ავანტიურების უპერსპექტივობას, შვილი კონდიტერს მიაბარა. სწორედ იქ იპოვა 14 წლის მილტონმა თავისი ცხოვრების მთავარი გატაცება.
წარმატებამდე გზა ეკლიანი აღმოჩნდა – მილტონმა სამჯერ სცადა ბიზნესის დაწყება და სამივეჯერ კრახით დაასრულა: 1876 წელს ფილადელფიაში, 6 წლის განმავლობაში, ყოველდღიურად, 16 საათს მუშაობდა, მაგრამ საბოლოოდ გაკოტრდა.
1882 წელს, დენვერში კარამელის წარმოებაში ნედლი რძის გამოყენება ისწავლა, თუმცა 1883-1885 წლებში გაკოტრებას მაინც ვერ გადაურჩა.
30 წლის ასაკში მილტონ ჰერში მშობლიურ ლანკასტერში უფულო, ვალებში ჩაფლული და „ხელმოცარულის“ რეპუტაციით დაბრუნდა.
კარამელის ტრიუმფი
მარცხის მიუხედავად, მილტონს რძიანი კარამელის რეცეპტის იმედი ჰქონდა და მცირე სესხით წარმოება დაიწყო. მალე ერთმა ინგლისელმა მეწარმემ მისი პროდუქცია აღმოაჩინა. 1894 წლისთვის Lancaster Caramel Company უკვე აშშ-ს ერთ-ერთი უმსხვილესი წარმოება იყო.
1893 წელს, მილტონმა ჩიკაგოს გამოფენაზე გერმანული შოკოლადის დანადგარები ნახა და მიხვდა, რომ შოკოლადის წარმოება უნდა დაეწყო. იმ დროს შოკოლადი ფუფუნების საგანი იყო, ჰერშიმ კი გადაწყვიტა, ის ყველასთვის ხელმისაწვდომი გაეხადა. 1900 წელს მან თავისი წარმატებული კარამელის ბიზნესი 1 მილიონ დოლარად გაყიდა და ფული შოკოლადის წარმოებაზე ჩადო. „კარამელი გატაცებაა, შოკოლადი კი სამუდამო“ – ამბობდა ის.
უტოპიური ქალაქის დაბადება
მილტონმა შოკოლადის ქარხანა მშობლიურ სოფელში ააშენა, სადაც გარშემო ბევრი ფერმა და ნედლი რძე იყო. მან გადაწყვიტა თავისი მუშებისთვის იდეალური ქალაქი შეექმნა. იმ დროს, როცა ინდუსტრიული ქალაქები სიღარიბესთან ასოცირდებოდა, მილტონმა ააგო აგურის სახლები ეზოებით, სკოლები, ეკლესიები, პარკები და ზოოპარკიც კი. მას სჯეროდა, რომ ღირსეული პირობები ხალხს უფრო ბედნიერს, შრომას კი ნაყოფიერს გახდიდა.
Hershey’s-ის საიდუმლო და აღიარება
მილტონ ჰერშიმ რძიანი შოკოლადის სრულყოფილი რეცეპტის შექმნას 3 წელი მოანდომა. მან უნიკალური „ჰერშის პროცესი“ შექმნა, რომელმაც შოკოლადი ხარისხიანი და ყველასთვის ხელმისაწვდომი გახადა. 1900 წელს შოკოლადის პირველი ფილა გამოვიდა, რომელიც მხოლოდ 5 ცენტი ღირდა. 1907 წელს ლეგენდარული შოკოლადი Hershey’s Kisses გამოვიდა და შოკოლადი ფუფუნებიდან ყოველდღიურ სიამოვნებად იქცა.
მემკვიდრეობა, რომელიც ბიზნესზე მეტია
პირად ცხოვრებაში ჰერში დიდ ტკივილს ატარებდა – მას და მის ცოლს შვილები არ უჩნდებოდათ. 1909 წელს ცოლ-ქმარმა ობოლი ბავშვებისთვის სკოლა-თავშესაფარი გახსნა. მეუღლის გარდაცვალების შემდეგ, 1918 წელს, მილტონმა მთელი ქონება და კომპანიის აქციების საკონტროლო პაკეტი ამ სკოლის ფონდს ფარულად გადასცა. იმ დროისთვის ეს 60 მილიონი დოლარი იყო.
დღეს სკოლა Milton Hershey School ერთ-ერთი უმდიდრესი საგანმანათლებლო დაწესებულებაა მსოფლიოში. Hershey-ს გაყიდვებიდან მიღებული მოგების დიდი ნაწილი დღემდე ათასობით ბავშვის განათლებასა და კეთილდღეობას ხმარდება. მილტონ ჰერშიმ დაამტკიცა, რომ ნამდვილი წარმატება არა მხოლოდ ფინანსებში, არამედ სხვებზე ზრუნვაშია.
მილტონ ჰერში 1945 წელს, 88 წლის ასაკში გარდაიცვალა, მაგრამ მისი ქალაქი, რომელსაც „მსოფლიოში ყველაზე ტკბილი ადგილი“ უწოდეს და კომპანია, რომლის წლიური შემოსავალი $7.5 მილიარდს შეადგენს, დღემდე აგრძელებს სიცოცხლეს.
ასევე დაგაინტერესებთ
#OK! NASA-მ ასტრონავტებს კოსმოსში iPhone-ის წაღების უფლება მისცა
