McDonald’s-ის დაუნის სინდრომის მქონე თანამშრომელი, რასელ ო’გრეიდი სწრაფი კვების ქსელში 32 წლიანი მუშაობის შემდეგ, 50 წლის ასაკში პენსიაზე გავიდა. ერთ-ერთ ავსტრალიურ McDonald’s-ში მუშაობა 1986 წელს დაიწყო. მაშინ მხოლოდ 18 წლის იყო. რასელმა „მაკდონალდსში“ მუშაობის დაწყება მთავრობის ინიციატივის წყალობით შეძლო. ეს იყო პროგრამა, რომელიც მიზნად შეზღუდული შესაძლებლობების მქონე ადამიანებისთვის დასაქმებას ისახავდა.
მომდევნო სამი ათწლეულის განმავლობაში რასელი McDonald’s-ში კვირაში სამი დღე მუშაობდა.
„რასელს ეს სამსახური ძალიან ეხმარება. ადამიანებთან ურთიერთობა მას თავს საზოგადოების ნაწილად აგრძნობინებს. ხანდახან ვუყურებ, როგორ მუშაობს. რესტორნის ყოველი მეორე სტუმარი ჩერდება, რომ გაესაუბროს, რაც რასელს ძალიან მოსწონს და ღიმილად იღვრება“ – ამბობს რესტორნის დირექტორი
რასელ ო’გრეიდი დაუნის სინდრომის მქონე პირველი ადამიანია, რომელიც McDonald’s-მა დაასაქმა.
80-იან წლებში, როცა მან მუშაობა დაიწყო, საზოგადოება შეზღუდული შესაძლბლობების მქონ ადამიანების მუშაობას ჯერ კიდევ ეჭვის თვალით უყურებდა, თუმცა წლების შემდეგ ეს წინააღმდეგობა გადალახეს.
რესტორნის ერთ-ერთი მუდმივი კლიენტი იხსენებს:
„რასელს რამდენიმე წლის წინ შევხვდი. ის ძალიან შრომისმოყვარე ადამიანია, რომელიც გამუდმებით იღიმება. ვულოცავ მას პენსიაზე გასვლას.“
ცნობისთვის, დაუნის სინდრომი ქრომოსომური გენეტიკური ცვლილებაა, რომლის დროსაც 46 ქრომოსომის ნაცვლად, გვხვდება დამატებით ერთი ქრომოსომა 21-ე წყვილში, რასაც 21-ე წყვილის ტრისომია ეწოდება.
სინდრომისთვის დამახასიათებელი ნიშან-თვისებები პირველად 1866 წელს, ინგლისელმა ექიმმა ჯონ ლანგდონ დაუნმა აღწერა, რასაც შემდგომ მისივე სახელი, დაუნის სინდრომი ეწოდა.
დაუნის სინდრომის მქონე ადამიანთა უმეტესობას აქვს მსუბუქიდან საშუალო ხარისხის ინტელექტუალური განვითარების შეფერხება, რაც განაპირობებს აბსტრაქტული აზროვნებისა და განზოგადების სიძნელეებს, სწავლის ნელ ტემპს, თუმცა არ გამორიცხავს განვითარების, ახალი უნარების სწავლის, დამოუკიდებელი ცხოვრებისა და ფუნქციონირების შესაძლებლობებს. მსოფლიოს ბევრ ქვეყანაში, დაუნის სინდრომის მქონე პირების დიდი ნაწილი დასაქმებულია სხვადასხვა სექტორში (მაგალითად რესტორნები, სასტუმროები, კლინიკები, გართობის ინდუსტრია და ა.შ.).
ამ გენეტიკური ცვლილების მქონე პირთა საერთაშორისო დღე პირველად 2006 წლის 21 მარტს აღნიშნა.
