LEM − ეს არის ქართულ ბრენდი, რომელიც 2020 წელს გამოჩნდა ბაზარზე და უკვე დაიმკვიდრა თავი საკუთარი ინდივიდუალიზმითა და ხარისხით. ბრენდის დამფუძნებელი ფრიდონ ნიგურიანია, ვისი სურვილი და მიზანი იყო შეექმნა ტანსაცმლის ხაზი, რომლის ტარებაც თავად სურდა, მაგრამ ადგილობრივ ბაზარზე ვერ შოულობდა შესაბამის სამოსს.
ბრენდი განსაკუთრებული სისწრაფით მიიწევს წინ და საზოგადოებას უკვე 2021/2022 წლის კოლექციაც წარუდგინა, რომლის ინსპირაცია თენგიზ აბულაძის ფილმი „ნატვრის ხე“ გახდა.
„ეს ფილმი არის სილამაზეზე, ადამიანებზე, ცხოვრებაზე. ჩემს კოლექციაში მინდოდა გამომეხატა ბუნებრივობა, სიკაშკაშე და გრძნობები. ფილმის გმირებს აცვიათ ჩვენი წინაპრების სამოსი, რომლებსაც ისინი საუკუნეების განმავლობაში ატარებდნენ. მე ტრადიციული კოსტიუმის ყველა ეს ელემენტი გამოვიყენე კოლექციაში.
ჩემი შთაგონების განსაკუთრებული წყარო იყო სოფლის ყველაზე ფერადი პერსონა − ფუფალა, რომლის როლსაც ფილმში ჩვენი ლეგენდარული მსახიობი სოფიკო ჭიაურელი ასრულებს“, − აღნიშნა ფრიდონმა.
აღსანიშნავია, რომ LEM-ის დებიუტი 2021 წლის თებერვალში, უკრაინის დედაქალაქ კიევში შედგა, სადაც ჩვენება მაყურებლის გარეშე გაიმართა, თუმცა ონლაინრეჟიმში თვალის დევნება ნებისმიერი მსურველისთვის შესაძლებელი იყო. ჩვენებამ დიდი მოწონება დაიმსახურა და გაშუქდა ადგილობრივი პრესითა და ტელევიზიით.
2021/2022 წლების კოლექციაში დიზაინერმა ძალიან კარგად გამოხატა საკუთარი განწყობა და საზოგადოებას წარუდგინა ნათელი და არასტანდარტული ფერების კომბინაციები, ყვავილოვანი პრინტები.
კოლექცია მეტწილად წარმოგვიდგენს ბლუზებს, კოსტიუმებს, პალტოებსა და ქურთუკებს, რომელთა ტარება შეუძლიათ როგორც ქალბატონებს, ასევე მამაკაცებს.
