ჰოლივუდის მსახიობმა, კევინ სპეისიმ, რომელსაც გამოძიება 4 მამაკაცის მიმართ სექსუალური ძალადობის შვიდ და სექსუალური შევიწროების ორ შემთხვევას ედავებოდა, ბრიტანულ გაზეთ The Telegraph-თან ინტერვიუში განუცხადა, რომ სკანდალის შემდეგ ფაქტობრივად, უსახლკაროდ დარჩა. 66 წლის მსახიობი ამბობს, რომ თავის გატანაც კი უჭირს და სასტუმროებში ცხოვრობს ან Airbnb-ის საშუალებით ბინებს ქირაობს.
„ერთი ადგილიდან მეორეზე გადავდივარ, ბინებს ვქირაობ, ვმუშაობ ყველგან, სადაც შესაძლებლობა ჩნდება.. ფაქტობრივად, უსახლკარო ვარ. ბალტიმორში სახლი დავკარგე, „რადგან ბოლო შვიდი წლის განმავლობაში ხარჯები ასტრონომიული იყო და შემოსავალი მწირი“ – თქვა მსახიობმა.
სპეისიმ აღნიშნა, რომ სირთულეების მიუხედავად, ოპტიმიზმის შენარჩუნებას ცდილობს და მომავალს იმედით უყურებს:
„ყველაფრის გადატანა შესაძლებელია. უცნაურია, მაგრამ ვგრძნობ, რომ ისევ იქ დავბრუნდი, საიდანაც დავიწყე – ისევ ნებისმიერ სამსახურს ვთანხმდები. ჩემი ნივთები საწყობში ინახება და იმედი მაქვს, რომ როდესაც სიტუაცია გამოსწორდება, ახალი ცხოვრებისთვის ადგილს ვიპოვი“.
გამოცემა აღნიშნავს, რომ სპეისი მართლაც ნებისმიერ საშუალებას იყენებს ფულის საშოვნელად. ცოტა ხნის წინ მან კვიპროსში, Monte Caputo-ს ღამის კლუბში ფრენკ სინატრას სიმღერები შეასრულა. ღამის კლუბის ბილეთის ფასი 250 ევრო იყო, ხოლო მდიდარი სტუმრებისთვის განკუთვნილი პაკეტი, მათ შორის მსახიობთან 30-წუთიანი შეხვედრა, 1200 ევრო ღირდა.
შეგახსენებთ, რომ კევინ სპეისი სექსუალურ ძალადობაში რამდენიმე ადამიანმა დაადანაშაულა. მათ შორის იყვნენ კოლეგები, რომლებმაც სპეისისთან ერთად სერიალში „ბანქოს სახლი“ ითამაშეს. მსახიობის დანაშაული არ დადასტურდა და ბრიტანულმა სასამართლომ სექსუალური ძალადობის ცხრავე საქმეში გაამართლა.
კევინ სპეისის სექსუალური შევიწროებისთვის დიდი ბრიტანეთის გარდა, სასამართლო დავა ჰქონდა ამერიკის შეერთებულ შტატებშიც. ნიუ-იორკის სასამართლომ ის 2022 წლის 21 ნოემბერს გაამართლა, მაგრამ სკანდალმა მისი კარიერა მაინც დაანგრია: სკანდალის გამო კომპანია Netflix-მა სპეისისთან პოპულარულ ტელესერიალში „ბანქოს სახლი“ თანამშრომლობა შეწყვიტა. მსახიობს პრემია „ემი” არ გადასცეს, მის ბოლო ფილმებში კი სცენები სპეისის მონაწილეობით ამოჭრეს.
სპეისიმ „ბანქოს სახლის“ პროდიუსერებს 32,2 მილიონი დოლარი გადაუხადა და სასამართლო ხარჯების დასაფარად თავისი სასახლე 10,9 მილიონ დოლარად გაყიდა.
2025 წლის თებერვალში გაი პირსმა, რომელიც სპეისისთან ერთად 1997 წელს გადაღებულ ფილმში „ლოს ანჯელესის საიდუმლოებანი“ მონაწილეობდა, ის სექსუალურ შევიწროებასა და დევნაში მეორედ დაადანაშაულა. სპეისიმ ბრალდებას ვიდეოს ჩანაწერით უპასუხა და მსახიობს მიმართა: „ეცადე გაიზარდო გაი პირს, შენ მსხვერპლი არ ხარ“.
ასევე დაგაინტერესებთ
#OK! “ჰოლივუდის ყველაზე სიმპათიური მამაკაცები” მეცნიერული გამოთვლების მიხედვით
