ცოტა ხნის წინ, ამერიკულმა VOGUE-მა ციფრულ პლატფორმაზე სპეციალური ნომერი უკრაინის პირველ ლედის ოლენა ზელენსკას მიუძღვნა. „სიმამაცის პორტრეტი“ – ასეთი სათაური აქვს VOGUE-ს ინტერვიუს, რომელსაც არაერთგვაროვანი გამოხმაურება მოჰყვა. კრიტიკოსების აზრით, ზელენსკას კიბეზე ჯდომის პოზა ,,ზედმეტად მამაკაცური’’, ,,არაქალური’’ და პირველი ლედისთვის ,,არაშესაფერისია’’. საზოგადოების ნაწილმა VOGUE-ს ფოტოსესია უადგილოდაც მიიჩნია – ,,არის თუ არა მოდის დრო ომში?’’ – იწერებოდნენ სოციალურ ქსელებში.
ამ შეფასებებს უკრაინელი პირველი ლედის მხარდამჭერების პასუხიც მოჰყვა. უკრაინელმა ჟურნალისტმა, ზოია ზვინიაცკივსკამ ინსტაგრამზე ახალი კამპანია, ჰეშთეგით #SitLikeAGirl წამოიწყო. ის მოუწოდებდა სხვა ქალებს ანალოგიური ფოტოები გადაეღოთ და ასე გამოეხატათ სოლიდარობა ზელენსკას მიმართ.
ევროვიზია 2016 წლის გამარჯვებული, უკრაინელი ჯამალა ერთ-ერთი პირველი იყო, ვინც ფოტო გამოაქვეყნა საკუთარ ინსტაგრამზე.
აღნიშნულ ინიციატივას ათასობით ქალი შეუერთდა, მათ შორის უკრაინელი ქალი პოლიციელები, მხატვრები, ჟურნალისტები და ქვეყნის ქალთა საფეხბურთო კლუბის FC Kryvbas-ის მოთამაშეები.
კამპანიას #SitLikeAGirl საქართველოც უერთდება. ცნობილი სპორტსმენის ნანა ნებიერიძის ინიციატივას ქართული OK! გამოეხმაურა და კამპანიაში ჩასართავად საკუთარი მედია პლატფორმები ქართველ ქალებს შესთავაზა. ქართულ კამპანიას ჰეშთეგი #ძლიერიქალი დაემატება.
OK! მხარს უჭერს გენდერული კუთხით დამკვიდრებული სტერეოტიპების ნგრევას და მოუწოდებს ყველა ქალს შემოუერთდეს აღნიშნულ ინიციატივას.
აღსანიშნავია, რომ 24 თებერვალს, რუსეთის უკრაინაში შეჭრის შემდეგ, ოლენა ზელენსკა ყველა პლატფორმას იყენებს უკრაინისადმი მხარდაჭერის კიდევ უფრო გასაზრდელად. ის ძლიერი ქალის და დედის სახედ იქცა.
