PSP – ჩემი ოჯახის აფთიაქი, საქართველოს ფარმაციის ლიდერი, ხარისხის გარანტი, ევროპული ღირებულებების მქონე კომპანია წარმოგიდგენთ სატელევიზიო ისტორიებს.
1958 წელს ჯულიეტა ვაშაყმაძე ტელევიზიის დიქტორი გახდა, შემდეგ კომენტატორი, სხვადასხვა პროგრამის ხელმძღვანელი, საბავშვო, სამეცნიერო-პოლიტიკური, თეატრალური, ხელოვნების, ლიტერატურული გადაცემების წამყვანი.
ჯერ კიდევ თეატრალური ინსტიტუტის მოსწავლე იყო, როდესაც პირველად ტელევიზიაში სამუშაოდ მივიდა. პირველი ნაბიჯებიდან მისთვის ყველაზე დასამახსოვრებელი რამდენიმეთვიანი გამოცდილების შემდეგ თბილისის დაარსების 1500 საიუბილეო წლისადმი მიძღვნილი ღონისძიების გადაცემის წაყვანა იყო. სწორედ ამ დღეს დაიბადა პატარა გოგონასგან დიდი ტელევარსკვლავი.
მახსოვრობისა და მეტყველების განსაკუთრებული უნარით შექმნა სტილი, რომელიც მხოლოდ მისთვის იყო დამახასიათებელი და საზოგადოებას სწორედ ამით შეაყვარა თავი. იმის მიუხედავად, რომ იმ დროს საქართველოში ტელევიზორი ძალიან ცოტა ადამიანს ჰქონდა, ქუჩაში ყოველთვის ცნობდნენ და დიდ პატივისცემასა და სიყვარულს გამოხატავდნენ, რაც ახალ-ახალი გადაცემების შექმნის სტიმულს სძენდა.
„თუ გაითვალისწინებთ, რომ მე ვარ არქიტექტორი და ასპირანტურა მაქვს დამთავრებული, თუ გაითვალისწინებთ, რომ მე კინოში მიღებდნენ, ვიყავი მარჯანიშვილის თეატრის სცენაზე და მაინც ავირჩიე ტელევიზია, ესე იგი, ადვილი წარმოსადგენია, რას ნიშნავდა ჩემთვის ტელევიზია“, − ამბობს ჯულიეტა ვაშაყმაძე ერთ-ერთ ინტერვიუში.
ჯულიეტასთვის ყოველთვის ყველაზე მნიშვნელოვნად მაყურებელთან საუბარი რჩებოდა. ვერ წარმოედგინა, ტექსტი წაეკითხა: „ფურცლის გარეშე ვესაუბრებოდი მაყურებელს ყოველთვის“. მისი პროფესიებიდან გამომდინარე, ყველაზე დიდი სიამოვნებით რეპორტაჟებს (სიუჟეტებს) არქიტექტურასა და თეატრზე ამახვილებდა.
ის ხშირად კავშირგაბმულობის შენობიდან ფუნიკულიორზე მდებარე სტუდიაში ფეხითაც ადიოდა.
სწორედ აქ, ანძის მიმდებარე ტერიტორიაზე, 2013 წელს ქართული ტელევიზიის 57 წლისთავზე, საზოგადოებრივმა მაუწყებელმა ჯულიეტა ვაშაყმაძეს გაუხსნა ვარსკვლავი, უკვდავყო მისი სახელი და შეუფასებელი წვლილი ტელევიზიის განვითარებაში.
ჯულიეტა ვაშაყმაძე 2020 წელს 87 წლის ასაკში გარდაიცვალა.
