ყველა ბავშვისთვის, და არა მარტო ბავშვისთვის საყვარელი “ჟირაფი ჟოზე” განსაკუთრებული სიახლით დაუბრუნდა მაყურებელს. MetaViu-ს და ჟირაფი ჟოზე-ს კოლაბორაციით, საგანმათლებლო პროგრამები შეიქმნა, სადაც ბავშვები ჟოზესთან ერთად ფერებს, ფორმებს, ციფრებს შეისწავლიან და ასევე კრიტიკულ აზროვნებას, პრობლემის გადაჭრის და სხვადასხვა მნიშვნელოვან უნარებს გამოიმუშავებენ. ამ არაჩვეულებრივ სიახლესთან დაკავშირებით OK! პირადად ესაუბრა პროექტის ავტორს გიორგი მარშანიას.
გიორგი, გვიამბეთ რა ტიპის თამაშებია და რა ასაკის ბავშვებისთვისაა გათვალისწინებული?
თამაშები არის სხვადასხვა ტიპის და შესაბამისად სხვადასხვა ასაკზე მორგებული. 3 წლიდან ზემოთ უკვე შეუძლია ბავშვს, რომ ითამაშოს საგანამანათლებლო თამაშები, 6 წლიდან ზემოთ ბავშვებისთვის კი შესაბამისი კატეგორიის თამაშებია, სათავგადასავლო ხასიათის. თითოეულ თამაშში გათვალისწინებული იქნება, რომ ჟოზემ ყველა ასაკის ბავშვს მოუტანოს საგანმანათლებლო სარგებელი.
უფრო კონკრეტულად, რომ გვითხრათ რა მიმართულებებს მოიცავს “ჟოზეს” თამაშები?
“ჟოზეს” თამაშები მოიცავს საგანმანათლებლო, მეხსიერების განმავითარებელ, სასწავლო, მუსიკალურ, სათავგადასავლო და ა.შ. მიმართულებებს. ამ ეტაპზე გაშვებული გვაქვს მეხსიერების სავარჯიშო თამაში, თუმცა პერიოდულად ახალ თამაშებს დავამატებთ პლატფორმაზე.
თამაშები ბავშვებს განსაკუთრებით ეხმარება სხვადასხვა საკითხების დამახსოვრებაში, მეხსიერების გაუმჯობესებაში, ყურადღების კონცენტრაციაში, უვითარებს ბავშვს სხვადასხვა პრობლემის გადაჭრის უნარებს.
თამაში, რომელიც უკვე ხელმისაწვდომია მომხმარებლებისთვის, მეხსიერების სავარჯიშოა, მაგრამ მოიცავს სხვადასხვა შემეცნებით საკითხებსაც, რათა ბავშვს მაქსიმალურად განუვითარდეს ასაკის შესაბამისი საჭირო უნარები.
რა არის თქვენი მიზანი?
ჩვენი მიზანია ბავშვების გართობაც იყოს პროდუქტიული და მშობელმა თავი იგრძნოს უსაფრთხოდ, მაშინ, როდესაც ეცოდინება, რომ მისი შვილი თამაშით არა მარტო ერთობა, არამედ სარგებელსაც იღებს.
როგორ ვისარგებლოთ თამაშებით?
თამაშები ხელმისაწვდომია Roblox-ის პლატფორმაზე, სადაც საჭიროა ექაუნთის ქონა. კონკრეტულად ჟოზეს თამაშებისთვის კი, მშობლები უნდა დარეგისტრირდნენ სპეციალურად ამ პროექტისთვის შექმნილ საიტზეც, რათა უფრო კონტროლირებადი იყოს მათთვის მათი შვილის გატარებული დრო სმარტფონებთან. მშობლებისთვის თვალსაჩინო ხდება ბავშვის პროგრესი – თუ რას თამაშობს, რომელი საკითხი როგორ ისწავლა, რაზე გააკეთოს მეტი აქცენტი…
კიდევ რა სიახლეს ველოდოთ ახლო მომავალში?
სიახლეებს რაც შეეხება, ძალიან მალე სხვა ტიპის თამაშებიც დაემატება პლატფორმაზე. შემოდგომაზე კიდევ ბევრ სიახლეს ვპირდებით მაყურებელს.
