PSP – ჩემი ოჯახის აფთიაქი, საქართველოს ფარმაციის ლიდერი, ხარისხის გარანტი, ევროპული ღირებულებების მქონე კომპანია წარმოგიდგენთ ,,ევროპულ ისტორიებს”.
ივანე მუხრანბატონის ოცნება, ევროპული ღვინის წარმოება დაეწყო და ნაწარმი ევროპაში გაეტანა, თავდაპირველად ყველას მხოლოდ ოცნება ეგონა, მაგრამ მაინც მოახერხა დაემტკიცებინა, რომ შეუძლებელი არაფერია. წლების შრომამ შედეგი გამოიღო – რამდენიმე ათწლეულის განმავლობაში, მეურნეობისა და ღვინის წარმოების ნაბიჯ-ნაბიჯ განვითარებამ, გენერალ-ლეიტენანტს საოცნებო ჯილდო – Exposition Universelle Internationale-ის ოქროს მედალი და ევროპაში აღიარება მოუტანა.
ევროპიდან დაბრუნებული მემამულის მთავარი მიზანი საკუთარი მიწა-წყლის დასავლური წესით მოწყობა იყო. ივანემ ფრანგ აგრონომთან, ქუთაისის სამეურნეო სკოლის დირექტორ ოდენთან ერთად, ინოვაციური ტექნოლოგიების საქართველოში შემოტანა დაიწყო.
ივანე მუხრანბატონის სახელს უკავშირდება მეღვინეობა-მევენახეობის ახალი თაობის გასაზრდელად დაარსებული სკოლა, რომელიც ყოველწლიურად 10 მოსწავლეს იღებდა. ისინი სამწლიან კურსს გადიოდნენ და მეურნეობის ხარჯზე ადგილზევე ცხოვრობდნენ. მეპატრონე თითოეული რგოლის მუშაობას თავად აკონტროლებდა და ხარჯების მიზანშეწონილობასაც თვითონვე წყვეტდა.
ღვინის, არყისა და სპირტის პარალელურად, ივანე ცქრიალა ღვინის წარმოებასაც ეწეოდა. ყოველწლიურად, მეურნეობა 20-30 ათას ბოთლს ასხამდა. „შამპანურის“ ტექნოლოგიებს, მუხრანის გარდა, საქართველოს სხვა კუთხეებში იყენებდნენ, თუმცა დასაძველებელი მარანი მხოლოდ მუხრანბატონს ჰქონდა.
ივანე მუხრანბატონის ოცნება 1889 წელს ახდა! პარიზში, ღვინის საერთაშორისო გამოფენაზე Exposition Universelle Internationale „მუხრანულმა“ ოქროს მედალი მოიპოვა. ამავე წელს, საფრანგეთის მთავრობამ ივანეს „სოფლის მეურნეობის დამსახურებული მოღვაწის“ (Officier du mériteagricole) წოდება მიანიჭა.
1889 წელს პარიზის ღვინის საერთაშორისო გამოფენაზე, „მუხრანულმა“ უდიდეს წარმატებას მიაღწია – ბრენდი ოქროს მედლით დააჯილდოვეს.
ჟურნალი Entrepreneur საქართველო
