ცოტა ხნის წინ ძველ თბილისში საერთაშორისო ბრენდის დიზაინ-სასტუმრო Golden Tulip Design Tbilisi გაიხსნა. სასტუმრომ გახსნის დღიდანვე მიიპყრო როგორც ადგილობრივი სტუმრების, ასევე ტურისტების ყურადღება და უკვე იქცა მათთვის საყვარელ ადგილად.
Golden Tulip Design Tbilisi-ის შენობა ცნობილმა პორტუგალიელმა არქიტექტორმა, ცეზარ რიბეირომ „ნოა სტუდიასთან“ თანამშრომლობით დააპროექტა. აქ, ამ შენობაში, თითოეულ დეტალს განსაკუთრებული დატვირთვა და ფუნქცია აქვს.
შენობის ფასადი მოპირკეთებულია ქართული აგურით, რომელიც განსაკუთრებით უხდება ქალაქის კოლორიტულ უბანს. ექსტერიერზე გამოყენებულ ტრადიციულ აგურს თანამედროვე დიზაინის შავი ფანჯრების პროფილები ერწყმის, რომლებიც იატაკიდან ჭერამდეა განთავსებული და ოთახს მთელი დღის განმავლობაში მზის შუქით ავსებს. მთლიანი შენობის როგორც ექსტერიერი, ასევე ინტერიერი გეომეტრიული ფორმებით თამაშია.
შენობას განსაკუთრებულს ხდის ფასადის მუდ-ლაით კონცეფცია, რომლითაც უძრავი ქონება − უსულო შენობა, ცოცხალი ორგანიზმი ხდება და შიგნით მყოფი ადამიანების განწყობა გარეთ გამოაქვს. შედეგად, შენობის ფასადი, როგორც ადამიანის ფიქრები და განწყობებია − არასდროს არის ერთნაირი და ყოველდღიურად იცვლება. თითოეული ოთახის ჩარჩო ახალი სტუმრების განწყობებს გადმოსცემს და ახალ ისტორიებს უყვება ქალაქს. მუდ-ლაით კონცეფცია ფერთა მთელ გამას მოიცავს. ამგვარი გადაწყვეტილებით, არქიტექტორმა ერთგვარად მინიმალისტურ ინტერიერში სითბო შეიტანა.
სასტუმროს შესასვლელშივე გხვდება საერთაშორისო სტანდარტისა და ადგილობრივი კულტურის საოცარი მიქსი. ლობიში არსებულ კედელზე ხელით მოხატული უნიკალური ქართული ანბანია წარმოდგენილი. ეს საქართველოში პირველი სივრცეა, სადაც ციფრული არტის კედელია განთავსებული. ციფრულ გალერეაში ქართველი NFT-არტისტების გამოფენები გაიმართება.
სასტუმროში თანამედროვე დიზაინის 77 ოთახია და მოიცავს ყველაფერს, რაც კომფორტული დასვენებისთვისაა საჭირო. სასტუმროს თითოეული ნომერი ქართველი არტისტების მიერ ხელით შექმნილი ნამუშევრებითაა გაფორმებული, რომლებიც საქართველოს ისტორიის მნიშვნელოვან ფრაგმენტებს გადმოგვცემს.
როგორც დასაწყისშიც აღვნიშნეთ, გეომეტრიული ფორმები შენობის არქიტექტურაში მნიშვნელოვან როლს თამაშობს. ექსტერიერზე გამოყენებული დეტალები ინტერიერშიც მეორდება. რასაც ფასადზე დაინახავთ, აუცილებლად დაგხვდებათ ოთახებშიც.
კორიდორი, როგორც მთლიანად სასტუმრო, გეომეტრიულ ფორმებს იმეორებს. თითოეულ დეტალს ორმაგი დატვირთვა აქვს: ერთი მხრივ, დიზაინერული ელემენტია, ხოლო მეორე მხრივ − პრაქტიკული დანიშნულებისაა. ასეა სარკის ზედაპირის მქონე სამკუთხედის კონსტრუქციის შემთხვევაშიც, რომელიც კორიდორს ორ ნაწილად ყოფს და სათავსო ოთახის ფუნქციასაც იძენს.
კორიდორი მუქია, კედელზე ნატურალური ხის შავი პანელებია გაკრული. არქიტექტორმა აქაც ფერებით ითამაშა. ჩამუქებული, შავი კორიდორიდან სტუმარი პირდაპირ თეთრ, ნათელ ოთახში ხვდება.
TITA რესტორნის ერთ კედელზე მთლიანი ვიტრაჟებია, საიდანაც ძველი თბილისის პანორამული ხედები იშლება.
რესტორანში სივრცე სხვადასხვა კუნძულადაა დაყოფილი. აქ მოწყობილია ბიზნეს-ლაუნჯი, ბარი საავტორო კოქტეილებისთვის და მაგიდები მეგობრული ვახშმებისთვის.
ლანდშაფტის დიზაინერებმა იზრუნეს სივრცის გამწვანებაზე და ტერასაზე ნამდვილი ტროპიკული კუნძული მოაწყვეს.
რკინის კიბე, რომლითაც რესტორნიდან ტერასაზე ასვლა შეგიძლიათ, სამკუთხაა და სპეციალური მასალით ისეა შექმნილი, რომ ვიბრაცია არ იგრძნობა.
სასტუმრო მთლიანად ეკომეგობრული და ენერგოეფექტური მასალებითაა აშენებული და ე.წ. მწვანე შენობის სტატუსს ატარებს.
დიზაინერული, Iconic-ავეჯი, რომელიც სასტუმროშია, Golden Tulip Design Tbilisi-ისთვის სპეციალური შეკვეთით, საზღვარგარეთ დამზადდა. მასალად გამოყენებულია ნატურალური ხე, რომელიც, თავის მხრივ, აგრძელებს შენობის ეკომეგობრულ კონცეფციას.
