მომავალ წელს ბუკინგემის სასახლეში გაიხსნება გამოფენა – „დედოფალი ელისაბედ II : მისი ცხოვრება სტილში“, რომელიც 70-წლიანი მეფობის განმავლობაში შექმნილ მოდურ მემკვიდრეობას წარმოადგენს.
„მისი უდიდებულესობის გარდერობი ხანგრძლივი ცხოვრების ასახვაა, რომელიც დედოფალმა მოვალეობას მიუძღვნა და მრავალი თვალსაზრისით, დროის კაფსულას წარმოადგენს. მასში აღბეჭდილია ისტორიის განსაკუთრებული და მნიშვნელოვანი მომენტები“ – განაცხადა ბრიტანელმა დიზაინერმა ერდემ მორალიოღლუმ.
გამოფენაზე გარდერობის დაახლოებით 200 ნივთი იქნება წარმოდგენილი, რომელიც დედოფალმა თავისი 96-წლიანი ცხოვრების განმავლობაში მოირგო. მათგან ნახევარი საჯაროდ არასოდეს გამოუფენიათ – აღნიშნულია სამეფო კოლექციის სამშაბათს გავრცელებულ განცხადებაში. გარდა ამისა, წარმოდგენილი იქნება ესკიზებიც – ზოგიერთი მათგანი დიზაინერების ან თავად დედოფლის შენიშვნებით.
მორალიოღლუსთან ერთად გამოფენისთვის ნამუშევრებს წარმოადგენენ დიზაინერები რიჩარდ ქუინი და კრისტოფერ კეინი. გამოფენა ბუკინგემის სასახლის სამეფო გალერეაში აპრილში გაიხსნება.
„ელისაბედის სტილი და მის მიერ ბრიტანული კულტურის პოპულარიზაცია ჩვენს მოდაზე უდიდეს გავლენას ახდენდა. დედოფალი ყოველთვის ყურადღებას აქცევდა ბრიტანელ დიზაინერებს, რითიც უსვამდა ხაზს ბრიტანული მოდის აქტუალურობასა და მნიშვნელობას მთელ მსოფლიოში.“– განაცხადა ქუინმა.
„მისი სამოსი ბრიტანეთის ისტორიას ყვება“ – დაამატა კეინმა.
გამოფენაზე წარმოდგენილი იქნება მწვანე საღამოს კაბა, რომელიც ნორმან ჰარტნელმა შექმნა. დედოფალმა ის 1957 წელს, ვაშინგტონში, დიდი ბრიტანეთის საელჩოში გამართულ სახელმწიფო ბანკეტზე მოირგო, რომელიც მაშინდელი პრეზიდენტის, დუაიტ ეიზენჰაუერის პატივსაცემად გაიმართა.
გამოფენაზე წარმოდგენილი იქნება ნორმან ჰარტნელის მიერ შექმნილი დედოფლის საქორწილო კაბა, კორონაციისთვის შექმნილი კაბა და მეჯვარის კაბა, რომელიც ელისაბედმა 1934 წელს მოირგო.
წარმოდგენილი იქნება ასევე იქნება დედოფლის ცხენოსნობისთვის განკუთვნილი სამოსი და მისი ცნობილი თავსაფრები.
გამოფენის ერთ-ერთი ყველაზე უჩვეულო ექსპონატი იქნება გამჭვირვალე პალტო, რომელიც დიზაინერმა ჰარდი ემისმა 1960-იან წლებში შექმნა.
„ის საოცრად თანამედროვე იყო თავისი ეპოქისთვის,“ — აღნიშნულია სამეფო კოლექციის განცხადებაში.
„დედოფალი ელისაბედ II-ის გარდერობი არის სიმბოლიზმის, სამკერვალო ოსტატობისა და ბრიტანული ხელოვნების უბადლო ნიმუში,“ — განაცხადა გამოფენის ზედამხედველმა, კეროლინ დე გიტომ.
გამოფენა 2026 წლის 10 აპრილიდან 18 ოქტომბრამდე გაიმართება.
დიდი ბრიტანეთის დედოფალი ელისაბედ II საზოგადოებაში ყოველთვის საუკეთესო, ფერადი და დახვეწილი სამოსით ჩნდებოდა. ითვლება, რომ დედოფალი ერთსა და იმავე სამოსს ორჯერ არასდროს იცვამდა, თუმცა ეს სიმართლე არაა – დედოფალი ახალ კაბას მხოლოდ ოფიციალურ ღონისძიებებზე იცვამდა, სახლში, ოჯახის წევრებთან კი შეეძლო საყვარელი ტვიდის ქვედაბოლო წლების მანძილზე ეტარებინა. ამასთან, დედოფალს ფულის ფლანგვა არ უყვარდა. კაბების ხშირი ცვლა მისი, როგორც სახელმწიფოს მეთაურის, მოვალეობა იყო, თუმცა, ამ მოვალეობასაც კი ეკონომიურად ასრულებდა.
2019 წელს დიდი ბრიტანეთის დედოფალმა ნატურალური ბეწვისგან დამზადებულ ტანსაცმელსა და აქსესუარებზე უარი თქვა. დიდი ბრიტანეთი მსოფლიოში პირველი ქვეყანა გახდა, რომელმაც ეთიკური მიზეზების გამო ნატურალური ბეწვის წარმოება შეწყვიტა.
უცნაური საქორწინო ცრურწმენის გამო დედოფალმა ერთ-ერთი ულამაზესი ფერი სამუდამოდ შეიძულა. საქმე ის გახლავთ, რომ შვილების ქორწილზე ელისაბედ II-ს ყოველთვის მუქი ლურჯი სამოსი ეცვა -1973 წელს, როდესაც პრინცესა ანა კაპიტან მარკ ფილიპსზე დაქორწინდა, 1981 წელს, როდესაც პრინცი ჩარლზი პრინცესა დიანაზე დაქორწინდა და 1986 წელს, როდესაც პრინცი ენდრიუ სარა ფერგიუსონზე დაქორწინდა. მას შემდეგ, რაც სამივე ქორწინება განქორწინებით დასრულდა, დედოფალმა საქორწინო ცერემონიებზე ლურჯი კაბების ჩაცმაზე უარი თქვა.
დედოფალი ელისაბედ II 2022 წლის სექტემბერში გარდაიცვალა.
ასევე დაგაინტერესებთ
