ხარისხზე ორიენტირებული კვების ობიექტი „ფუდ გალერი“ ქუთაისელებმა ახლახან გაიცნეს. მომხმარებელს ადგილზე 300-მდე კერძის დაგემოვნების შესაძლებლობა აქვს, სივრცე ასევე მორგებულია იმ ადამიანების სურვილებსა და მოთხოვნებზე, ვინც ჯანსაღად იკვებებიან. ვრცლად ,,ფყდ გალერის” შესახებ მისი დამფუძნებელი ანა ზივზივაძე გვესაუბრა.
როგორ გაჩნდა „ფუდ გალერის“ დაარსების იდეა?
ანა ზივზივაძე: „ფუდ გალერის“ შექმნის იდეა წლებია, რაც არსებობს, უბრალოდ, ვერ ვპოულობდით ისეთ ადგილს, რომელიც ქალაქის ცენტრში იქნებოდა და, ამავდროულად, ყველა ჩვენს მოთხოვნას მოერგებოდა. მიმდინარე წლის გაზაფხულს, როდესაც ეს ფართი ვნახე, მივხვდი, რომ ის იყო, რაც გვჭირდებოდა.
რას სთავაზობს კვების ობიექტი მომხმარებლებს?
ობიექტზე წარმოდგენილია სამასამდე დასახელების ცივი და ცხელი კერძი, ცომეულისა და ტკბილეულის ფართო ასორტიმენტი. ასევე გვაქვს პასტა, რომელიც მზადდება პარმეზანის ბორბალში, რომაული პიცები და ფრანგული კრუასანის მრავალფეროვანი არჩევანი. მომხმარებელს ასევე ვთავაზობთ ჩვენთან დამზადებულ წვენებს.
გვიამბეთ მომსახურებისა და პროდუქციის ხარისხზე.
ამ სფეროში ხარისხი არის ძალიან მნიშვნელოვანი, ვფიქრობ, გადამწყვეტიც კი. მომხმარებელთა სწორი კომუნიკაცია და ბაზარზე მორგებული ფასი. ვცდილობთ, გამოვიყენოთ პრემიუმ ხარისხის ინგრედიენტები, რაც ქართულ ბაზარზე არის ხელმისაწვდომი. ვთანამშრომლობთ ადგილობრივ ფერმერებთანაც.
მრავალფეროვანი სამზარეულო
ადგილზე დაგხვდებათ ქართული სამზარეულოს ძირითადი კერძები. ჩვენთან შესაძლებელია სპეციალური კალორაჟის მიხედვით შედგენილი მენიუების შეძენა, ორჯერადი და სამჯერადი კვება. ნაწილობრივ წარმოდგენილი გვაქვს იტალიური და ფრანგული სამზარეულო, ასევე აზიური კერძები.
როგორია მომხმარებელთა უკუკავშირი?
მომხმარებელთან გვაქვს ყოველთვის უშუალო კავშირი. ვცდილობთ, რომ ხარვეზების შემთხვევაში სწრაფად გამოვასწოროთ. ვითვალისწინებთ მათ სურვილებს ამა თუ იმ კერძის დამატებასთან დაკავშირებით.
„ფუდ გალერის“ სამომავლო გეგმები
სამომავლოდ ვგეგმავთ, გავზარდოთ მასშტაბები და ხელმისაწვდომობა ახალი ფილიალების გახსნით ქუთაისსა და ბათუმში. ასევე, ტკბილეულის ხაზის დამატებას უფრო ფართო ასორტიმენტით.
ტექსტი: მაკუნა შავგულიძე
ფოტო: ლანა ვახტანგაძე
