„კომპანიისთვის უმნიშვნელოვანესია იმ პროდუქტის ხარისხი, რომელსაც მომხმარებელს სთავაზობს“
კომპანია „დეილი“ ბაზარზე 2014 წლიდან ფუნქციონირებს და 2000-მდე დასაქმებულს აერთიანებს. ქსელის პირველი ფილიალი ქუთაისში გაიხსნა. დღეს კომპანია 172 ფილიალით საქართველოს სხვადასხვა რეგიონში, ქალაქსა თუ სოფელშია წარმოდგენილი.
აქედან 42 ქუთაისში მდებარეობს.
2014 წელს, როდესაც კომპანიაში მიზნად რეგიონალური სუპერმარკეტების ქსელის განვითარება დაისახეს, კონკურენციის დაბალი მაჩვენებელი იყო. ამ პერიოდის მანძილზე შეძლეს შესაძლებლობები მაქსიმალურად გამოეყენებინათ და სწრაფად განვითარებულიყვნენ. რამდენიმე წელიწადში უკვე ყველა დიდი ბრენდი აქტიურად ცდილობდა რეგიონების ათვისებას, რაც უფრო საინტერესო, კონკურენტუნარიან გარემოს ქმნიდა.
კომპანიის მიზანი და ინტერესი ყოველთვის იყო და რჩება რეგიონალური ბიზნესინფრასტრუქტურის განვითარება, დასაქმების ხელშეწყობა და მომხმარებლებისთვის სახლთან ახლოს სავაჭრო სივრცეების გახსნა.
„დეილი“ სუპერმარკეტი ორიენტირებულია მომხმარებლის ყოველდღიური საყიდლების პროცესი სწრაფი, მარტივი და კომფორტული გახადოს. სახლთან ახლოს, ყოველდღიური მოხმარების ყველა საჭირო პროდუქტი, მრავალფეროვანი არჩევანი, განსაკუთრებული აქციები და შეთავაზებები მხოლოდ არასრული ჩამონათვალია იმისა, რასაც კომპანია მომხმარებელს სთავაზობს.
დაგეგმვის პროცესში მუდმივად ითვალისწინებენ განსაკუთრებულ პერიოდებს, დღესასწაულებს, მნიშვნელოვან დღეებს, რათა მომხმარებელს ყოველთვის მათთვის საინტერესო აქციები შესთავაზონ.
განსაკუთრებით აღსანიშნია „დეილის“ საკონდიტრო და მზა კვების საწარმოები ქუთაისსა და წყალტუბოში. საწარმოები აღჭურვილია თანამედროვე დანადგარებით, დაცულია წარმოების ყველა სტანდარტი. პროფესიონალი გუნდის წევრებს მუდმივად უტარდებათ სურსათის უვნებლობის ტრენინგები კვალიფიკაციის ამაღლების მიზნით. ყოველდღიურად „დეილის“ საწარმოებში 100-მდე დასახლების მზა საკვები, სალათები, კერძები და საკონდიტრო პროდუქცია იწარმოება. შედეგად კი 150-მდე ფილიალი მარაგდება. კომპანიისთვის მნიშვნელოვანია ყველა საჭირო პროდუქტი ერთ სივრცეში იყოს წარმოდგენილი, რათა მომხმარებელს გაუმარტივოს საყიდლების პროცესი.
„დეილის“ მომხმარებლები მომთხოვნები და ლოიალურები არიან. ბიზნესის ტიპიდან გამომდინარე, ყველა ასაკისა და მოთხოვნილების მომხმარებელი ჰყავთ, რაც ერთდროულად საინტერესოც არის და კომპლექსურიც. ბიზნესის ოპერირების ნაწილში უმნიშვნელოვანესია თითოეული მათგანის ინტერესები მაქსიმალურად იყოს გათვალისწინებული. კომპანიაში განსაკუთრებულ ყურადღებას აქცევენ მომხმარებლის უკუკავშირს ფილიალებსა და სოციალურ მედიაში. მომხმარებელი ყველაზე უკეთ ამჩნევს სხვადასხვა დეტალს ფილიალში ვიზიტის დროს, სწორედ ამიტომ მათი აზრი უმნიშვნელოვანესია სამომავლოდ პროცესების გამართვისა და განვითარებისთვის.
გუნდურობა მათი წარმატების უმნიშვნელოვანესი ნაწილია. დადგენილი სტანდარტების გარდა, მუდმივად ცდილობენ მეტი კომუნიკაცია ჰქონდეთ მენეჯმენტის სხვადასხვა რგოლს შორის, გაუზიარონ ერთმანეთს უკუკავშირი, რაც საერთო მიზნების მიღწევისა და წარმატებისთვის აუცილებელია. გარდა ამისა, უწყვეტ რეჟიმში ნერგავენ სიახლეებს, რაც მიმდინარე და სამომავლო პროცესების გამარტივებისკენ არის მიმართული. თანამშრომელთა პროფესიონალიზმი, მათი ხედვა მიმდინარე და სამომავლო პროცესებზე, მათი ჩართულობა სხვადასხვა პროცესში კომპანიას საშუალებას აძლევს, სამომავლო გეგმებში უამრავი დეტალი გაითვალისწინოს.
ტექსტი: ნანა კუკულავა
