დღევანდელი ჩვენი რესპონდენტი ბუნებით მაქსიმალისტი და საკუთარი საქმის პროფესიონალია. მან კარგად იცის, თუ როგორ უნდა აქციოს დაბრკოლება ახალ შესაძლებლობად და ჰქონდეს წარმატებული ბიზნესსაკონსულტაციო საქმიანობა. „საქმე ნულიდან კი არ დავიწყე, არამედ მინუსებიდან“, – აღნიშნავს ჩვენთან საუბარში „დიმიტრი კირხანიდის საკონსულტაციო ცენტრის“ დამფუძნებელი, დიმიტრი კირხანიდი.
დიმა, რატომ აირჩიეთ ეს პროფესია?
არასოდეს მიფიქრია სხვა პროფესიაზე, თავიდანვე გააზრებული მქონდა, რომ ეს სფერო უნდა ამერჩია და ჩავაბარე ეკონომიურზე, ივანე ჯავახიშვილის უნივერსიტეტში. მაქვს ბაკალავრის და მაგისტრის ხარისხი, პირველი კურსიდან სწავლის პარალელურად ვმუშაობდი. სამი წელი ვიყავი გენერალური დირექტორის თანაშემწე, სადაც ტექნიკურად ვისწავლე ბევრი რამ, შემდეგ გადავედი ინვესტორთან, ათამდე ინვესტორთან ვითანამშრომლე როგორც ბუღალტერმა, იურისტმა და თანაშემწემ, რამაც პროფესიონალურად გამზარდა და უდიდესი გამოცდილება შემძინა. ამის შემდეგ კი შევქმენი ჩემი კომპანია – „დიმიტრი კირხანიდის საკონსულტაციო ცენტრი“.
რა იყო კომპანიის შექმნის მიზანი? და რატომ უნდა გააკეთოს კომპანიამ თუ ინვესტორმა თქვენზე არჩევანი?
ჩემი მიზანია, რომ ამ სფეროში საქართველოში ერთ-ერთი წამყვანი კომპანია ვიყოთ. „დიმიტრი კირხანიდის საკონსულტაციო ცენტრი“ (DKCC) არის საკონსულტაციო კომპანია, რომელიც საქართველოს თუ უცხო ქვეყნების მოქალაქეებს სთავაზობს მაღალხარისხიან საბუღალტრო, იურიდიულ და იუსტიციის სრულ მომსახურებას. ჩვენ კლიენტებს ვეხმარებით ისეთი საკითხების გადაჭრაში, როგორიცაა: კომპანიების რეგისტრაცია და მისი თანმდევი ბიუროკრატიული საკითხები, დოკუმენტაციების მომზადება, ხელშეკრულებების შედგენა, დროის გარკვეულ შუალედში (წლიური თუ თვიური) ფინანსური ანალიზი და ა. შ.
პროფესიონალიზმი არის ის, რითაც ჩვენი გუნდი გამოირჩევა, რომელიც ჩვენი თანამშრომლობის კვალდაკვალ გამოგყვებათ სასურველი შედეგის მიღწევამდე.
ასევე, რეალისტური მოლოდინები – შემდგომი რამ, რასაც, ასევე, აუცილებლად ვუსახავთ ჩვენს კლიენტებს. ადეკვატური მოლოდინი ადეკვატურ შედეგს მიგვაღებინებს.
რა გიბიძგებთ, რომ განვითარდეთ და წინ იაროთ?
მოტივაცია და მიზანი იმის, რომ მქონდეს ერთ-ერთი საუკეთესო კომპანია. მქონდეს შესაძლებლობა, დავასაქმო პროფესიონალი კადრები და მივცე მათ შესაფერისი ანაზღაურება. დავეხმარო ადამიანებს, არა მხოლოდ ოჯახს და მეგობრებს, არამედ სრულიად უცხო ადამიანებს. ამასთანავე, მინდა ვიყო მაგალითი ახალგაზრდებისთვის, რომ არათუ ნულიდან, არამედ მინუსებიდან დავიწყე საქმე. წარმატებისკენ მიმავალ გზაზე არაერთ დაბრკოლებას შეხვდებით, მეც მქონია შეცდომები ბიზნესში, რის შედეგადაც მქონდა გარკვეული ფინანსური ვალდებულება, თუმცა ამის გამო არ დავნებებულვარ, არ გავჩერებულვარ და გავაგრძელე გზა.
მაქსიმალისტი ხართ?
დიახ. არასოდეს არ ვჩერდები. მქონია შემთხვევები, როდესაც ერთხელ ვცადე და არ გამოვიდა, ორჯერ, სამჯერ ვცადე და ისევ არ გამოვიდა, მიუხედავად ამისა, არ ვნებდები და მეოთხე ცდაზე აუცილებლად გამოდის.
რას მოაქვს წარმატება?
მნიშვნელოვანია, ადამიანს შეეძლოს ნებისმიერ საკითხზე ცივი გონებით მსჯელობა და ნებისმიერ პრობლემას აღიქვამდეს ისე, როგორც ახალ შესაძლებლობას.
რა რჩევას მისცემდით ახალგაზრდებს, ვინც ახლა ირჩევენ პროფესიას?
უნდა აირჩიოს ის პროფესია, რომელიც ნამდვილად მოსწონს. არ შეიძლება მუშაობდე მხოლოდ ფინანსური სარგებლის გამო, უნდა გიყვარდეს ის საქმე, რასაც აკეთებ. მუდმივად უნდა ეცნობოდე სიახლეებს იმ სფეროში, სადაც ხარ, ვითარდებოდე, კითხულობდე ლიტერატურას/ჟურნალებს. საკუთარი თავის განვითარება არასოდეს არ უნდა შეწყვიტოთ.
სამომავლო გეგმები
სამომავლოდ ვაპირებ ფილიალების გახსნას და ჰოლდინგის გაკეთებას ევროპის ქვეყნებში. ამასთანავე, მნიშვნელოვანია ძლიერი კადრების მოძიება, კომპანიის იმიჯი და სწორი პოზიციონირება. ასევე, მინდა უფრო მეტად აქცენტი გავაკეთო და ვიმუშაო ბუღალტრული და საგადასახადო მიმართულებით.
